༢༠༡༥ ཟླ་ ༣ ཚེས་ ༢༥ རེས་གཟའ་ལྷག་པ།
༄༅། །ཕྱི་ལོ་ ༢༠༡༥ ཟླ་ ༣ ཚེས་ ༢༢ ཉིན་ཧི་མ་ཅལ་མངའ་སྡེའི་འཕྲོད་བསྟེན་དང་ཁྲལ་བསྡུ་བློན་ཆེན་སྐུ་ཞབས་ཀོལ་སིངྒ་ཐ་ཀུར་མཆོག་བོད་ཀྱི་སྨན་རྩིས་ཁང་དབུ་བརྙེས་ནས་ལོ་ངོ་ ༥༤ འཁོར་བའི་མཛད་སྒོར་ཕེབས་པ་དང་སྟབས་བསྟུན། བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་རྒྱ་རི་སྒྲོལ་མ་མཆོག་དང་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱལ་ལགས། དེ་བཞིན་ཧི་མཱ་ཅལ་ཁུལ་དུ་རྟེན་གཞི་བྱས་པའི་བོད་པའི་བཙུན་དགོན་དང་དགོན་སྡེ་ཁག་གཅིག དེ་བཞིན་ད་ལྟ་ཁྲིམས་ཐོག་ནས་དཀའ་ངལ་འཕྲད་བཞིན་པའི་བོད་མི་ཁྱིམ་ཚང་ ༢༡༨ གྱི་སྐུ་ཚབ་བཅས་ཀྱིས་ PWD མགྲོན་ཁང་དུ་ཧི་མཱ་ཅལ་མངའ་སྡེའི་འཕྲོད་བསྟེན་དང་ཁྲལ་བསྡུ་བློན་ཆེན་མཆོག་དང་ལྷན་མཇལ་འཕྲད་གནང་འདུག
སྐབས་དེར་བཀའ་བློན་མཆོག་གིས་མངའ་སྡེའི་བློན་ཆེན་མཆོག་ལ་བོད་མི་ཚོས་དཀའ་ངལ་རྣམས་སྙན་སེང་ཞུས་པ་དང་སྦྲགས། བོད་མི་ཁྱིམ་ཚང་ ༢༡༨ རྣམས་ད་ལྟའི་སྡོད་གནས་ནས་ཕྱིར་འབུད་བཏང་བ་ཡིན་ན། བོད་མི་རྣམས་ས་གནས་འདིར་གནས་སྡོད་བྱས་ནས་ད་བར་ལོ་ངོ་ ༥༠ ལྷག་སོང་ཟིན་སྟབས། བརྡབ་གསིག་ཧ་ཅང་བཟོ་རྒྱུ་ཡིན་པར་བརྟེན། ས་ཁུལ་དེ་དག་ཤིང་ནགས་ཀྱི་ས་ཁུལ་ནས་ཕྱིར་འཐེན་གནང་བའི་བཀོད་ཁྱབ་གཅིག་གནང་ཐབས་ཀྱིས་ས་ཁུལ་དེ་དག་ཁྲིམས་མཐུན་ཞིག་བཟོས་ནས་ད་ལྟ་གནས་སྡོད་བྱེད་བཞིན་པའི་བོད་མི་སྒེར་རེ་རེ་འམ། ཡང་ན་དབུས་བོད་མིའི་ངལ་སེལ་ཚོགས་པའི་མཚན་ཐོག་ནས་བོགས་གཏོང་གནང་རོགས། ཞེས་ཞུས་པ་མ་ཟད། ཧི་མཱ་ཅལ་མངའ་གཞུང་གིས་བོད་མིར་མཐུན་རྐྱེན་སྦྱོར་སྤྲོད་ཀྱི་སྲིད་བྱུས་གཏན་འབེབས་གནང་བར་དགའ་བསུ་ཞུས་པ་དང་སྦྲགས། མངའ་སྡེ་འདི་ནི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་ཀྱི་སྲིད་བྱུས་གཏན་འབེབས་གནང་མཁན་ཐོག་མ་དེ་ཆགས་ཡོད་སྟབས། མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ཝིར་བྷདྲ་སིངྒ་མཆོག་གིས་དབུ་ཁྲིད་པའི་བཀའ་ཤག་ལྷན་རྒྱས་ལ་བཀའ་དྲིན་ཆེ་ཞུས་འདུག ཧི་མཱ་ཅམ་མངའ་གཞུང་གིས་ཕྱི་ལོ་ ༢༠༡༥ ཟླ་ ༢ ཚེས་ ༡༣ ཉིན་གཏན་འབེབས་གནང་བའི་ལམ་སྟོན་དེ་དག་རྒྱ་གར་དབུས་ནང་སྲིད་ལས་ཁུངས་ཀྱིས་ཕྱི་ལོ་ ༢༠༡༤ ལོའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས། ཞེས་པའི་ལམ་སྟོན་དང་མཐུན་ཞིང་། ཧི་མཱ་ཅལ་མངའ་སྡེའི་གཞུང་གིས་མངའ་སྡེའི་ནང་གནས་སྡོད་བཙན་བྱོལ་བོད་མི་རྣམས་ལ་མཐུན་རྐྱེན་སྦྱོར་སྤྲོད་དང་འབྲེལ་བའི་ལམ་སྟོན་སྲིད་བྱུས་ཤིག་གཏན་འབེབས་གནང་ཐབས་གནང་བཞིན་པའི་སྐབས་དང་བསྟུན།
ཐེངས་འདིར་ལམ་སྟོན་སྲིད་བྱུས་འདི་ཧ་ཅང་གནད་དགག་ཆེན་པོ་ཆགས་ཡོད། དབུས་བོད་མིའི་ངལ་སེལ་ཚོགས་པའི་མིང་ཐོག་ནས་མངའ་སྡེའི་གཞུང་གིས་བཙན་བྱོལ་བོད་མི་རྣམས་ལ་ས་ཆ་བོགས་གཏོང་གནང་ཡོད། བོགས་གཏོང་གནང་བའི་ས་ཆའི་ཁོངས་བོད་མིའི་ཚོགས་སྡེ་དང་དགོན་ཁག དེ་བཞིན་སྒྲིག་འཛུགས་ཚུད་པ་དེ་དག་ཚོང་ཁེ་གང་ཡང་མེད་པ་དང་། དགེ་རྩ་ཚོགས་པ་ཡིན་སྟབས་བོགས་གཏོང་གནང་བའི་རིན་བབ་དེ་ཉུང་མཐའི་རིན་བབ་བརྒྱ་ཆ་གཉིས་ལས་སྤྲོད་མི་དགོས་པ་ཞིག་བཟོ་རོགས། ཞེས་རེ་འདུན་ཞུས་པ་མ་ཟད། གངས་སྐྱིད་ནས་མེག་གྷན་བར་གཞུང་ལམ་ཉམས་གསོའི་ལས་གཞི་འཕྲོ་སྐྱོང་གང་མགྱོགས་གནང་སྐྱོང་ཡོང་བའི་འབོད་སྐུལ་ཡང་ཞུས་འདུག སྐབས་དེར་མངའ་སྡེའི་བློན་ཆེན་མཆོག་ནས་མངའ་སྡེའི་གཞུང་གིས་གང་ཐུབ་གནང་རྒྱུ་མ་ཟད། དེ་སྔ་བཙན་བྱོལ་བོད་མི་ཚོས་བོགས་གཏོང་ནང་མ་ཚུད་པའི་ས་ཆའི་སྟེང་ཁང་པ་བརྒྱབ་ཟིན་པའི་ཁྱིམ་ཚང་རྣམས་ཕྱིར་འབུད་གཏོང་རྒྱུ་མིན་ཁར་ལམ་སྟོན་སྲིད་བྱུས་གསར་པ་དེའི་འོག་བོད་མི་ཁྱིམས་ཚང་ ༢༡༨ ཡོད་པ་དེ་དག་ལ་གུ་ཡངས་ཐོབ་རྒྱུ་ཡིན་སྐོར་གསུངས། གཞན་ཡང་བློན་ཆེན་མཆོག་གིས་སྐབས་དེར་གསུང་དོན། ཧི་མཱ་ཅལ་མངའ་སྡེའི་ནང་འདས་པའི་མི་ལོ་ ༥༠ ལྷག་རིང་གནས་སྡོད་བྱེད་མཁན་བོད་མི་རྣམས་མངའ་སྡེའི་རིག་གཞུང་གི་ཆ་ཤས་ཤིག་ཆགས་ཟིན་པར་བརྟེན། ད་ཆ་བོད་མི་དེ་དག་སྐྱབས་བཅོལ་བ་ཞིག་མིན་པར་ཧི་མཱ་ཅལ་མངའ་སྡེའི་ཆ་ཤས་གལ་ཆེ་ཞིག་ཆགས་ཡོད། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་བཙན་བྱོལ་བོད་མིའི་སྒྲིག་འཛུགས་རྡ་སར་ཡོད་པ་དེས་རྒྱ་གར་ཙམ་མ་ཟད། ཕྱི་རྒྱལ་ཡུལ་སྐོར་སྤྲོ་འཆམ་པ་ཚོས་སྙན་གྲགས་ཆེ་བའི་ཡུལ་སྐོར་སྤྲོ་འཆམ་བྱ་ཡུལ་གྱི་ས་གནས་ཞིག་ལ་ངོས་འཛིན་ཞུ་བཞིན་ཡོད། ཅེས་གསུངས།
དེ་རྗེས་མངའ་སྡེའི་བློན་ཆེན་མཆོག་དང་མངའ་སྡེའི་གྲོས་ཚོགས་འཐུས་མི་སྐུ་ཞབས་ར་ཝི་ཐཱ་ཀུར་ Shri Ravi Thakur མཆོག་སོགས་དང་སྐུ་འཁོར་ལྷན་རྒྱས། དེ་བཞིན་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་རྒྱ་རི་སྒྲོལ་མ་མཆོག་དང་འབྲེལ་ཡོད་ནང་སྲིད་ལས་བྱེད་རྣམས་ཀྱིས་མེག་གྷན་དུ་བོད་ཀྱི་ཟློས་གར་ཚོགས་པའི་ལམ་དང་བྷག་སུའི་ལམ་དུ་ཁྱིམ་ཚང་ ༢༡༨ ཡོད་ས་དེར་གཟིགས་ཞིབ་གནང་རྗེས་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ཕེབས་འདུག
