༢༠༡༥ ཟླ་ ༣ ཚེས་ ༢༡ རེས་གཟའ་སྤེན་པ།
༄༅། །ཕྱི་ལོ་ ༢༠༡༥ ཟླ་ ༣ ཚེས་ ༢༡ ཉིན་གྱི་ཕྱེད་ཡོལ་ཆུ་ཚོད་ ༢།༣༠ ཙམ་ལ་ཧི་མཱ་ཅལ་པར་དེ་ཤིའི་མངའ་ཁོངས་མན་ཌི་དང་མཚོ་པདྨ་གཉིས་ནས་འཕགས་བོད་མཛའ་འབྲེལ་ཚོགས་པའི་ཚོགས་མི་དྲུག་རྡ་སར་ཕེབས་ནས་དེང་སྐབས་བཙན་བྱོལ་བོད་མིའི་སྔོན་རྩིས་ཀྱི་གྲོས་ཚོགས་འཚོགས་བཞིན་པའི་སྐབས་དང་བསྟུན། བོད་མི་མང་སྤྱི་འཐུས་ལྷན་ཁང་ནང་ཕེབས་ནས་ཟུར་ཉན་གནང་སྐབས་སྤྱི་འཐུས་ཚོགས་གཙོ་མཆོག་གིས་ཁོང་རྣམས་རེ་རེ་བཞིན་གྲོས་ཚོགས་ཀྱི་ཚོགས་མི་རྣམས་ལ་ངོ་སྤྲོད་གནང་སྐབས་གྲོས་ཚོགས་འཐུས་མི་རྣམས་ཀྱིས་དགའ་བསུ་ཞུས་འདུག དེ་རྗེས་ཁོང་རྣམས་ཕྱི་དྲིལ་ལས་ཁུངས་ཀྱི་ལྷག་པ་ཚེ་རིང་དྲན་བརྟན་ཚོགས་ཁང་ནང་ཕེབས་ནས་དྲིལ་བསྒྲགས་དྲུང་ཆེ་བཀྲ་ཤིས་ཕུན་ཚོགས་ལགས་ཀྱིས་ཧི་མཱ་ཅལ་མངའ་སྡེ་དང་བཙན་བྱོལ་བོད་མིའི་དབར་དམིགས་བསལ་འབྲེལ་བ་ཡོད་པ་ནི། དེ་སྔ་ཕྱི་ལོ་ ༡༩༥༩ ལོར་བོད་ནང་རྒྱ་ནག་གཞུང་གིས་བཙན་འཛུལ་བྱས་ནས་བོད་མི་སྟོང་ཕྲག་མང་པོ་༸གོང་ས་༸སྐྱབས་མགོན་ཆེན་པོ་མཆོག་གིཕེབས་རྗེས་སུ་རྒྱ་གར་ལ་བྲོས་བྱོལ་དུ་ཡོང་ནས། ཐོག་མར་ཧི་མཱ་ཅལ་ཁུལ་གྱི་མན་ཌི་དང་མ་ནཱ་ལི་སོགས་ཀྱི་ལམ་གསོའི་ལས་ཀ་བྱས་མྱོང་ཡོད་པ་དང་། ལོ་རྒྱུས་ཐོག་ནས་འཕགས་བོད་གཉིས་ཆོས་དང་རིག་གཞུང་གི་འབྲེལ་བ་གཏིང་ཟབ་ཡོད་པ་ནི་བོད་མི་ཚོས་གནའ་སྔ་མོ་ནས་སློབ་དཔོན་པདྨ་འབྱུང་གནས་ཀྱིས་གཙོས་པཎ་གྲུབ་དུ་མ་བོད་དུ་གདན་འདྲངས་ནས་ཆོས་ཞུས་པ་དང་།
དེང་སྐབས་སུའང་བོད་མི་ཚོས་མཚོ་པདྨ་དེ་གུ་རུ་རིན་པོ་ཆེའི་འཁྲུངས་ཡུལ་གྱི་གནས་ཆེན་ཞིག་ལ་ངོས་འཛིན་ཐོག་གནས་སྐོར་དུ་བསྐྱོད་བཞིན་ཡོད་སྐོར་སོགས་ཞིབ་ཕྲ་གསལ་བཤད་གནང་བ་དང་སྦྲགས། འདི་ལོའི་ཕྱི་ཟླ་ ༣ ནང་ཧི་མཱ་ཅལ་མན་ཌིའི་ས་གནས་སུ་དུས་སྟོན་འཚོགས་སྐབས་བོད་མིའི་སྒྲིག་འཛགས་ཀྱི་ཕྱི་དྲིལ་འགྲེམས་སྟོན་ཚན་པར་མགྲོན་འབོད་གནང་ནས་བོད་དོན་དང་འབྲེལ་བའི་པར་རིགས་འགྲེམས་སྟོན་གནང་སྐབས་མང་ཚོགས་སྟོང་ཕྲག་མང་པོས་དེང་སྐབས་བོད་ནང་གི་རང་ལུས་མེར་སྲེག་བཏང་བའི་ཛ་དྲག་གནས་སྟངས་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ཚེའི་མཛད་འགན་གཙོ་བོ་གསུམ། དེ་བཞིན་འཕགས་བོད་གཉིས་དབར་ལོ་རྒྱུས་ཐོག་ནས་ཆོས་དང་རིག་གཞུང་གི་འབྲེལ་བའི་གནས་སྟངས་སོག་ལ་དོ་སྣང་ཧ་ཅང་ཆེན་པོ་གནང་འདུག་པར། དྲུང་ཆེས་མན་ཌིའི་ས་གནས་འཕགས་བོད་མཛའ་འབྲེལ་ཚོགས་པའི་ཚོགས་མི་རྣམས་ཀྱིས་མཐུན་འགྱུར་གང་ལེགས་གནང་བར་བསྔགས་བརྗོད་ཀྱང་གནང་འདུག
དེ་རྗེས་མཛའ་འབྲེལ་ཚོགས་པའི་ཚོགས་མི་རྣམས་ཀྱིས་བོད་དོན་ཐོག་སྔར་བས་རྒྱབ་སྐྱོར་དང་ཡར་རྒྱས་ཇི་ལྟར་གཏོང་དགོས་མིན་ཐད་ལམ་སྟོན་ཞུས་པ་མ་ཟད། ས་གནས་སུ་རྒྱ་གར་མང་ཚོགས་རྣམས་ཀྱིས་བོད་དོན་སྐོར་ཞིབ་ཕྲ་ཤེས་རྟོགས་ཡོང་སླད་བོད་དོན་དང་འབྲེལ་བའི་ཡིག་ཆ་དང་དཔེ་དེབ་སོགས་དྲིལ་བསྒྲགས་ལས་ཁུངས་གཙོ་བོར་གྱུར་བས་ལས་ཁུངས་ཁག་ནས་མཐུན་འགྱུར་རོགས་རམ་གནང་སྐྱོང་ཡོང་བའི་འབོད་སྐུལ་ཞུས་པར་དྲུང་ཆེས་ལམ་སྟོན་གནང་། གཞན་ཡང་ཚོགས་མི་རྣམས་ཀྱིས་སྐབས་དེར་བོད་རྒྱ་འབྲེལ་མོལ་བསྐྱར་གསོའི་སྐོར་དང་གཉིས་སྨན་དབུ་མའི་ལམ་གྱི་སྲིད་བྱུས་སྐོར་སོགས་ཀྱི་དྲི་བར་དྲུང་ཆེས་གསལ་བཤད་དང་ལན་འདེབས་ཞིབ་ཕྲ་གནང་ཡོད། ཐེངས་འདིར་འཕགས་བོད་མཛའ་འབྲེལ་ཚོགས་མི་རྣམས་དང་ལྷན་པོན་ཌོའི་ས་གནས་འགོ་འཛིན་བསྟན་འཛིན་ལེགས་བཤད་ལགས། མཚོ་པདྨའི་ས་གནས་འཐུས་ཚོགས་ཀྱི་ཚོགས་གཙོ་སྐུ་ཞབས་བསྟན་དར་ལགས་སོགས་ཕེབས་འདུག དེ་ཡང་འཕགས་བོད་མཛའ་འབྲེལ་ཚོགས་པའི་ཚོགས་མི་རྣམས་ནི་མན་ཌི་ནས་སྐུ་ཞབས་ཝི་ཤཱལ་ཐ་ཀུར་ (Mr.Vishal Takur) ལགས་དང་། སྡི་ནེ་ཤི་ཀུ་མཱར་ (Mr.Dinesh Kumar) ལགས། སྐུ་ཞབས་སྡེ་ཤི་རཱཇ་ (Desh Raj) ལགས། སྐུ་ཞབས་ཀུན་ཌལ་ (Mr.B.RKaundal) ལགས། དེ་བཞིན་མཚོ་པདྨ་ནས་སྐུ་ཞབས་བྷན་སི་ལལ་ཐ་ཀུར་ (Mr.Bansi Lal Takur)ལགས། ཏེ་ཇི་སིངྒ་ཐ་ཀུར་ (Mr.Tej Singh Takur) ལགས་བཅས་ཡིན་འདུག
