༢༠༡༥ ཟླ་ ༤ ཚེས་ ༢༨ རེས་གཟའ་མིག་དམར།
༄༅། །ཕྱི་ལོ་ ༢༠༡༥ ཟླ་ ༤ ཚེས་ ༢༧ ཉིན་ཕྱི་དྲིལ་རྒྱ་ཡིག་ཚན་པའི་གསར་འགོད་པ་ཡེ་ཤེས་བསྟན་འཛིན་ལགས་ཀྱིས་ས་གནས་ནས་བཏང་གནས་ནང་འཁོད་དོན།
དེ་རིང་སྔ་དྲོ་ཆུ་ཚོད་ ༩ ཐོག <<སྤྱི་དམངས་ནུས་སྟོབས་>>ཞེས་པའི་ཚོགས་པ་གསར་འཛུགས་བྱེད་མཁན་རྒྱ་མི་ཡང་ཅིན་ལིས་གཙོ་གཉེར་བྱས་པའི་ལོ་རེའི་<<མི་རིགས་གཞོན་སྐྱེས་འགོ་ཁྲིད་སྦྱོང་བརྡར་ཚོགས་འདུ་>>ཞེས་པ་ཨ་རིའི་རྒྱལ་ས་ཨ་ཤིང་ཊོན་ཉེ་འདབས་མེ་རས་ལན་ཌི་མངའ་སྡེའི་ནང་འཚོགས་ཡོད།
ཚོགས་འདུའི་མཛད་རིམ་དང་པོར་སྤྱི་དམངས་ནུས་སྟོབས་ཚོགས་གཞོན་ཧ་ལན་ཁྲའོ་ནས་ཚོགས་འདུ་ངོ་སྤྲོད་བྱས། རིམ་བཞིན་དབུས་བོད་མིའི་སྒྲིག་འཛུགས་ཨ་རི་སྐུ་ཚབ་དོན་གཅོད་དབུ་དཀར་ཚང་སྐལ་རྡོར་ལགས་ནས་༸གོང་ས་༸སྐྱབས་མགོན་ཆེན་པོ་མཆོག་གི་གསུང་འཕྲིན་སྒྲོགས་སྦྱང་གནང་བ་དང་སྲིད་སྐྱོང་བློ་བཟང་སེང་གེའི་གཏམ་བཤད་བརྙན་འཕྲིན་བརྒྱུད་བསྟན་རྗེས། རྒྱལ་སྤྱིའི་བོད་དོན་ལས་འགུལ་ཚོགས་པའི་ཚོགས་གཞོན་བུ་ཆུང་ཚེ་རིང་ལགས་དང་ཨེ་ཤི་ཡའི་བོད་དོན་འབྲེལ་མཐུད་ལས་ཁུངས་ཀྱི་ཚོགས་མི་བློ་བཟང་ཚེ་བརྟན་བཅས་ནས་བོད་དོན་སྐོར་དང་ཚོགས་པའི་གཏམ་བཤད་སྒྲོགས་སྦྱང་གནང་། དེ་བཞིན་ཡུ་གུར་སྐུ་ཚབ་ཏོ་ལུ་ཧྲིང་ཨེ་ཧྲ་དང་ལྷོ་སོག་སྐུ་ཚབ་ཆོ་ལོ་ཝུ་ཅི་ཡེ་ཏིས་བཅས་ནས་གཏམ་བཤད་གནང་།
ཕྱི་དྲོ་ཆུ་ཚོད ༡་༣༠ ནས་སྤྱི་འཐུས་སྐལ་བཟང་རྒྱལ་མཚན་གྱིས་རྒྱ་ནག་སྐམ་སའི་གཏམ་བཤད་པ་ཐེང་པེའོ་དང་ཤ་ཡེ་ལིན། ཡུ་གུར་འགྲོ་མིའི་ཐོབ་ཐང་འགན་འཛིན་གཞོན་པ་ཙུས་པེ་ལ་ཤ་མུ་ཤིས་ཏིང་གི་གཏམ་བཤད་གཙོ་སྐྱོང་གནང་།
ཆུ་ཚོད ༣་༣༠ ནས་ཡུ་གུར་ཚོགས་པའི་འགྲོ་མིའི་ཐོབ་ཐང་འགན་འཛིན་གཞོན་པ་ཙུས་པེ་ལས་གཙོ་སྐྱོང་གནང་ནས་བོད་མི་དམངས་མདོ་སྟོད་སྤྱི་འཐུས་འབའ་བ་སྐལ་བཟང་རྒྱལ་མཚན་དང་། མདོ་སྟོད་སྤྱི་འཐུས་འཇམ་དབྱངས་བཟོད་པ། བཀའ་བརྒྱུད་སྤྱི་འཐུས་བསྟན་པ་ཡར་འཕེལ། ཕྱི་དྲིལ་རྒྱ་ཡིག་སྡེ་ཚན་འགན་འཛིན་བསོད་ནམས་རྡོ་རྗེ། རྒྱལ་སྤྱིའི་བོད་དོན་ལས་འགུལ་ཁང་ཚོགས་གཞོན་བུ་ཆུང་ཚེ་རིང་། ཐའེ་ཝན་བོད་རིགས་ཚོགས་པའི་ཚོགས་གཙོ་བཀྲ་ཤིས་བཅས་ནས་བོད་སྤྱིའི་ཛ་དྲག་གནས་སྟངས་དང་། བོད་མིའི་རང་སྲེག་ངོ་རྒོལ་ལས་འགུལ། བོད་མིའི་ཆོས་དད་རང་མོས་དྲག་གནོན། རང་སྲེག་ངོ་རྒོལ་འབྱུང་རྐྱེན། བོད་མིའི་ཆབ་སྲིད་ལྟ་བ། བོད་ཀྱི་ཁོར་ཡུག་རྩ་གཏོར་བཅས་རིམ་བཞིན་གཏམ་བཤད་དང་དྲི་བར་ལན་འདེབས་གནང་ཡོད། གཞན་ཡང་དབུས་བོད་མིའི་སྒྲིག་འཛུགས་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་དང་། རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་འགན་འཛིན་གཞོན་པ་བསྟན་ཆོས་རྒྱ་མཚོ། ཕྱི་དྲིལ་ལས་ཁུངས་རྒྱ་ཡིག་སྡེ་ཚན་ལས་བྱེད་ཡེ་ཤེས་བསྟན་འཛིན། སློབ་ཕྲུག་ཚོགས་པའི་ལས་བྱེད་བསྟན་འཛིན་ཚེ་ལྷ། བོད་རང་བཙན་སློབ་ཕྲུག་ཚོགས་པའི་འབྲེལ་མཐུད་པ་ཚེ་དཔག་སྦ་ཡུལ་དང་པད་མ་ཡོ་གོ་བཅས་ཚོགས་བཅར་བྱས།
སྤྱིར་ཚོགས་བཅར་བ་མི་གྲངས་བརྒྱ་ཟིན་པ་ཡོད་པ་ལས་བོད་དང་། ཡུ་གུར། སོག་པོ། ཐའེ་ཝན། ཧོང་ཀོང་། མེ་ཁའོ། རྒྱ་ནག་སྐམ་ས། ཆོས་འཁོར་སྒོམ་སྒྲུབ་ཚོགས་པ། ཁུ་པ་སོགས་ཀྱི་སྐུ་ཚབ་མཉམ་ཞུགས་བྱས་ཡོད་ལ། འདི་ཟླའི་ཚེས ༣༠ སྔ་དྲོ་ཚོགས་འདུ་མཇུག་བསྒྲིལ་རྒྱུ་ཡིན་པ་རེད།
