༢༠༡༥ ཟླ་ ༥ ཚེས་ ༡༡ རེས་གཟའ་ཟླ་བ།

༄༅། །མང་གཙོའི་ལམ་ནས་འོས་འདེམས་བྱུང་བའི་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་ཕྱི་ལོ་ ༢༠༡༥ ཟླ་ ༥ ཚེས་ ༡༢ རེས་གཟའ་མིག་མར་ཉིན་ཨ་རིའི་རྒྱལ་ས་ཝ་ཤིང་ཊོན་ཌི་སི་རུ་རྒྱ་རིགས་སློབ་མ་ཁག་གཅིག་དང་ཤེས་ལྡན་མི་སྣ་ཁག་གཅིག་བཅས་དང་ལྷན་གླེང་མོལ་གནང་རྒྱུ་ཡིན་འདུག་པ་དང་། གླེང་མོལ་གྱི་ལས་རིམ་གོ་སྒྲིག་གནང་མཁན་རྒྱ་རིགས་མང་གཙོ་དོན་གཉེར་བ་དང་མཁས་པ་སྐུ་ཞབས་ཡང་ཅིང་ལི་ Dr. Yang Jianli ཡིན་འདུག ཁོང་ནི་ཐེངས་འདིར་སྲིད་སྐྱོང་མཆོག་གླེང་མོལ་ཐོག་གདན་ཞུ་གནང་མཁན་གཙོ་བོ་ཡིན་པ་མ་ཟད།

རྒྱ་རིགས་ཀྱི་ཚོགས་པ་ Initiatives for China ཞེས་པའི་ཚོགས་པ་དེའི་ཚོགས་གཙོ་ཡང་ཡིན་འདུག ཚོགས་པ་དེས་རྒྱ་ནག་ནང་ཞི་བའི་ལམ་ནས་མང་གཙོའི་ལམ་ལུགས་འཛུགས་རྒྱུའི་ཆེད་རྒྱལ་སྤྱིའི་ནང་ལས་འགུལ་སྤེལ་མུས་ཡིན་འདུག ཐེངས་འདིར་སྐུ་ཞབས་ཡང་ཅིན་ལིས་སྲིད་སྐྱོང་མཆོག་གདན་ཞུ་གནང་དགོས་པའི་རྒྱུ་མཚན་གཙོ་བོ་ནི་བོད་རྒྱ་མི་རིགས་གཉིས་དབར་ཕན་ཚུན་ཡིད་ཆེས་དང་འཆམ་མཐུན་གོང་སྤེལ་གཏོང་ཆེད་ཡིན་འདུག གཞན་ཡང་སྲིད་སྐྱོང་མཆོག་བོད་མིའི་སྒྲིག་འཛུགས་ཀྱི་ཕྱི་རྒྱལ་སྐུ་ཚབ་དོན་གཅོད་དགུའི་དོན་གཅོད་དང་ལས་བྱེད་བཅས་ལ་ཨ་རིའི་ཝིར་ཇི་ནི་ཡ་མངའ་སྡེའི་ནང་ཉིན་གྲངས་བཅུའི་རིང་ཕྱི་འབྲེལ་སྲིད་བྱུས་དང་འབྲེལ་བའི་ཟབ་སྦྱོང་འབུལ་བཞིན་པ་དེར་ཕེབས་ནས་གསུང་བཤད་གནང་རྒྱུ་ཡིན་འདུག