༢༠༡༥ ཟླ་ ༥ ཚེས་ ༡༢ རེས་གཟའ་མིག་དམར།
༄༅། །བརྒྱུད་ལམ་ཁག་ནས་གནས་ཚུལ་སྤེལ་བ་ལྟར་ན། ཕྱི་ལོ་ ༢༠༡༥ ཟླ་ ༥ ཚེས ༡༢ སྲིད་སྐྱོང་བློ་བཟང་སེང་གེ་མཆོག་ནས་ཨ་རིའི་རྒྱལ་ས་ཝ་ཤིང་ཌོན་དུ་རྒྱ་ནག་མང་གཙོ་དོན་གཉེར་བ་ཡང་ཅི་ལེན་གྱིས་གོ་སྒྲིག་དང་མགྲོན་འབོད་ཞུས་པ་བཞིན་རྒྱ་རིགས་ཤེས་ལྡན་མི་སྣ་དང་སློབ་ཕྲུག་ཁག་གཅིག་དང་མཇལ་མོལ་གནང་རྒྱུ་ཡིན་འདུག ཐེངས་འདིར་རྒྱ་རིགས་མང་གཙོ་གདོན་གཉེར་བ་སྐུ་ཞབས་ཡང་ཅི་ལིས་ Dr. Yang Jianli སྲིད་སྐྱོང་བློ་བཟང་སེང་གེ་མཆོག་མགྲོན་འབོད་ཞུས་དོན་གཙོ་བོ་ནི། ཕྱི་སྡོད་རྒྱ་མི་རིགས་ཚོས་བོད་ཀྱི་དངོས་ཡོད་གནས་སྟངས་གསལ་པོ་རྟོགས་ཐབས་ཆེད་ཡིན་ལུགས་བརྗོད་དོན། བོད་ཀྱི་ལོ་རྒྱུས་དང་། ཤེས་རིག ཆོས་ལུགས། དེང་སྐབས་བོད་ཀྱི་དངོས་ཡོད་གནས་སྟངས་དང་། དེ་བཞིན་བོད་མི་ཚོའི་རེ་བ་ཇི་ཡོད་རྒྱ་རིགས་ཚོར་ངོ་སྤྲོད་བྱ་རྒྱུ་དང་། ལྷག་པར་དངོས་ཡོད་གནས་སྟངས་ཐོག་ཕྱི་ཕྱོགས་སུ་ཡོད་པའི་རྒྱ་རིགས་མང་པོས་༸གོང་ས་༸སྐྱབས་མགོན་ཆེན་པོ་མཆོག་གིས་འདོན་གནང་མཛད་པའི་གཉིས་སྨན་དབུ་མའི་ལམ་གྱི་སྲིད་བྱུས་ཀྱི་ནང་དོན་དང། དབུ་མའི་ལམ་གྱི་སྲིད་བྱུས་སྐོར་གྱི་དངོས་ཡོད་གནས་སྟངས་ཇི་ཡིན་ཤེས་ཀྱི་མེད་སྟབས།
དེར་བརྟེན་སྲིད་སྐྱོང་བློ་བཟང་སེང་གེ་མཆོག་གིས་རྒྱ་རིགས་མི་མང་ཚོར་གང་ཐུབ་ཀྱིས་དབུ་མའི་ལམ་གྱི་སྐོར་གོ་རྟོགས་སྤེལ་ཐུབ་རྒྱུ་དང་། ཡང་ཅི་ལི་ཁོང་རང་ཉིད་ཀྱིས་ངོས་ནས་ཀྱང་གང་ཐུབ་ཀྱིས་བོད་ཀྱི་ཆོས་སྲིད་གཉིས་ཀྱི་དབུ་ཁྲིད་རྣམ་པ་དང་རྒྱ་ནག་སྐམས་སའི་མི་དམངས་དབར་འབྲེལ་མཐུད་ཞུས་ནས་གཙོ་བོ་༸གོང་མཆོག་གིས་འདོན་གནང་མཛད་པའི་གཉིས་སྨན་དབུ་མའི་ལམ་གྱི་དགོངས་དོན་དེ་ཉིད་རྒྱ་རིགས་ཀྱི་སྤྱི་ཚོགས་ནང་གསལ་པོ་ཤེས་ཐབས་ཀྱི་འབད་བརྩོན་གང་ཐུབ་ཞུ་རྒྱུ་ཡིན་པ་མ་ཟད། བོད་རྒྱ་མི་རིགས་གཉིས་དབར་ཡིད་ཆེས་དང་འཆམ་མཐུན་གོང་སྤེལ་གཏོང་རྒྱུ་ཡིན་ཞེས་སྐོར་འགྲེལ་བརྗོད་གནང་འདུག ཡང་སྐུ་ཞབས་ཡང་ཅི་ལིས་མུ་མཐུད་ནས་བརྗོད་དོན། ཐེངས་འདིར་བཞུགས་མོལ་ཚོགས་འདུའི་ནང་མཐོ་རིམ་སློབ་ཕྲུག་ཚོའི་ཡིག་རྒྱུགས་ཀྱི་དུས་ཚོད་དང་དེ་བཞིན་རྒྱ་ནག་སྐམ་ས་ཆེན་པོ་ནས་ཡིན་པའི་རྒྱ་རིགས་ཚོ་ཚོགས་འདུའི་ནང་ཡོང་རྒྱུར་ཞེད་སྣང་ཡོད་པའི་དུས་ཚོད་ཞིག་འཁེལ་ཡོད་སྟབས། ད་ལྟ་ཚོགས་འདུའི་ནང་མི་ཇི་ཙམ་སླེབས་ཐུབ་མིན་གསལ་པོ་ཤེས་ཀྱི་མེད་ནའང་ཉུང་མཐར་རྒྱ་རིགས་མི་གྲངས་སུམ་ཅུ་ནས་ལྔ་བཅུ་བར་ཚོགས་འདུ་འདིར་མཉམ་བཞུགས་ཐུབ་པའི་རེ་བ་བྱེད་ཀྱི་ཡོད་ཅེས་བརྗོད་འདུག རྒྱ་རིགས་མང་གཙོ་དོན་གཉེར་བ་ཡང་ཅི་ལི་ནི་རྒྱ་རིགས། Initiative for China ཞེས་པའི་ཚོགས་པ་དེའི་ཚོགས་གཙོ་ཡིན་པ་དང་། ཚོགས་པ་དེས་ཞི་བའི་ལམ་ནས་རྒྱ་ནག་མང་གཙོ་ཅན་དུ་བསྒྱུར་ཐབས་ཆེད་རྒྱལ་སྤྱིའི་ནང་ལས་འགུལ་སྣ་མང་སྤེལ་མུས་ཡིན་པ་བཅས། །
