༢༠༡༥ ཟླ་ ༥ ཚེས་ ༢༩ རེས་གཟའ་པ་སངས།
༄༅། །ཕྱི་ལོ་ ༢༠༡༥ ཟླ་ ༥ ཚེས་ ༢༩ ཉིན་རྡ་ས་ས་གནས་རང་བདེན་ཚོགས་ཆུང་གི་ཚོགས་གཙོ་བསྟན་འཛིན་ཆོས་འཕེལ་ལགས་དང་། བོད་ཀྱི་སྨན་རྩིས་ཁང་གི་ལུས་སེམས་སྲོག་གི་སྡེ་ཚན་འགན་འཛིན་དགེ་བཤེས་བསྟན་པ་བཀྲ་ཤིས་ལགས་རྣམ་གཉིས་ལ་བཙན་བྱོལ་བོད་མིའི་བཅའ་ཁྲིམས་དགོངས་དོན་ལྟར། དབུས་འོས་བསྡུ་ལས་ཁུངས་ཀྱི་འགན་འཛིན་ལས་འཕར་དུ་སྤྱི་མོས་ཐོག་བདམས་ཐོན་བྱུང་འདུག
དེ་ཡང་དཔལ་ལྡན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གསུང་དོན། སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་དང་། སྐབས་ ༡༥ པའི་བཀའ་ཤག་གི་སྲིད་སྐྱོང་འོས་བསྡུ་ཆེན་མོ
འི་ལས་རིམ་བསླེབས་ལ་ཉེ་བར་བརྟེན། ཟླ་ཤས་སྔོན་ལ་བཅའ་ཁྲིམས་དང་སྒྲིག་གཞི་ཁག་གི་དགོངས་དོན།
མང་གཙོའི་ཀ་བ་གསུམ་གྱི་མཛད་གཙོ་རྣམ་པ། དཔལ་ལྡན་ཁྲིམས་ཞིབ་པ་ཆེ་བ་མཆོག་དང་། སྤྱི་འཐུས་ཚོགས་གཙོ་ཚོགས་གཞོན། དཔལ་ལྡན་སྲིད་སྐྱོང་མཆོག་བཅས་འཛོམས་ནས་ཚོགས་ཆུང་བཙུགས་གནང་བ་རེད། ཚོགས་ཆུང་དེའི་མི་འགྲོ་བཏོན་གནང་དགོས་ཀྱི་ཡོད། ཚོགས་ཆུང་དེའི་ནང་བཀའ་ཟུར་ཀིརྟི་རིན་པོ་ཆེ་མཆོག་དང་། དེ་སྔའི་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག འོས་བསྡུའི་འགན་འཛིན་ཟུར་པ་འཇམ་དཔལ་ཆོས་བཟང་མཆོག་བཅས་ལས་གྲུབ་པའི་ཚོགས་ཆུང་བསྐོ་གཞག་གནང་ནས་ཕྱི་ལོ་ ༢༠༡༥ ཟླ་ ༥ ཚེས་ ༡༥ ཉིན་འོས་གཞི་རྣམས་སྲིད་སྐྱོང་ལས་ཁུངས་སུ་འབུལ་དགོས་ཞེས་བཀོད་ཁྱབ་གནང་བ་བཞིན།
ཁོང་རྣམས་ལྷན་འཛོམས་ཀྱིས་སྲིད་སྐྱོང་ལས་ཁུངས་སུ་ཕྱི་ཟླ་ ༥ ཚེས་ ༡༥ སྔོན་ལ་འོས་གཞི་ཕུལ་འདུག དེ་རིང་ཕྱི་ལོ་ ༢༠༡༥ ཟླ་ ༥ ཚེས་ ༢༩ ཉིན་བོད་མི་མང་སྤྱི་འཐུས་རྒྱུན་ལས་ལྷན་འཛོམས་གནང་སྟེ། འོས་གཞི་དེ་དག་ཁ་ཕྱེ་བ་རེད། ཚོགས་ཆུང་གི་འོས་གཞི་བཏོན་གནང་བའི་ནང་རྡ་སར་གནས་སྡོད་བསྟན་འཛིན་ཆོས་འཕེལ་ལགས་དང་། དགེ་ཐོག་ཚང་བསྟན་འཛིན་དོན་ཡོད་ལགས། དགེ་བཤེས་བསྟན་པ་བཀྲ་ཤིས་ལགས། བསྟན་པའི་དངོས་གྲུབ་ལགས་བཅས་འོས་གཞིར་བཏོན་གནང་འདུག སྤྱི་འཐུས་རྒྱུན་ལས་ལྷན་འཛོམས་ཐོག་གོ་བསྡུར་བྱས་ནས་བསྟན་འཛིན་ཆོས་འཕེལ་ལགས་དང་། དགེ་བཤེས་བསྟན་པ་བཀྲ་ཤིས་ལགས་རྣམ་གཉིས་འོས་བསྡུའི་འགན་འཛིན་ལས་འཕར་དུ་སྤྱི་མོས་ཐོག་བདམས་ཐོན་བྱུང་སོང་ཞུ་རྒྱུ་ཡིན། ཞེས་གསུངས།།
