༢༠༡༥ ཟླ་ ༥ ཚེས་ ༦ རེས་གཟའ་ལྷག་པ།
༄༅། །བརྒྱུད་ལམ་ཁག་ནང་གནས་ཚུལ་སྤེལ་བ་ལྟར་ན། རྒྱ་ནག་གཞུང་གིས་ཕྱི་ལོ་ ༢༠༡༠ ཟླ་ ༥ ཚེས་ ༡ ཉིན་རྒྱ་ནག་གཞུང་གིས་བོད་མི་བསམ་གྲུབ་རྒྱ་མཚོ་ལགས་ལ་རྒྱལ་ཁབ་ཁ་བྲལ་གྱི་བྱ་སྤྱོད་སྤེལ་བའི་ཉེས་མིང་འོག་དམ་བསྒྲགས་བཀག་དཀྱིལ་བྱས་རྗེས་ལོ་ལྔའི་བཙོན་འཇུགས་ཀྱི་ཁྲིམས་ཐག་བཅད་ནས་གྲྭ་བཞིའི་བཙོན་ཁང་དུ་བཅུག་འདུག ཁྲིམས་ཆད་ཀྱི་དུས་ཚོད་ལོ་ལྔ་གཙང་རྗེས་རྒྱ་ནག་གཞུང་གིས་ཁོང་གསང་བའི་ཐོག་གློད་བཀྲོལ་བྱས་པར་བརྟེན། ཁོང་གི་ནང་མི་སྤུན་མཆེད་དང་དེ་བཞིན་ས་གནས་མང་ཚོགས་རྣམས་ཀྱིས་ཤེས་རྟོགས་གང་ཡང་བྱུང་མེད།
སྤྱིར་བསམ་གྲུབ་རྒྱ་མཚོ་ལགས་ནི་ད་ཆ་རང་ལོ་སུམ་ཅུའི་ནང་ཡིན་འདུག་པ་དང་། ཁོང་གིས་ཕྱི་ལོ་ ༢༠༡༠ ཟླ་ ༥ ཚེས་ ༡ ཉིན་༸གོང་ས་མཆོག་བོད་དུ་གདན་ཞུ་དགོས་པ་དང་། པཎ་ཆེན་ཆུང་སྲིད་རིན་པོ་ཆེ་མཆོག་གློད་བཀྲོལ་དགོས་པ། དེ་བཞིན་སྐྱེས་དགུ་མདོར་ས་ཡོམ་གྱི་གོད་ཆག་ཕོག་རྗེས་བོད་མིའི་ས་ཞིང་རྒྱ་ནག་གཞུང་གིས་བཙན་འཕྲོག་བྱས་པ་རྣམས་བོད་མིར་རྩིས་སྤྲོད་བྱེད་དགོས་པ་སོགས་སྐད་འབོད་བརྒྱབ་ནས་ལྷ་ས་ཇོ་ཁང་གི་མདུན་དུ་ཞི་རྒོལ་རྔམ་སྟོན་གནང་འདུག ཁོང་ཕྱི་ལོ་ ༢༠༠༧ ལོར་རྒྱ་གར་དུ་ཕེབས་ནས་ལོ་གཉིས་རྗེས་ཕྱི་ལོ་ ༢༠༠༩ ལོར་བོད་དུ་ཕྱིར་ལོག་གནང་འདུག ཕྱིས་སུ་ཁོང་ལ་ཉེས་འཛུགས་བྱེད་སྐབས་རྒྱ་ནག་གཞུང་གིས་ཁོང་རྒྱ་གར་ནས་༸གོང་ས་མཆོག་གི་བཀའ་སློབ་དཔེ་དེབ་གསང་བའི་ཐོག་ནས་བོད་ནང་འོར་འདྲེན་བྱས་པའི་ཉེས་འཛུགས་བྱས་འདུག
ཕྱོགས་མཚུངས་རང་ལོ་ ༢༩ སོན་པ་འཇིགས་མེད་བསམ་གཏན་ལགས་ཀྱང་བཙོན་དུས་ཡོངས་སུ་གཙང་རྗེས་རྒྱ་ནག་གཞུང་གིས་ཕྱི་ལོ་ ༢༠༡༥ ཟླ་ ༥ ཚེས་ ༣ ཉིན་གློད་བཀྲོལ་བཏང་འདུག ཁོང་ནི་ཀན་སུ་ཞིང་ཆེན་གྱི་ཀན་ལྷོ་བོད་རིགས་རང་སྐྱོང་ཁུལ་ནས་ཡིན་འདུག་པ་དང་། ཁོང་གིས་དེ་སྔ་ཕྱི་ལོ་ ༢༠༠༨ ལོར་བོད་ལ་རང་དབང་དགོས་པ་དང་༸གོང་ས་མཆོག་བོད་དུ་གདན་འདྲེན་ཞུ་དགོས་པའི་རེ་འདུན་འོག ཞི་རྒོལ་རྔམ་སྟོན་གྱི་ལས་འགུལ་སྤེལ་སྟབས་རྒྱལ་ཁབ་ཁ་བྲལ་གྱི་བྱ་ངན་སྤེལ་བར་བསྙད་ནས་འཛིན་བཟུང་བྱ་རྒྱུའི་བཀའ་རྒྱ་བསྒྲགས་སྟབས་ལོ་གསུམ་རིང་གསང་ཡིབ་བྱ་ནས་བཞུགས་དགོས་ཐུག་ཀྱང་། མཐར་ཕྱི་ལོ་ ༢༠༡༡ ཟླ་ ༨ ཚེས་ ༢ ཉིན་རྒྱ་ནག་གཞུང་གིས་ཁོང་འཛིན་བཟུང་བཙོན་འཇུག་བྱས་འདུག སྤྱིར་ཁོང་ནི་ཀན་སུའུ་ཞིང་ཆེན་བསང་ཆུ་རྫོང་རྔོག་རྒྱལ་མོ་དགོན་གྱི་དགེ་འདུན་པ་ཞིག་ཡིན་འདུག གློད་བཀྲོལ་རྗེས་ཁོང་རང་ཁྱིམ་དུ་ཕེབས་སྐབས་ལམ་དུ་མང་ཚོགས་རྣམས་ཀྱིས་ལག་ཏུ་དཀར་གཙང་མཇལ་དར་ཐོགས་ནས་དགའ་བསུ་ཞུས་འདུག
