༢༠༡༥ ཟླ་ ༦ ཚེས་ ༢༥ རེས་གཟའ་ཕུར་བུ།

༄༅། །འཕགས་མཆོག་ཕྱག་ན་པདྨོ་༸གོང་ས་༸སྐྱབས་མགོན་༸རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་དགུང་གྲངས་ ༨༠ ཕེབས་པའི་༸སྐུའི་གྱ་སྟོན་ཉིན་མོར་མགོན་པོ་གང་ཉིད་མཆོག་གིས་སྐུ་ཉིད་དགུང་གྲངས་བརྒྱ་ལྷག་བཞུགས་རྒྱུའི་བཀའ་བཞེས་སྐལ་བཟང་སྨིན་སྩལ་ཐོབ་པར་ལྷ་མི་ཆབ་འབངས་ཡོངས་སུ་རྫོགས་པ་དགའ་དད་སྤྲོ་གསུམ་ངང་རོལ་ཐུབ་པ་བྱུང་ཡོད།
དེ་ཡང་ཕྱི་ལོ་ ༢༠༡༥ ཟླ་ ༦ ཚེས་ ༢༡ དང་བོད་ཟླ་ ༥ ཚེས་ ༥ བོད་ལུགས་སྐུའི་འཁྲུངས་སྐར་ཉིན་དབུས་བོད་མིའི་སྒྲིག་འཛུགས་དང་། རི་བོ་དགེ་ལུགས་པ། མདོ་སྨད་ཆོལ་ཁ་བཅས་མཐུན་མོང་ནས་༸གོང་ས་མཆོག་དགུང་གྲངས་བརྒྱད་ཅུར་ཕེབས་པར་འཚམས་འདྲི་དང་མགོན་པོ་གང་ཉིད་མཆོག་གི་བཀའ་དྲིན་བསམ་བརྗོད་ལས་འདས་པ་ཁག་དྲན་བཞིན་གངས་ཅན་པའི་བསྟན་སྲིད་རང་དབང་བསྐྱར་ དར་ཡོང་ཐབས་དང་། ཡོངས་རྫོགས་བསྟན་པའི་མངའ་བདག  འཛམ་གླིང་ཞི་བདེ། ལྟ་གྲུབ་ཀྱི་རྩ་བ། དམ་ཚིག་གི་བླ་སྲོག  བོད་མིའི་ངོ་བོ་དང་ཆིག་སྒྲིལ་གྱི་མཚོན་རྟགས། སྐུའི་རླབས་ཆེན་མཛད་ཁུར་གསུམ་མུ་མཐུད་བསྐྱང་སླད་སྐུ་ཚེ་ཞབས་པད་བརྟན་ཕྱིར་བརྟན་བཞུགས་བསྟར་འབུལ་ རྗེས་བཀའ་སློབ་ཕེབས་པའི་ནང་།  སྨན་པས་ད་དུང་ལོ་ ༢༠ ལྷག་སྡོད་རྒྱུར་ཐེ་ཚོམ་མི་འདུག ཅེས་བརྗོད་ཀྱི་འདུག  འདི་ལོ་བརྒྱད་ཅུ་ལོན་པའི་གྱ་སྟོན་བྱེད་ཀྱི་འདུག་པ་ལྟར་རྗེས་མ་ངོས་རང་ལོ་དགུ་བཅུར་བསླེབ་སྐབས་དགུ་སྟོན། ཟེར་བའི་རྟེན་འབྲེལ་འདི་འདྲ་ཞིག་བྱེད་ཤོག་ཨང་། ཞེས་བཀའ་བཟང་ཕེབས་ཡོད།

གཞན་ཡང་དཔལ་ལྡན་སྲིད་སྐྱོང་མཆོག་གི་གྱ་སྟོན་གསུང་བཤད་ནང་། ལྷག་པར་ལོ་ཤས་གོང་ནས་༸གོང་ས་༸སྐྱབས་མགོན་ཆེན་པོ་མཆོག་གང་ཉིད་ནས་དགུང་གྲངས་ ༡༡༣ བཞུགས་རྒྱུའི་བཀའ་བཞེས་བཟང་པོ་སྨིན་སྩལ་ཐོབ་པ་དེར་འགྱུར་བ་གཏན་ནས་མི་མཛད་པ་སླར་ཡང་གསོལ་འདེབས་ནན་པོ་ཞུ་རྒྱུ་ཡིན། ཞེས་ཞུས་ཡོད་པ་དང་།

ལྷག་པར་གྱ་སྟོན་ཉིན་གཉིས་པར་དཔལ་ས་སྐྱ་གོང་མ་བདག་ཁྲི་རིན་པོ་ཆེ་མཆོག་གིས་གྱ་སྟོན་གསུང་བཤད་ནང་། སྔོན་མ་ཁམས་ནས་ཕྱི་ལོ་ ༡༩༥༠ ནང་རྫོང་གསར་མཁྱེན་བརྩེ་རྡོ་རྗེ་འཆང་འཇམ་དབྱངས་ཆོས་ཀྱི་བློ་གྲོས་ཞབས་སོར་འཁོད་རྗེས། ལུང་བསྟན་གནང་བ་བཞིན་༸གོང་ས་མཆོག་རྒྱ་གར་འཕགས་པའི་ཡུལ་ལ་ཞབས་སོར་འཁོད་མཚམས། རིས་སུ་མ་ཆད་པའི་བསྟན་འཛིན་གྱི་སྐྱེས་བུ་བསམ་གྱི་མི་ཁྱབ་པ་མང་པོ་བོད་གངས་ཅན་ལྗོངས་ཀྱི་ཟབ་པ་དང་རྒྱ་ཆེ་བའི་གདམ་ངག་སྙན་བརྗོད་མཐའ་དག་བུམ་པ་གང་འཇོའི་ཚུལ་དུ་གསན་བཞེས་མཛད་སྐོར་དང་། དེང་སང་དུས་འཁོར་དབང་ཆེན་ཞེས་པ་འཛམ་གླིང་མི་མང་ཡོངས་རྫོགས་ཀྱི་ཧ་གོ་བ་སྔར་བྱུང་མ་མྱོང་བའི་ངོ་མཚར་གྱི་མཛད་རྗེས་ཞིག་ཆགས་ཡོད། གསོལ་འདེབས་དེའི་ནང་ནོ་བེལ་ཞི་བདེའི་གཟེངས་རྟགས་ཞེས་གསལ་པོ་ཡོད་མ་རེད་དེ། གང་ལྟར་ནོ་བེལ་ཞི་བདེའི་གཟེངས་རྟགས་མཚོན་པའི་འཛམ་གླིང་ནང་སྙན་གྲགས་ཆེ་བའི་གཟེངས་རྟགས་བཞེས་གནང་མཛད་པ་དེའི་ནང་གསལ་པོ་ཡོད།  ང་ཚོ་ཚང་མས་གལ་པོ་ཆེ་ལ་ནན་ཏན་གྱི་དཔེ་ལྟར་ཚང་མས་ད་ནས་བཟུང་༸གོང་ས་མཆོག་གི་བཀའ་ཚུལ་བཞིན་དུ་བསྒྲུབ་ཀྱི་ཡིན་བསམ་པའི་དམ་བཅའ་དགོས་པ་དེ་མཛད་སྟོན་གྱི་འབུལ་བའམ་མཆོད་པ་ཡག་ཤོས་དེ་ཆགས་ཡོད། སྤྱིར་༸རྒྱལ་བ་རིན་པོ་ཆེ་མཆོག་ལ་མཚོན་ན་བོད་ཀྱི་ཆོས་སྲིད་གཉིས་ཀྱི་དབུ་ཁྲིད་ཡིན་པ་བཤད་མ་དགོས་པ་རེད། གསུངས་ཡོད།

དཔལ་རྒྱལ་བ་ཀརྨ་པ་རིན་པོ་ཆེ་མཆོག་གིས་གྱ་སྟོན་གསུང་བཤད་ནང་། ༸གོང་ས་མཆོག་ལ་མཆོད་པ་ཕུལ་རྒྱུ་ཡག་ཤོས་དེ་མགོན་པོ་གང་ཉིད་ཐུགས་དགྱེས་རྒྱུ་དེ་རེད། དེ་འདྲ་ཡིན་དུས་མགོན་པོ་མཆོག་གིས་གང་གསུངས་པའི་དགོངས་གཞི་དེ་ང་རང་ངོས་ནས་གང་ཐུབ་ཅི་ཐུབ་དང་། ནུས་པས་གང་ལྕོགས་འགྲུབ་ཐུབ་པ་དེ་འདྲ་ཞིག་བྱུང་པ་ཡིན་ན། ༸སྐུ་མདུན་ཐུགས་དགྱེས་རྒྱུའི་རྒྱུ་ཡག་པོ་ཡོང་གི་རེད་བསམ་གྱི་འདུག  མ་འོངས་པར་༸གོང་ས་མཆོག་དགུང་གྲངས་དགུ་ཅུར་ཕེབས་སྐབས། སྐུའི་དགུ་སྟོན་བོད་གངས་ཅན་ལྗོངས་སུ་སྲུང་བརྩི་ཞུ་ཐུབ་པའི་རེ་བ་དང་སྨོན་འདུན་ཞུ་བཞིན་ཡོད། ཅེས་བསྟན་བདག་བླ་ཆེན་དང་སྐུ་ཚབ་ཚང་མས་༸གོང་ས་མཆོག་གིས་བཀའ་སློབ་ཕེབས་དོན་བཞིན་གང་ཉིད་ཀྱི་བཀའ་བཞིན་བསྒྲུབ་རྒྱུ་ཚང་མས་ནུས་པ་གང་ལྕོགས་ཀྱིས་ལག་བསྟར་གནང་རྒྱུའི་དམ་བཅའ་དང་གསོལ་འདེབས་ཞུས་ཡོད།

དེ་བཞིན་གཞུང་འབྲེལ་སྐུའི་འཁྲུངས་སྐར་རྟེན་འབྲེལ་གྱི་གྱ་སྟོན་མཛད་སྒོར་རྒྱ་གར་དབུས་གཞུང་རིག་གཞུང་དང་ཡུལ་སྐོར་སྤྲོ་འཆམ་བློན་ཆེན་སྐུ་ཞབས་མ་ཧེ་ཤི་ཤར་མ་མཆོག་གིས་གསུང་བཤད་གནང་བའི་ནང་། ངས་དེ་རིང་རྒྱ་གར་མི་འབོར་ཐེར་འབུམ་གཅིག་དང་དུང་ཕྱུར་ཉི་ཤུ་རྩ་ལྔའི་ཚབ་ཞུས་ནས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་སྒོ་གསུམ་གུས་པ་ཆེན་པོས་འཚམས་འདྲི་ཞུ་རྒྱུ་དང་སྐྱེས་ཆེན་དམ་པ་སྐུ་ཉིད་མཆོག་སྐུ་ཚེ་བརྟན་ཅིང་ཐུགས་བཞེད་ལྷུན་གྱིས་བསྒྲུབ་པའི་སྨོན་འདུན་ཞུ་ཆེད་དེ་རིང་འདིར་བཅར་བ་ཡིན། འཛམ་གླིང་གི་སྐྱེ་འགྲོ་སྤྱི་དང་ལྷག་པར་བོད་མིའི་མགོན་དཔུང་དམ་པར་སྐུ་ཚེ་ཡུན་རིང་བརྟན་ཅིང་ལམ་སྟོན་གསུང་གི་འདུད་རྩི་རྒྱུན་མི་ཆད་པར་སྩལ་རོགས་ཞེས་གསོལ་འདེབས་ཞུ་རྒྱུ་ཡིན། ཞེས་ཞུས་ཡོད།

ཡང་རྒྱ་གར་དབུས་གཞུང་ནང་སྲིད་བློན་ཆེན་སྐུ་གཞོན་ཀི་རེན་རི་ཇི་ཇུ་མཆོག་གིས་གསུང་བཤད་གནང་བའི་ནང་། སྐུ་ཉིད་མཆོག་ནི་ཆོས་ལུགས་དང་སྤྱི་ཚོགས་བྱེ་བྲག་པ་གཅིག་མི་མཚོན་པར་སྐྱེ་འགྲོ་ཀུན་གྱི་མགོན་དཔུང་ཞིག་མཚོན་བཞིན་ཡོད། དེར་བརྟེན་སྐུ་ཉིད་མཆོག་སྐུ་ཚེ་ཡུན་རིང་བརྟན་པའི་སྨོན་འདུན་ཞུ་རྒྱུ་ནི་ང་ཚོ་སྐྱེ་འགྲོ་ཀུན་གྱི་སྐབས་བབ་ལས་འགན་ཞིག་ཆགས་ཡོད་པ་མ་ཟད། སྐུ་ཉིད་མཆོག་གིས་ལམ་སྟོན་མཛད་པ་རྣམས་བདག་ཅག་རྗེས་འབྲང་པ་རྣམས་ཀྱིས་བཀའ་སྲུང་ཅི་སྒྲུབ་ཞུ་རྒྱུ་ཡིན། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་གཙོས་མཛད་གཙོ་རྣམ་པ་མང་པོ་ཞིག་ངའི་ངོ་ཤེས་དང་སེམས་ཐག་ཉེ་བའི་གྲོགས་པོ་ཡིན། ང་ཚོའི་དབར་གྱི་མཛད་བརྩེའི་འབྲེལ་བ་འདི་མུ་མཐུད་གནས་རྒྱུ་རེད། ཅེས་གསུང་བཤད་གནང་ཡོད།

དེ་བཞིན་ཨ་རུ་ན་ཅལ་མངའ་སྡེའི་བློན་ཆེན་མཆོག་དང་། ཧི་མ་ཅལ་མངའ་སྡེའི་བློན་ཆེན་སོགས་རྒྱ་གར་གྱི་གནད་ཡོད་དབུ་ཁྲིད་མང་དག་ཅིག་༸སྐུའི་གྱ་སྟོན་ལ་བཅར་ཡོད་ཅིང་དམིགས་བསལ་ཐེངས་འདིར་རྒྱ་གར་གཞུང་ཕྱོགས་ནས་གཞུང་འབྲེལ་ཐོག་ནས་རྒྱ་གར་དབུས་གཞུང་གི་རིག་གཞུང་དང་ཡུལ་སྐོར་སྤྲོ་འཆམ་བློན་ཆེན་སྐུ་ཞབས་མ་ཧེ་ཤི་ཤརྨ་མཆོག་དང་ནང་སྲིད་བློན་ཆེན་སྐུ་གཞོན་ཀི་རེན་རི་ཇི་ཇུ་མཆོག་ཆེད་བཅར་ཞུས་ཡོད་པ་ནི་གཞུང་འབྲེལ་ཐོག་ནས་དཔོན་རིགས་ཆེ་གྲས་གདན་ཞུས་ལྟར་ཕེབས་པ་ཐོག་མ་ཆགས་ཡོད་འདུག་པ་ནི་དཔལ་ལྡན་སྲིད་སྐྱོང་མཆོག་གི་ཐུགས་བརྩོན་ལ་བརྟེན་ནས་བྱུང་བ་ཞིག་ཡིན།

གཞན་ཡང་སྐབས་དེར་འཛམ་གླིང་ས་ཕྱོགས་མང་པོར་༸སྐུའི་གྱ་སྟོན་སྲུང་བརྩི་གཟབ་རྒྱས་ཞུས་ཡོད་པ་མ་ཟད་བོད་གངས་ཅན་ལྗོངས་སུ་ཡང་རྒྱ་ནག་གཞུང་གིས་དབང་བསྒྱུར་དང་དམ་བསྒྲགས་ཧ་ཅང་ཆེན་པོ་ཡོད་མིན་ལ་མ་ལྟོས་པར་ས་གནས་གང་སར་༸སྐུའི་གྱ་སྟོན་སྲུང་བརྩི་གཟབ་རྒྱས་ཞུས་དང་ཞུ་བཞིན་ཡོད་པ་དེང་སྐབས་ཆ་འཕྲིན་དྲ་བ་ཁག་ནས་ཁ་གསལ་གཟིགས་ཐུབ་བཞིན་ཡོད།

ཐེངས་འདིར་བོད་མིའི་སྒྲིག་འཛུགས་ཀྱི་གྱ་སྟོན་གོ་སྒྲིག་ཚོགས་ཆུང་དང་མདོ་སྨད་ཆོལ་ཁའི་གྱ་སྟོན་གོ་སྒྲིག་ཚོགས་ཆུང་བཅས་ནས་༸སྐུའི་གྱ་སྟོན་གྱི་མཛད་སྒོ་ཉིན་གསུམ་རིང་གོ་སྒྲིག་ཐུགས་གྲ་ལེགས་གྲུབ་བྱུང་སྟེ་༸སྐུའི་གྱ་སྟོན་རྟེན་འབྲེལ་གཟབ་ཅིང་རྒྱས་པ་ལེགས་གྲུབ་བྱུང་ཡོད།།