༢༠༡༥ ཟླ་ ༣ ཚེས་ ༢༧ རེས་གཟའ་པ་སངས།
༄༅། །ཕྱི་ལོ་ ༢༠༡༥ ཟླ་ ༣ ཚེས་ ༢༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བོད་ཀྱི་ཟློས་གར་ཚོགས་པས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ། བོད་ཀྱི་ཞོ་སྟོན་རྒྱས་པ་ཐེངས་ ༢༠ པར་སྔ་དྲོའི་ཆུ་ཚོད་ ༩ ཐོག་ཆིབས་སྒྱུར་བསྐྱངས་ཡོད། ༸གོང་ས་མཆོག་བོད་ཀྱི་ཟློས་གར་ཚོགས་པར་༸ཞབས་སོར་འཁོད་སྐབས་ཟློས་གར་ཚོགས་པའི་འགན་འཛིན་གྱིས་སྤོས་སྣེས་སྔོན་བསུས་ཏེ་ཕེབས་བསུ་དང་ལྷ་མོའི་ཚོགས་པ་ཁག་གི་འཁྲབ་སྟོན་པ་རྣམས་ཀྱིས་ཕེབས་ལམ་གཡས་གཡོན་དུ་ལག་ཏུ་དཀར་གཙང་མཇལ་དར་ཐོགས་ཏེ་ཕེབས་བསུ། ཟློར་གར་སྒྱུ་རྩལ་འཁྲབ་སྟོན་པ་ཁག་གཅིག་གིས་བཀྲ་ཤིས་ཞོལ་པ་འཁྲབ་སྟོན་གྱི་ལམ་ནས་ཕེབས་བསུ་གཟབ་རྒྱས་ཞུས་ཡོད།
དེ་ནས་གཟིམ་ཆུང་དུ་༸ཞབས་སོར་འཁོད་བསྟུན་བོད་ཀྱི་ཟློས་གར་ཚོགས་པའི་སྤྱི་ཁྱབ་འགན་འཛིན་པི་ཟུར་དབང་འདུས་ཚེ་རིང་ལགས་ཀྱིས་༸གོང་ས་མཆོག་ལ་མཎྜལ་རྟེན་གསུམ་འདེགས་འབུལ་ཞུས་གྲུབ་རྗེས་ཚང་མ་སྐུ་བཞེངས་ཐོག་བོད་བསྟན་སྲིད་མི་རིགས་ཀྱི་དོན་དུ་རང་སྲོག་བློས་གཏོང་གནང་མཁན་རྒྱལ་གཅེས་པ་འདས་གསོན་ཕོ་མོ་ཡོངས་ལ་མྱ་ངན་གུས་འདུད་མཚོན་ཆེད་ངག་བཅད་སྐར་མ་གཅིག་རིང་ཞུས། དེ་ནས་ཞོ་སྟོན་འཁྲབ་སྟོན་ཞུ་སའི་དོ་རའི་ནང་ལྷ་མོའི་ཚོགས་པ་ཁག་གི་ལྷ་མོའི་དགེ་རྒན་རྣམས་ཀྱིས་ལྷ་མོའི་འཁྲབ་སྟོན་གསར་གཏོད་མཛད་མཁན་གྲུབ་ཆེན་ཐང་སྟོང་རྒྱལ་པོའི་སྐུ་བརྙན་གདན་འདྲེན་ཞུས།
བོད་ཀྱི་ཟློས་གར་ཚོགས་པའི་སྤྱི་ཁྱབ་འགན་འཛིན་པི་ཟུར་དབང་འདུས་ཚེ་རིང་ལགས།
དེ་ཡང་ཐེངས་འདིའི་ཞོ་སྟོན་ནི་༸གོང་ས་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་ནས་མི་ལོ་ ༢༥ འཁོར་བ་དང་། སྐུའི་གྱ་སྟོན། ཞོ་སྟོན་དུས་ཆེན་བཅས་རྟེན་འབྲེལ་གསུམ་འཛོམས་ཀྱི་མཛད་སྒོ་དབུ་འཛུགས་གནང་། ༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་མཆོག་དང་བོད་མི་མང་སྤྱིས་འཐུས་ཚོགས་གཙོ་མཆོག དཔལ་ལྡན་སྲིད་སྐྱོང་མཆོག་གིས་གཙོས་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། རང་དབང་ཅན་གྱི་ལས་ཁུངས་ཁག་གི་འགན་འཛིན་རྣམ་པ། བོད་མི་མང་སྤྱི་འཐུས་རྣམ་པས་གཙོས་ལྷན་ཁང་ཁག་གི་དྲུང་ཆེ་རྣམ་པ། བོད་ཀྱི་ཟློས་གར་ཚོགས་པའི་འབྲེལ་ཡོད་སྐུ་མགྲོན་རྣམ་པ། གཞུང་དང་གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་སྐུ་ཚབ། ས་གནས་ཁག་གི་ལྷ་མོའི་འཁྲབ་སྟོན་པ་རྣམ་པ། ཕྱི་རྒྱལ་བ། གསར་འགོད་པ། སེར་སྐྱ་མི་མང་སོགས་ཁྱོན་མི་གྲངས་བཞི་སྟོང་བརྒལ་བ་འདུ་འཛོམས་ཐོག་བོད་ཀྱི་ཟློས་གར་ཚོགས་པའི་འགན་འཛིན་གྱིས་ཞོ་སྟོན་སྐོར་དང་དེ་བཞིན་ལས་བསྡོམས་སྙིང་བསྡུས་སྙན་སྒྲོན་ཞུས། དེ་རྗེས་བོད་ཀྱི་ཟློས་གར་ཚོགས་པས་གཙོས་ལྷ་ཚོགས་ཁག་བཅུ་གསུམ་གྱིས་ལྷ་གཞུང་སྙིང་བསྡུས་སྐར་མ་ ༢༠ རེ་གཟིགས་ཕུད་འབུལ་ལམ་ཞུས་ཡོད།
ཐེངས་འདིའི་ཉིན་བཅུའི་རིང་གི་ཞོ་སྟོན་དུས་སྟོན་གྱི་ལྷ་མོའི་འཁྲབ་སྟོན་ཞུ་རྒྱུའི་དུས་ཚེས་ནི། ཕྱི་ཚེས་ ༢༨ ཉིན་མ་སུ་རི་བོད་ཁྱིམ་སློབ་གྲྭ་ནས་མཁན་སློབ་ཆོས་གསུམ་དང་། ཕྱི་ཚེས་ ༢༩ ཉིན་ཀ་སྦུག་བོད་མིའི་ལྷ་མོ་ཚོགས་པས་གཟུགས་ཀྱི་ཉི་མ། ཕྱི་ཚེས་ ༣༠ ཉིན་མོན་གྷོ་འདོད་རྒུ་གླིང་ལྷ་མོ་ཚོགས་པས་སྣང་ས་འོད་འབུམ། ཕྱི་ཚེས་ ༣༡ ཉིན་ཨོ་རི་ས་ཕུན་ཚོགས་གླིང་ལྷ་མོ་ཚོགས་པས་ཁྱེའུ་པདྨ་འོད་འབར། ཕྱི་ཟླ་ ༤ ཚེས་ ༡་ཉིན་སྦན་དྷ་ར་ལྷ་མོ་མཐུན་ཚོགས་ཀྱིས་འགྲོ་བ་བཟང་མོ། ཕྱི ཚེས་ ༢ ཉིན་སྦེལ་ཀོབ་ལྷ་མོ་ཚོགས་པས་ཇོ་བོ་རྗེ་དཔལ་ལྡན་ཨ་ཏི་ཤ། ཕྱི ཚེས་ ༣ ཉིན་མན་སྤར་ཕན་བདེ་གླིང་ལྷ་མོ་ཚོགས་པས་རྒྱལ་པོ་འཇིག་ཉེན་དབང་ཕྱུག ཕྱི་ཚེས་ ༤ ཉིན་བལ་ཡུལ་བོད་ཀྱི་ལྷ་མོ་ཚོགས་པས་ལྕགས་ཟམ་པ། ཕྱི་ཚེས་ ༥ ཉིན་བོད་ཀྱི་ཟློས་གར་ཚོགས་པས་སྟོན་པའི་མཛད་རྣམ་འཁྲབ་སྟོན་གནང་རྒྱུ་ཡིན་འདུག་པ་བཅས།།
