༢༠༡༥ ཟླ་ ༥ ཚེས་ ༡༧ རེས་གཟའ་ཉི་མ།
༄༅། །དེ་རིང་གི་ཉིན་མོ་འདིར་འཛམ་གླིང་ཁྱོན་ཡོངས་སུ་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་གཞིས་ལུས་བོད་མི་རྣམས་ཀྱི་ཞུམ་པ་མེད་པའི་སྙིང་སྟོབས་དང་ལྷག་བསམ་ལ་རྒྱབ་སྐྱོར་མཚོན་ཆེད་རྒྱལ་སྤྱིའི་བོད་དོན་གདུང་སེམས་མཉམ་སྐྱེད་ཉིན་མོར་སྲུང་བརྩི་ཞུ་བཞིན་ཡོད། དེར་བརྟེན་གཞིས་ལུས་བོད་མི་རྣམས་ཀྱིས་རང་དབང་དང་དྲང་བདེན་ཆེད་འཐབ་རྩོད་མུ་མཐུད་གནང་བཞིན་པ་དེར་ང་ཚོའི་ཆོད་སེམས་དང་རྒྱབ་སྐྱོར་གྱི་ནུས་པ་སླར་གསོ་ཙམ་མ་ཟད། གོང་ནས་གོང་དུ་སྤེལ་རྒྱུའི་དུས་ཚོད་ཅིག་ཡིན།
བོད་མི་རྣམས་རྒྱ་ནག་གཞུང་གིས་དབང་སྒྱུར་འོག་བརྗོད་མི་ཐུབ་པའི་དཀའ་སྡུག་མྱངས་དང་མྱོང་བཞིན་ཡོད། ལྷག་པར་དུ་རྒྱ་ནག་གཞུང་གིས་བོད་མིའི་ཆོས་དད་དང་ཆབ་སྲིད་རང་དབང་ཐོག་དམ་བསྒྲགས་བྱས་པ་དང་། བོད་མིའི་རིག་གཞུང་དང་ཁོར་ཡུག་གཏོར་བཤིག་བཏང་བ། བོད་མི་རྣམས་རྒྱ་ནག་གཞུང་གིས་དཔལ་འབྱོར་ཟུར་འབུད་དང་མི་རིགས་དབྱེ་འབྱེད་བྱས་པ་སོགས་ལ་བརྟེན་ནས་ཕྱི་ལོ་ ༢༠༠༩ ནས་ད་བར་བོད་མི་ ༡༣༨ རང་ལུས་མེར་སྲེག་བཏང་ཡོད། དེ་ནི་བོད་མི་རྣམས་ཀྱིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་བོད་ནང་དམ་བསྒྲགས་ཅན་གྱི་སྲིད་བྱུས་ལག་བསྟར་བྱེད་བཞིན་པ་དེར་མཐའ་གཅིག་ཏུ་ངོ་རྒོལ་བྱེད་བཞིན་ཡོད་པ་མཚོན།
འདི་ལོའི་རྒྱལ་སྤྱིའི་བོད་དོན་གདུང་སེམས་མཉམ་སྐྱེའི་ཉིན་མོ་འདི་ནི་ཀུན་གཟིགས་པཎ་ཆེན་རིན་པོ་ཆེ་མཆོག་དང་ཁོང་གི་ནང་མི་རྣམས་གར་སོང་ཆ་མེད་དུ་གྱུར་ནས་མི་ལོ་ཧྲིལ་པོ་ ༢༠ འཁོར་བའི་དུས་ཚིགས་དང་སྟབས་འཁེལ་ཡོད། ཕྱི་ལོ་ ༡༩༩༥ ཕྱི་ཟླ་ ༥ ཚེས་ ༡༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགེ་འདུན་ཆོས་ཀྱི་ཉི་མ་མཆོག་ཀུན་གཟིགས་པཎ་ཆེན་སྐུ་ཕྲེང་ ༡༠ པའི་ཡང་སྲིད་དུ་ངོས་འཛིན་མཛད་ནས་ཉིན་གསུམ་གྱི་རྗེས་ཁོང་རྒྱ་གཞུང་གིས་བཙན་ཁྲིད་བྱས་ཡོད། སྐབས་དེར་ཁོང་དགུང་གྲངས་ ༦ ལས་སོན་མེད་སྟབས་འཛམ་གླིང་ནང་གི་ཆབ་སྲིད་བཙོན་པ་ལོ་ན་ཆུང་ཤོས་དེ་ཆགས་པ་རེད། དུས་སྐབས་དེ་ནས་བཟུང་ད་བར་མི་ལོ་ ༢༠ རིང་ཁོང་དང་ཁོང་གི་ནང་མི་རྣམས་ས་གནས་གང་དུ་ཡོད་མེད་ཤེས་རྟོགས་མེད་པར་གྱུར་ཡོད། རྒྱ་ནག་གཞུང་ནས་༸གོང་ས་མཆོག་གིས་ངོས་འཛིན་མཛད་པའི་པཎ་ཆེན་ཆུང་སྲིད་རིན་པོ་ཆེ་བརྩིས་མེད་བཏང་སྟེ་ཁྱིའུ་གཞན་ཞིག་པཎ་ཆེན་རིན་པོ་ཆེའི་ཡང་སྲིད་དུ་བསྐོ་བཞག་བྱས་ཡོད། རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ་འདྲ་མིན་གྱིས་རྒྱ་ནག་གཞུང་ལ་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དང་ཁོང་གི་ནང་མི་རྣམས་གང་དུ་ཡོད་མེད་གནས་སྟངས་ཇི་ཡིན་སྐོར་གསལ་བཤད་དགོས་པའི་རེ་འདུན་ཇི་ཙམ་གནང་ཡོད་ཀྱང་རྒྱ་ནག་གཞུང་གིས་དེར་ཡར་ལན་རྩ་བ་ནས་བྱས་མེད།
སྤྱིར་རྒྱ་ནག་གཞུང་གིས་ཀུན་གཟིགས་པཎ་ཆེན་རིན་པོ་ཆེ་མཆོག་བཙན་འཁྱེར་བྱས་ཡོད་པ་ངོས་ལེན་བྱས་ཡོད་ཀྱང་། ཁོང་གང་དུ་ཡོད་མེད་དང་ཁོང་གི་གནས་སྟངས་ཇི་ཡིན་ཐོག་ད་བར་གསང་བ་བྱེད་བཞིན་ཡོད། བྱེད་སྟངས་དེ་ནི་ཆོས་མེད་སྨྲ་བའི་རྒྱ་ནག་གུང་ཁྲན་ཏང་གིས་ལོ་ངོ་བརྒྱ་ཕྲག་སོང་བའི་བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་འཚོལ་ཞིབ་བྱ་རྒྱུའི་ལམ་ལུགས་དེར་བཙན་ཤེད་འོག་དབང་སྒྱུར་བྱས་ནས་ཁྲིམས་མཐུན་བཟོ་ཐབས་བྱས་པ་ཞིག་ཡིན། ཀུན་གཟིགས་པཎ་ཆེན་ཡང་སྤྲུལ་མཆོག་བོད་མིའི་ཆོས་ཕྱོགས་ཀྱི་དབུ་ཁྲིད་ཅིག་ཡིན་སྟབས། བརྒྱུད་པའི་བླ་མ་གོང་མ་རྣམས་ཀྱི་དྲུང་ནས་དབང་ལུང་ཁྲིད་གསུམ་སོགས་ཀྱི་གདམས་པ་མང་པོ་གསན་བསམ་མཛད་དགོས་པར་བརྟེན། རྒྱ་ནག་གཞུང་གིས་ཆབ་སྲིད་ཀྱི་གནོན་ཤུགས་གང་ཡང་མེད་པའི་སྒོ་ནས་ཁོང་ལ་གོ་སྐབས་ངེས་པར་དུ་འབུལ་དགོས།
དེ་རིང་གི་ཉིན་མོ་དང་བསྟུན། ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གིས་གཙོས་བོད་ནང་གི་བོད་མི་ཆབ་སྲིད་བཙོན་པ་ཡོངས་རྫོགས་གློད་བཀྲོལ་ཐོབ་ཆེད་རྒྱབ་སྐྱོར་གནང་རོགས་ཞེས་ང་ཚོས་རྒྱལ་སྤྱིའི་སྤྱི་ཚོགས་ཁྱོན་ཡོངས་ལ་འབོད་སྐུལ་ཞུ་རྒྱུ་དང་། ང་ཚོས་གཞིས་ལུས་བོད་རིགས་སྤུན་ཟླ་ཕོ་མོ་རྣམས་ལ་གདུང་སེམས་མཉམ་སྐྱེའི་རྒྱབ་སྐྱོར་ཞུས་པ་དང་སྦྲགས་བོད་དོན་བདེན་མཐའ་མྱུར་དུ་གསལ་བའི་སྨོན་འདུན་ཞུ་རྒྱུ་ཡིན།།
