༢༠༡༥ ཟླ་ ༣ ཚེས་ ༣ རེས་གཟའ་མིག་དམར།
༄༅། །ཕྱི་ལོ་ ༢༠༡༥ ཟླ་ ༣ ཚེས་ ༡ ཉིན་སྤྱི་ནོར་༸གོང་ས་༸སྐྱབས་མགོན་ ཆེན་པོ་མཆོག་གིས་ཡུལ་ལུང་འདྲ་མིན་ནས་ཕེབས་པའི་ནང་པ་སངས་རྒྱས་པ་ཁྱོན་མི་གྲངས་ ༤༩ ལ་དགེ་ཚུལ་གྱི་སྡོམ་པ་སྩལ་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་བརྒྱད་དང་ཕྱེད་ཀ་ཙམ་ནས་བཞུགས་སྒར་རྡ་རམ་ས་ལའི་གཟིམ་ཆུང་རྙིང་པའི་ཚོམས་ཆེན་དུ་བོད་རིགས་དང་ཧི་མ་ལའི་རི་རྒྱུད་ཀྱི་མི་རིགས། དེ་བཞིན་སོག་པོ་དང་། ཀོ་རི་ཡ། ཨོ་སི་ཊོ་ལི་ཡ། ཨ་རི། ཡུ་རོབ་ཀྱི་རྒྱལ་ཁབ་སི་ལོ་ཝེ་ནིས་ཡ། བྷར་རྫིལ། བལ་ཡུལ། ཝི་ཏི་ནམ། འབྲུག་བཅས་ནས་བཅར་བའི་བུད་མེད་གྲངས་བཞི་བཅུ་དང་སྐྱེས་པ་གྲངས་དགུ་ལ་དགེ་ཚུལ་ཕ་མའི་སྡོམ་པ་སོ་སོར་སྩལ་ཡོད་པ་དང་། དེའི་ཁྲོད་སོག་པོའི་འདར་བ་བཎྚིཏའི་ཡང་སྲིད་ལའང་དགེ་ཚུལ་གྱི་སྡོམ་པ་སྩལ་ཡོད། གཞན་ཡང་ཕྱི་ཚེས་ ༤ ཉིན་བཞུགས་སྒར་རྡ་རམ་ས་ ལའི་ཐེག་ཆེན་ཆོས་གླིང་གཙུག་ལག་ཁང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བྷེལ་འཇམ་བོད་རིགས་ཚོགས་པ་དང་། རྡ་ས་ཆིག་སྒྲིལ་ཚོགས་པ། རྡ་ས་ཚོང་པའི་ཚོགས་པ། ལྷ་ས་སྐྱིད་སྡུག། ལྷོ་ཁའི་སྐྱིད་སྡུག་བཅས་ཀྱིས་བརྟན་བཞུགས་བསྟར་འབུལ་ཞུ་རྒྱུ་དང་། ཕྱི་ཚེས་ ༥ ཉིན་སྐྱེས་རབས་གསུང་ཆོས་སྩལ་རྒྱུ་ཡིན་པ་མ་ཟད། དྲ་ཐོག་ཐད་ཀར་རྒྱང་སྲིང་ཞུ་རྒྱུ་ཡིན་འདུག
