༢༠༡༥ ཟླ་ ༤ ཚེས་ ༡༥ རེས་གཟའ་ལྷག་པ།
༄༅། །ཕྱི་ལོ་ ༢༠༡༥ ཟླ་ ༣ ནས་ཟླ་བ་ ༤ བཅས་ཟླ་བ་གཅིག་རིང་མང་ཚོགས་ལ་འཕྲོད་བསྟེན་གོ་རྟོགས་སྤེལ་ཆེད་ཟབ་སྦྱོང་གོ་སྒྲིག་གནང་བ་མ་ཟད། གཉེན་ནད་རེག་དུག་སྐོར་གོ་རྟོགས་ལས་འགུལ་སྤེལ་འདུག ཐེངས་འདིར་ལས་འགུལ་གོ་སྒྲིག་ཞུ་དགོས་དོན་གཙོ་བོ་ནི་འབྲེལ་ཡོད་ས་གནས་སོ་སོའི་ནང་འཕྲོད་ལས་པ་རྣམས་ཀྱིས་མང་ཚོགས་ཁྲོད་ནད་གཞི་སྔོན་འགོག་དང་མང་ཚོགས་ཀྱི་འཕྲོད་བསྟེན་གོང་མཐོར་གཏོང་ཐབས། དེ་བཞིན་སྨན་ཁང་ཁག་ཚགས་ཚུད་ཐོག་འཛིན་སྐྱོང་གནང་ཐབས་དང་། གཞན་ཡང་བོད་མིའི་སྤྱི་ཚོགས་ཁྲོད་གཉེན་ནད་རེག་དུག་ནད་པ་སོགས་ཀྱི་དཀའ་ངལ་ཤེས་རྟོགས་དང་ནད་གཞི་དེ་དག་སྐོར་སྤྱི་ཚོགས་ཁྲོད་ལྟ་སྟངས་ལ་འགྱུར་བ་གཏོང་ཆེད་དམིགས་པ་ཞིག་ཡིན་འདུག ཕྱོགས་མཚུངས་འཕྲོད་བསྟེན་ལས་ཁུངས་ཀྱིས་ཕྱི་ལོ་ ༢༠༡༥ ཟླ་ ༣ ཚེས་ ༩ ནས་ཟླ་ ༣ ཚེས་ ༡༥ བར་བདུན་ཕྲག་གཅིག་རིང་བོད་མི་སྨན་ཞབས་པ་དང་འཕྲོད་ལས་པ། དེ་བཞིན་སྨན་པ་བཅས་ལ་རྡ་སར་ཟབ་སྦྱོང་གོ་སྒྲིག་གནང་འདུག ཐེངས་འདིར་ཟབ་སྦྱོང་ནང་འཕྲོད་བསྟེན་ལས་ཁུངས་ཀྱི་ཁྱབ་ཁོངས་འཕྲོད་བསྟེན་སྨན་ཁང་ཁག་དང་། བདེ་ལེགས་སྨན་ཁང་། དེ་བཞིན་སློབ་གྲྭ་དང་དགོན་སྡེ་ཁག་གི་སྨན་ཁང་གི་སྨན་ཞབས་པ་སོགས་ཁྱོན་མི་གྲངས་ ༥༦ མཉམ་ཞུགས་གནང་འདུག ཟབ་སྦྱོང་དབུ་འབྱེད་སྐབས་སྲིད་སྐྱོང་བློ་བཟང་སེང་གེ་མཆོག་ཕེབས་ནས་གསུང་བཤད་གནང་འདུག ཟབ་སྦྱོང་སྤྲོད་མཁན་བདེ་ལེགས་སྨན་ཁང་གི་སྨན་པ་རང་བྱུང་སྒྲོལ་མ་ལགས་དང་། 
སྨན་པ་བློ་བཟང་ཚེ་རིང་ལགས། དེ་བཞིན་བོད་ཀྱི་སྨན་རྩིས་ཁང་གི་སྨན་པ་བསྟན་འཛིན་ཡི་ཤེས་ལགས་དང་སྨན་པ་པདྨ་རྡོ་རྗེ་ལགས་བཅས་ཡིན་འདུག ཟབ་སྦྱོང་སྐབས་མཆིན་པའི་གཉན་ཚད་སྐོར་དང་ཊི་བྷི་ནད་གཞིའི་སྐོར་ཡིན་འདུག དེ་བཞིན་ཕྱི་ཟླ་ ༣ ཚེས་ ༢༨ ནས་ཉིན་གཉིས་རིང་བོད་ནས་གསར་དུ་ཕེབས་པའི་གསོག་གར་སློབ་གྲྭ་ནས་བུད་མེད་ ༣༣ ལ་གཞི་རིམ་འཕྲོད་བསྟེན་སློབ་གསོའི་ཟབ་སྦྱོང་སྤྲད་འདུག
