༢༠༡༥ ཟླ་ ༣ ཚེས་ ༡༡ རེས་གཟའ་ལྷག་པ།

༄༅། །ཕྱི་ལོ་ ༢༠༡༥ ཟླ་ ༣ ཚེས་ ༡༠ ཉིན་རྒྱ་གར་ལྷོ་ཕྱོགས་སྦེང་ལོར་དུ་ཡོད་པའི་བོན་ན་པ་སྐྱེད་མོས་ཚལ་ Bonnapa Park ཞེས་པར་མང་ཚོགས་འདུ་འཛོམས་ཀྱིས་གསུམ་བཅུའི་དུས་དྲན་ཐེངས་ ༥༦ པ་སྲུང་བརྩི་ཞུས་འདུག མཛད་སྒོའི་སྐབས་ཀར་ན་ཊ་ཀ་མངའ་སྡེའི་གཞུང་གི་ཁྲིམས་དང་དྲང་བདེན། འགྲོ་བ་མིའི་ཐོབ་ཐང་། དེ་བཞིན་གྲོས་ཚོགས་ལས་དོན་ཚོགས་ཆུང་གི་ཚོགས་མི་སྐུ་ཞབས་ཊི་བྷི་ཇ་ཡ་ཅནྡྲཱ་ Sri T.B Jayachandra ལགས་ཀྱིས་བོད་མི་ཚོས་འཚེ་མེད་ཞི་བའི་ཐབས་ལམ་ཐོག་ནས་རང་དབང་སྐྱར་གསོ་ཡོང་ཐབས་གནང་བར་བསྔགས་བརྗོད་གནང་བ་དང་སྦྲགས། མུ་མཐུད་ནས་སྙིང་སྟོབས་ཞུམ་མེད་ཐོག་གནས་དགོས་པ་དང་། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་ལམ་སྟོན་མཛད་པའི་འཚེ་མེད་ཞི་བའི་ཐབས་ལམ་རྒྱུན་སྐྱོང་གནང་དགོས་པའི་འབོད་སྐུལ་ཡང་གནང་བ་མ་ཟད། ཀར་ན་ཊ་ཀ་མངའ་སྡེའི་གཞུང་གིས་བོད་མི་རྣམས་ལ་མཐུན་འགྱུར་རོགས་རམ་མུ་མཐུད་གནང་རྒྱུ་ཡིན་སྐོར་སོགས་ཀྱི་གསུང་བཤད་གནང་འདུག

དེ་བཞིན་བྷེང་ལོར་དུ་རྟེན་གཞི་བྱས་པའི་སུ་རི་ནམ་ Suriname སྤྱི་མཐུན་རྒྱལ་ཁབ་ཀྱི་གཞུང་ཚབ་པ་སྐུ་ཞབས་ཨ་སིཕ་ཨིག་བྷལ་ Sh. Asif Iqbal མཆོག་དང་། ཏུར་ཀིའི་ཚོང་དོན་ལྷན་ཚོགས་ཀྱི་ Turkey Chamber of Commerce ཚོགས་གཞོན་སྐུ་ཞབས་མུ་ར་ཏི་ Mr Murat ལགས་རྣམ་གཉིས་ཀྱིས་ཀྱང་བོད་མིར་གདུང་སེམས་མཉམ་སྐྱེ་ཡོད་སྐོར་སོགས་ཀྱི་གསུང་བཤད་གནང་འདུག

སྐབས་དེར་བཀའ་སྤྱི་གཉིས་ཀྱི་གསུང་བཤད་སྒྲོགས་སྦྱང་གནང་བ་དང་སྦྲགས། ས་གནས་ཡུལ་མིའི་སྐད་ཡིག་ནང་ཕབ་བསྒྱུར་གནང་བའི་གསུང་བཤད་སྒྲོགས་སྦྱང་གནང་། གོང་ཚེས་ཉིན་གྱི་སྔ་དྲོར་བོད་བསྟན་སྲིད་མི་རིགས་ཀྱི་དོན་དུ་རང་སྲོག་བློས་གཏོང་གནང་མཁན་འདས་གསོན་ཕོ་མོ་རྣམས་དང་ད་ལྟ་བཙོན་ཁང་ནང་རྒྱ་གཞུང་གི་གདུག་རྩུབ་མནར་སྤྱོད་མྱངས་དང་མྱོང་བཞིན་པ་ཡོངས་ཀྱི་ཆེད་སྨོན་ལམ་གསུང་འདོན་ཡང་གནང་འདུག