༢༠༡༥ ཟླ་ ༥ ཚེས་ ༡༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༥ ཟླ་ ༥ ཚེས་ ༤ ཉིན་བོད་མིའི་སྒྲིག་འཛུགས་ཕྱི་དྲིལ་སལ་ཁུངས་དང་ཨ་རིའི་རོགས་ཚོགས་གཉིས་ཐུན་མོང་གིས་གོ་སྒྲིག་འོག བོད་མིའི་སྒྲིག་འཛུགས་ཀྱི་ཕྱི་རྒྱལ་སྐུ་ཚབ་དོན་གཅོད་དགུའི་དོན་གཅོད་དང་ལས་བྱེད་བཅས་ལ་ཨ་རིའི་ཝིར་ཇི་ནི་ཡ་མངའ་སྡེའི་ནང་ཉིན་གྲངས་བཅུའི་རིང་ཕྱི་འབྲེལ་སྲིད་བྱུས་དང་འབྲེལ་བའི་ཟབ་སྦྱོང་གནང་འགོ་བཙུགས་འདུག ཟབ་སྦྱོང་འདི་ཨིན་ཡུལ་སྐུ་ཚབ་དོན་ཁང་གི་དཔལ་འབྱོར་མཐུན་འགྱུར་འོག་ཨ་རིའི་སྐུ་ཚབ་དོན་ཁང་གིས་གོ་སྒྲིག་གནང་ཡོད། དེ་ཡང་ཟབ་སྦྱོང་དབུ་འབྱེད་ཀྱི་མཛད་སྒོར་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་གསུང་བཤད་གནང་དོན། ཕྱི་དྲིལ་ལས་ཁུངས་ངོས་ནས་སྐུ་ཚབ་དོན་ཁང་གི་ལས་བྱེད་རྣམས་ལ་ཟབ་སྦྱོང་འདི་བརྒྱུད་ཕྱི་ལ་འབྲེལ་བ་བྱེད་སྟངས་ཐོག་མཐོང་རྒྱ་ཐོས་རྒྱ་ཆེ་རུ་ཕྱིན་ནས་ཕན་ཐོགས་ཆེན་པོ་ཡོང་བའི་རེ་བ་ཞུ་བཞིན་ཡོད། དེ་རིང་གོ་སྒྲིག་གནང་མཁན་ཚོས་དེ་སྔའི་ཨ་རིའི་ཤེས་ལྡན་མི་སྣ་དང་གཞུང་གི་ལས་བྱེད་ཉམས་མྱོང་ཧ་ཅང་ཡོད་པ་ད་ཆ་བགྲེལ་ཡོལ་དུ་ཕེབས་ཟིན་པ་ཁག་གཅིག་སློབ་སྟོན་པར་གདན་ཞུ་གནང་ཐུབ་པ་ནི་བསྔགས་འོས་སུ་གྱུར།
ཞེས་སོགས་ཀྱི་གསུང་བཤད་གནང་། ཐེངས་འདིའི་ཟབ་སྦྱོང་སྐབས་བརྗོད་གཞི་གཙོ་བོ་རྣམས་ནི། གཞན་དང་འབྲེལ་མོལ་གནང་སྟངས་དང་། ཕྱིའི་རྒྱལ་ཁབ་ཁག་དང་འཛམ་གླིང་མཉམ་སྦྲེལ་རྒྱལ་ཚོགས། དེ་བཞིན་རྒྱལ་སྤྱིའི་འབྲེལ་ལམ་དང་། རང་བྱུང་ཐོན་སྐྱེས་དང་འགྲོ་བ་མིའི་ཐོབ་ཐང་སྲུང་སྐྱོབ། དེ་བཞིན་བདེ་སྲུང་ལས་དོན་སོགས་ཀྱི་ཐད་ཕྱི་འབྲེལ་སྲིད་བྱུས་ལག་བསྟར་གནང་ཕྱོགས་སྐོར་སོགས་ཡིན་འདུག ཟབ་སྦྱོང་སྐབས་ཟབ་སྦྱོང་བ་རྣམས་ཀྱིས་ཨ་རི་བོད་ཀྱི་རླུང་འཕྲིན་ཁང་གི་བོད་སྐད་སྡེ་ཚན་དང་། ཨེ་ཤི་ཡ་རང་དབང་རླུང་འཕྲིན་ཁང་། རྒྱལ་སྤྱིའི་བོད་དོན་ལས་འགུལ་ཁང་། དེ་བཞིན་ཝ་ཤིང་ཊོན་བོད་རིགས་སྤྱི་མཐུན་ཚོགས་པ་བཅས་ལ་ལྟ་སྐོར་དུ་བསྐྱོད་ཡོད་འདུག་པ་བཅས།།
