༢༠༡༥ ཟླ་ ༥ ཚེས་ ༢༩ རེས་གཟའ་པ་སངས།
༄༅། །ཕྱི་ལོ་ ༢༠༡༥ ཟླ་ ༥ ཚེས་ ༢༨ རེས་གཟའ་ཕུར་བུའི་ཕྱེད་ཡོལ་ཆུ་ཚོད་ ༣ ཐོག་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་ཤེས་རིག་བཀའ་བློན་དངོས་གྲུབ་ཚེ་རིང་མཆོག་དང་དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་དངོས་གྲུབ་རྡོ་རྗེ་ལགས་རྣམ་གཉིས་ཉེ་ལམ་བལ་ཡུལ་ཁུལ་དུ་ཕེབས་ནས་ས་ཡོམ་གྱི་གོད་ཆག་འོག་དཀའ་སྡུག་མྱོང་བཞིན་པའི་རང་རིགས་བོད་རིགས་སྤུན་ཟླ་རྣམས་ཀྱི་གནས་སྟངས་གཟིགས་ཞིབ་གནང་བའི་གནད་དོན་ཐོག་གསར་འགོད་གསལ་བསྒྲགས་སྤེལ་སྐབས་གསར་འགོད་པ་ཁག་གཅིག་གིས་དྲི་བར་ལན་འདེབས་ཞིབ་ཕྲ་གནང་ཡོད།
དེ་ཡང་གསར་འགོད་པའི་དྲི་བར་དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་དངོས་གྲུབ་རྡོ་རྗེ་ལགས་ཀྱིས་ལན་འདེབས་གནང་དོན། ངས་སྤོག་རཱ་ཁུལ་དུ་ཕྱིན་པ་ཡིན། སྟབས་ལེགས་པ་ཞིག་ལ་སྤོག་རཱ་ཁུལ་དུ་དགོན་སྡེ་ཁག་དང་། སྤྱི་ཁང་། གཞིས་ཁང་སོགས་ལ་སེར་ཀ་གས་པ་ཙམ་མ་གཏོགས་གནོད་སྐྱོན་ཤུགས་ཆེ་ཕོག་མི་འདུག རཱ་སུ་ཝ་རྫོང་ཁོངས་སུ་ཡོད་པའི་བོད་མི་གནས་སྡོད་བྱེད་སའི་ས་ཁག་ལྔའི་ནང་ཕྱིན་པ་ཡིན། ཤབ་རུ་དེ་ཁྲོམ་གཞུང་ལྟེ་བ་རེད་འདུག ཁུལ་དེར་ང་ཚོའི་གཞིས་ཆགས་ཀྱི་སློབ་གྲྭ་དང་གཞིས་ཁང་བཅུ་ཙམ་ཡོད་པ་ཆ་ཚང་མེད་པ་ཆགས་འདུག དེ་ནས་ཡར་ཐེམ་པོ་ཆེ་ Thempoche ཟེར་བའི་ས་གནས་དེར་གནོད་འཚེ་གང་ཙམ་ཕོག་འདུག་པ་ལས་རྩ་མེད་དུ་ཕྱིན་མེད། འོན་ཀྱང་ཞིགས་གསོ་བྱ་རྒྱུ་མང་པོ་འདུག་པ་དེ་དག་ཛ་དྲག་ཐོག་ནས་བྱེད་དགོས་འདུག
འབྱུང་འགྱུར་བྱེད་སྒོའི་ཐོག་སང་གནངས་གང་རུང་ཞིག་ལ་བསྐྱར་དུ་གསལ་བསྒྲགས་སྤེལ་རྒྱུ་རེད། འོན་ཀྱང་དེའི་ཐོག་ལ་ཐོར་ཞིག་ཕྱིན་ཏེ་བཟོ་བཅོས་བྱེད་དགོས་ཁག་ལ་བཟོ་བཅོས་རྒྱག་རྒྱུ་དང་། ད་ལྟ་གནས་སྐབས་རིང་སྡོད་ཁང་དཀའ་ངལ་ཡོད་མཁན་རྣམས་སྡོད་གུར་དང་། འཕྲལ་གསལ་སྡོད་ཁང་གསར་འཛུགས་བྱ་རྒྱུའི་འཆར་གཞི་སྒྲིག་བཞིན་པ་མ་ཟད། བཀའ་ཤག་ངོས་ནས་ཐུགས་འཚབ་ཆེ་ཤོས་དེ་རིང་མིན་ཟླ་བ་དྲུག་པའི་ནང་ཆར་དུས་འགོ་འཛུགས་རྒྱུ་ཡིན་སྟབས། དེའི་ཐོག་བཀའ་ཤག་ངོས་ནས་གྲ་སྒྲིག་ཞུ་བཞིན་ཡོད། ཅེས་གསུངས།
དེ་བཞིན་ཤེས་རིག་བཀའ་བློན་མཆོག་ལ་བལ་ཡུལ་ནང་ས་ཡོམ་བྱུང་རྗེས་རྒྱ་ནག་གཞུང་གིས་བལ་ཡུལ་གཞུང་ཚབ་བརྒྱུད་མཆོད་རྟེན་ཁུལ་གྱི་བོད་མི་ཚོར་རོགས་དངུལ་སྤྲད་ཡོད་ཚུལ་བསྒྲགས་པ་དེའི་ཐད་བོད་མིའི་སྒྲིག་འཛུགས་ལ་གཟིགས་ཚུལ་གང་འདྲ་ཡོད་མེད་དྲིས་པར་ཁོང་གིས་གསུང་དོན། སྤྱིར་བཏང་ང་རང་བལ་ཡུལ་ནང་ཉིན་གཉིས་དང་ཕྱེད་ཀའི་རིང་བསྡད་པ་ཡིན། ཆབ་སྲིད་ཐོག་ནས་དཀའ་ངལ་ཞིག་འཕྲད་ཀྱི་རེད་བསམས་ནས་བལ་ཡུལ་ནང་བསླེབས་མ་ཐག་བོད་མི་ཚོའི་གནས་སྟངས་གང་མགྱོགས་རྟོགས་ཞིབ་བྱ་ཐབས་བྱས་པ་ཡིན། བོད་མིའི་སློབ་གྲྭ་དང་བཟོ་གྲྭ་ཁག་ནང་ཕྱིན་ནས་རྟོགས་ཞིབ་གང་ཡོང་བྱས་པ་ཡིན། བལ་ཡུལ་མཆོད་རྟེན་གཡས་གཡོན་ལ་རྒྱ་ནག་གཞུང་གིས་རོགས་རམ་དང་སྐྱོབ་གསོ་དེ་འདྲ་སྤྲད་པ་རེད་ཟེར་བ་ཞིག་མ་གཏོགས་དོན་དངོས་ལ་གུར་སོགས་མངོན་གསལ་དོད་པོ་དེ་ཙམ་མཐོང་རྒྱུ་མི་འདུག
འོན་ཀྱང་རྒྱ་ནག་གཞུང་གི་གུར་རེད་ཟེར་བ་དེ་འདྲ་མང་པོ་ཞིག་རྒྱལ་པོའི་ཕོ་བྲང་དང་སིངྒ་ཌར་བྷར་ཞེས་པ་ཁོང་ཚོའི་ལས་ཁུངས་ཨ་མ་ཡོད་སའི་ས་ཆ་ཆེན་པོ་དེ་ཚོའི་ནང་མཐོང་རྒྱུ་འདུག དེ་ནས་རྒྱ་ནག་གཞུང་གིས་དེ་སྔ་བོད་ནས་ཚུར་གཉེན་འཕྲད་ལ་ཡོང་མཁན་ཚོར་བར་ལམ་ཞིག་ནས་ཕྱིར་ལོག་བྱ་རྒྱུའི་འགྲོ་སྐྱོད་ལག་ཁྱེར་བཀག་ཡོད་པ་རྣམས་ལ། བར་སྐབས་ཤིག་ནས་ཚང་མར་སྤྲད་པ་རེད་ཟེར་བ་ཞིག་གོ་རྒྱུ་འདུག ངས་མཐོང་བ་ནི་དགོན་པ་གྲྭ་ཚང་ཚོས་རོགས་རམ་ཤུགས་ཆེན་པོ་གནང་གི་འདུག དཔེར་ན། བཤད་སྒྲུབ་གླིང་དགོན་པས་བལ་སྒོར་འབུམ་ ༤༠༠ ལྷག་གི་འགྲོ་སོང་བཏང་སྟེ། ཡུལ་མི་དང་བོད་མི་ཚོར་རོགས་རམ་གནང་འདུག་པ་མ་ཟད། ཞི་ཆེན་དགོན་པ་དང་ཀོ་པན་དགོན་པས་བལ་སྒོར་འབུམ་ ༡༠༠ ལྷག་དང་། དེ་བཞིན་དགེ་ལུགས་དགོན་པ་བཅུ་ལྷག་གིས་ཐུན་མོང་ཐོག་ནས་རོགས་དངུལ་གནང་བ་སོགས་མི་རྒྱུ་གཉིས་ཀྱིས་ཐོག་ནས་རོགས་རམ་གནང་བར་བརྟེན། ད་ཆ་ཡུལ་མི་ཚོས་བླ་མ་དང་གྲྭ་པ་ཚོར་མཐོང་ཕྱོགས་བཟང་དུ་ཕྱིན་ཡོད་ས་རེད།
བལ་ཡུལ་ཁུལ་དུ་བསྐྱར་གསོ་བྱ་རྒྱུའི་ལས་ཀ་དེ་ལས་ཀ་ཤུགས་ཆེན་པོ་ཆགས་ཀྱི་འདུག གང་ཡིན་ཟེར་ན། ད་ལྟ་ང་ཚོར་ཐོ་གཞུང་འབྱོར་བ་དང་དོན་གཅོད་ནས་གསུངས་པ་ལྟར་ན། ས་ཡོམ་ཁྲོད་ཁྱོན་བོད་མི་ ༡༣ འདས་གྲོངས་ཕྱིན་འདུག ནང་མི་ཞིག་འདས་གྲོངས་ཕྱིན་པ་ཡིན་ན་བལ་སྒོར་ཁྲི་ ༥ དང་ནང་མི་གཅིག་ལས་མང་བ་འདས་གྲོངས་སུ་གྱུར་བ་ཡིན་ན་བལ་སྒོར་འབུམ་གཅིག་སྤྲོད་ཀྱི་ཡོད། ལས་དོན་དེ་དག་ས་གནས་ཀྱི་ཛ་དྲག་ཚོགས་ཆུང་ཞིག་དོན་གཅོད་དབུ་བཞུགས་ཐོག་བཙུགས་པ་ཁོང་ཚོས་གནང་བཞིན་ཡོད། ཁང་པ་གཏོར་སྐྱོན་བྱུང་བ་ཡིན་ན་སྔོན་ལ་བལ་སྒོར་ཁྲི་རེ་རེ་འབུལ་རྒྱུ་དང་། བཟའ་བཅའ་དང་གུར་སོགས་ས་གནས་འགོ་འཛིན་རྣམ་པས་ཐབས་ཤེས་གནང་སྟེ་ལྟ་རྟོག་ཡག་པོ་གནང་འདུག ཛ་དྲག་དེ་ཚོ་གྲས་གང་ཙམ་ལྷིང་འཇགས་པ་ལྟ་བུ་འདུག འོན་ཀྱང་ཇོ་ལ་ཁེལ་བཟོ་གྲྭར་ཆ་བཞག་ན། ལས་ཁུངས་དང་ཚོང་བཅོལ་འཇོག་སའི་ཁང་པའི་ཀ་བར་སྐྱོན་ཆ་ཆེན་པོ་ཤོར་ནས་བེད་སྤྱོད་གཏོང་རྒྱུར་དཀའ་ངལ་ཆགས་ཏེ་ང་ཚོ་དེའི་ནང་བཏང་མ་སོང་། ཁང་པ་དེའི་ཀ་བའི་ལྕགས་སྐྱོན་ཤོར་སྟབས། དེའི་ནང་ཕྱིན་ཚེ་ཁང་པ་རྡིབ་པའི་ཉེན་ཁ་ཡོད་རེད་ཅེས་བརྗོད་ཀྱི་འདུག དེ་དག་ཉམས་གསོ་ཙམ་མིན་པར་གསར་བཟོ་བྱེད་དགོས་ན་འགྲོ་གྲོན་འབུམ་ ༨༠༠ ལྷག་ཙམ་འགྲོ་ས་རེད། དེ་བཞིན་སྲོང་བཙན་སློབ་གྲྭའི་འཛིན་ཁང་ ༢༠ བྱས་པའི་ཐོག་ཁང་ལ་གནོད་སྐྱོན་ཆེན་པོ་ཕོག་ཡོད་པ་མ་ཟད། དེའི་ཉེ་འཁྲིས་སུ་ཡོད་པའི་ལས་ཁུངས་ཆེན་པོ་ཞིག་ཡོད་པ་དེ་ཡང་འཕྲོ་བརླག་ཏུ་ཕྱིན་འདུག
དེ་ཚོ་གྲས་བསྐྱར་དུ་ས་ཡོམ་གྱི་ཉེན་ཁ་ཆེན་པོ་ཡོད་ན་དེ་ཚོར་བཀག་སྡོམ་ཆེད་དབྱིན་སྐད་ཐོག་ retrofit ཞེས་པ་ལྟ་བུའི་འཆར་གཞི་སྒྲིག་སྟེ་བཟོ་བཅོས་བྱེད་དགོས་ཀྱི་འདུག རྣམ་རྒྱལ་འབྲིང་སློབ་དང་མཐོ་སློབ་གཉིས་ཀར་སྐྱོན་གང་ཙམ་ཞིག་དང་། ཆོས་ཟུར་གྱི་ཁྱིམ་ཚང་ ༣༧ གྱི་སྡོད་ཁང་ཧ་ཅང་ཆེན་པོ་ཞིག་ཡོད་པ་དེ་ལའང་སྐྱོན་ཆ་ཆེན་པོ་ཤོར་ཡོད་སྟབས། དེ་ཚོ་བཟོ་བཅོས་བྱ་རྒྱུར་ཡུན་རིང་འགོར་རྒྱུ་ཡིན་སྟབས། ཁོང་ཚོར་འཕྲལ་གསལ་གྱི་སྡོད་ཁང་གྲ་སྒྲིག་གང་འདྲ་བྱེད་དགོས་མིན་དང་། དེ་བཞིན་སློབ་གྲྭ་ཡིན་ན་འཕྲལ་གསལ་གྱི་སློབ་གྲྭ་ཚོགས་ས་གོ་སྒྲིག་ཞུ་དགོས་ཀྱི་ཡོད་མེད་ཀྱི་འཆར་གཞིའི་ཐོག་འགྲོ་གྲོན་གང་ལ་གང་ཙམ་ཞིག་འགྲོ་རྒྱུ་དང་། ཕུགས་ཀྱི་བཟོ་བཅོས་ངོ་མ་བྱེད་སྐབས་གང་ལ་གང་ཙམ་གནས་རྒྱུའི་ལས་འཆར་ཆགས་ཀྱི་འདུག དེར་བརྟེན་དེ་ཚོའི་ཐོག་བཀའ་ཤག་ངོས་ནས་དགོངས་པ་བཞེས་བཞིན་པ་རེད། ཅེས་ཞུ་རྒྱུ་ཡིན། ཞེས་ལན་འདེབས་གནང་སོང་།།
