༢༠༡༥ ཟླ་ ༤ ཚེས་ ༢༧ རེས་གཟའ་ཟླ་བ།
༄༅། །འདི་ག་ལས་ཁུངས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་གཞིར་བཟུང་། སྔོན་ལོར་ཧུན་སུར་དཔལ་ལྡན་རྒྱུད་སྨད་གྲྭ་ཚང་གི་གངས་ཅན་རིག་གནས་སློབ་གྲྭ་དང་ཟུང་འབྲེལ་ཐོག་རང་རིགས་གཞོན་སྐྱེས་རྣམས་ལ་སྤྱིར་བོད་ཀྱི་ཆོས་དང་རིག་གཞུང་། ཡང་སྒོས་སྐད་ཡིག་དང་ནང་དོན་རིག་པའི་སྙིང་དོན་ངོ་སྤྲོད་ཀྱི་ལས་འཆར་ཟླ་དྲུག་བོད་ཀྱི་སྐད་ཡིག་དང་ནང་དོན་རིག་པའི་ཟབ་ཁྲིད་ཅེས་པ་ལེགས་པར་ཚུགས་ཐུབ་པ་བྱུང་ཞིང་། ད་ལོར་ཡང་བསྐྱར་ཚུགས་རྒྱུའི་ཐག་གཅོད་བྱུང་བ་བཞིན་ཕྱི་ལོ་ ༢༠༡༥ ཟླ་ ༡ ཚེས་ ༡༩ འཁོད་འགེངས་ཤོག་འབུལ་ཚེས་དུས་བཀག་ཕྱི་ཟླ་ ༥ ཚེས་ ༡༥ བཅད་པའི་སློབ་བསྡུའི་གསལ་བསྒྲགས་ཤིག་སྤེལ་བས། ད་བར་སློབ་མ་བཅུ་གཅིག་ཙམ་གྱིས་འཚང་སྙན་འགེངས་ཤོག་ཕུལ་འབྱོར་བྱུང་བ་མ་ཟད།
ད་དུང་ཇི་སྙེད་འབྱོར་བཟོ་འདུག འོན་ཀྱང་འཛིན་རིམ་བཅུ་གཉིས་ཐོན་པ་མཐོ་སློབ་ཁག་ཏུ་འཛུལ་རྒྱུར་ལོ་གཅིག་ཙམ་ཕྱིར་ཐེན་གནང་བ་དང་། མཐོ་སློབ་ཀྱི་རྒྱུགས་སྤྲོད་ཟིན་ལ་ཉེ་བ་སོགས་ཀྱིས་ཟབ་ཁྲིད་འདིའི་ནང་དུ་འཛུལ་ཞུགས་ཆོག་མིན་བཀའ་འདྲི་གནང་མཁན་ཡོང་བཞིན་འདུག་པར་བརྟེན། ཁྱོན་སློབ་མའི་ས་མིག་གྲངས་ཚད་ ༣༢ རང་འཇགས་ཐོག འཛིན་རིམ་བཅུ་གཉིས་ཐོན་པ་མཐོ་སློབ་འཛུལ་རྒྱུར་ལོ་ཤས་ངང་ཐེན་གནང་བ་དང་། ཟླ་ཤས་ནང་མཐོ་སློབ་ཐོན་ལ་ཉེ་བ། མཐོ་སློབ་ཐོན་ནས་ལོ་གང་ཙམ་ཕྱིན་པའམ་རང་ལོ་ ༤༠ ལས་མ་བརྒལ་བ་ཡིན་པ། གཞུང་དང་གཞུང་འབྲེལ་མིན་པའི་ལས་བྱེད་རྣམས་ཀྱང་ཟབ་ཁྲིད་འདིའི་ནང་དུ་འཛུལ་ཞུགས་ཆོག་པ་དང་། འཚང་སྙན་འགེངས་ཤོག་འབུལ་ཚེས་དུས་བཀག་ཀྱང་ཏོག་ཙམ་ཕར་འགྱངས་གནང་རྒྱུ་བྱས་པ་ལགས་ན། ཐུགས་སྣང་དོན་གཉེར་ཅན་རྣམས་ཀྱིས་འདི་ག་ལས་ཁུངས་དང་། ཤེས་རིག་ལས་ཁུངས། བོད་མིའི་སྒྲིག་འཛུགས་ཀྱི་དྲ་རྒྱ་བཅས་ནས་འགེངས་ཤོག་ཕབ་ལེན་གྱིས་འཚེམས་ལུས་མེད་པར་བཀང་སྟེ་དགོས་ངེས་ཡིག་ཆ་ཁག་དང་བཅས་ཆོས་རིག་ལས་ཁུངས་སུ་ ༢༠༡༥ ཟླ་ ༦ ཚེས་ ༡༥ ནང་ཚུད་ངེས་འབྱོར་འབུལ་དགོས་པ་བཅས་ཀྱི་གསལ་བསྒྲགས་སུ། ཆོས་རིག་ལས་ཁུངས་ནས་ཕྱི་ལོ་ ༢༠༡༥ ཟླ་ ༤ ཚེས་ ༢༧ ལ།།
