༢༠༡༥ ཟླ་ ༣ ཚེས་ ༡༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༥ ཟླ་ ༣ ཚེས་ ༡༠ ཉིན་བོད་མིའི་གསུམ་བཅུའི་དུས་དྲན་ཐེངས་ ༥༦ རྡ་ས་ཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་སྲུང་བརྩི་གཟབ་རྒྱས་ཞུས་ཡོད་ཅིང་། ཉིན་དེར་སྐུ་མགྲོན་གཙོ་བོ་ཇར་མན་གྲོས་ཚོགས་ German Bundestag ཀྱི་ཚོགས་གཞོན་ལྕམ་སྐུ་ཀ་ལའོ་ཌི་ཡ་རོ་ཐི་ Ms Claudia Rothམ ཆོག་གིས་གཙོས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམས་དང་། བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་དྲུང་ཆེས་གཙོས་སྲི་ཞུ་བ་རྣམ་པ། གཞན་ཡང་བོད་མི་དང་རྒྱ་རིགས། ཨ་རི་བ། ཨོ་སི་ཊོ་ལི་ཡ། ཐེ་ཝན། ཉི་འོང་བཅས་ཕྱི་རྒྱལ་བ་ཁག་གཅིག་དང་། སློབ་ཕྲུག་སོགས་ཁྱོན་མི་གྲངས་སྟོང་ཕྲག་ལྔ་ཙམ་འདུ་འཛོམས་ཐོག་བོད་ཀྱི་ཟློས་གར་ཚོགས་པས་རྔ་རོལ་དང་བཅས་མཛད་སྒོ་དབུ་འཛུགས་གནང་ཡོད། སྐབས་དེར་སྐུ་མགྲོན་གཙོ་བོ་ཇར་མན་གྲོས་ཚོགས་ཀྱི་ཚོགས་གཞོན་མཆོག་ནས་བོད་མི་ཚོས་རྒྱ་ནག་གཞུང་གི་དམ་བསྒྲགས་དང་བཙན་གནོན་ལ་ད་བར་འཚེ་མེད་ཞི་བ་དང་བཟོད་སྲན། བསམ་ཤེས་བཅས་ཀྱི་ཐོག་ནས་བདེན་པའི་འཐབ་རྩོད་གནང་བར་ལེགས་གསོའི་བསྔགས་བརྗོད་ཚད་མེད་གནང་བ་དང་སྦྲགས། རྒྱལ་སྤྱིའི་སྤྱི་ཚོགས་ནས་བོད་མིའི་འཚེ་མེད་ཞི་བའི་འཐབ་རྩོད་ལ་ངེས་པར་དུ་རྒྱབ་སྐྱོར་གནང་ནས་བོད་མི་རྣམས་ལ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་མིང་དོན་མཚུངས་པའི་རང་སྐྱོང་གི་གནས་བབ་ཚད་ལྡན་ཞིག་ཐོབ་ཐབས་གནང་གལ་ཆེ་སྐོར་དང་། ཉིན་དེ་ནི་བོད་མི་རྣམས་ལ་བྱུང་རབས་ལོ་རྒྱུས་ཐོག་ཧ་ཅང་གལ་གནད་ཆེ་བའི་ཉིན་མོ་ཞིག་ཡིན་པ་ཙམ་དུ་མ་ཟད། རྒྱལ་སྤྱིའི་ཁྱོན་ཡོངས་ཀྱི་འགྲོ་བ་མིའི་ཐོབ་ཐང་ལ་སྲུང་བརྩི་ཞུ་རྒྱུའི་དུས་དྲན་དམིགས་བསལ་ཞིག་ཀྱང་ཆགས་ཡོད་སྐོར་དང་། ལྕམ་སྐུ་རང་ཉིད་བོད་མིའི་ལོ་རྒྱུས་རང་བཞིན་ལྡན་པའི་གལ་ཆེའི་ཉིན་མོར་དངོས་སུ་རྡ་སར་བཅར་ནས་བོད་ཀྱི་༧སྐྱབས་མགོན་ཏཱ་ལའི་བླ་མ་མཆོག་དང་མཇལ་འཕྲད་ཞུ་རྒྱུ་བྱུང་བར་དམིགས་བསལ་དགའ་ཚོར་ཆེན་པོ་བྱུང་སྐོར་སོགས་གསུངས།
དེ་ཡང་ལྕམ་སྐུ་མཆོག་གིས་གསུམ་དུས་སྐབས་ཀྱི་གསུང་བཤད་གནང་སྐབས་བོད་ཀྱི་ཁོར་ཡུག་སྲུང་སྐྱོབ་སྐོར་གསུང་དོན། བོད་ཀྱི་ཁོར་ཡུག་ནི་འཛམ་གླིང་སྤྱི་དང་ལྷག་པར་ཨེ་ཤི་ཡའི་ཁྱོན་ལ་ཧ་ཅང་གལ་གནད་ཆེན་པོ་ཆགས་ཡོད། དེར་བརྟེན་བོད་འདི་འཛམ་གླིང་གི་སྣེ་གསུམ་པ། ཞེས་གྲགས་པ་ཙམ་དུ་མ་ཟད། ཆུ་མཛོད་ལྟ་བུ་ཞིག་ཀྱང་ཆགས་ཡོད། རྒྱ་ནག་གཞུང་གི་བོད་ཀྱི་རྒྱུག་ཆུའི་ཐོག་གང་བྱུང་ཆུ་མཛོད་བརྒྱབ་པ་དེས་བོད་མིའི་ཐུན་མིན་ཡུལ་གོམས་དང་རིག་གཞུང་ལ་དོ་ཕོག་ཆེན་པོ་བཟོ་བཞིན་ཡོད་པ་མ་ཟད། བོད་ཀྱི་རྒྱུག་ཆུ་ཁག་ལ་རྟེན་ནས་འཚོ་གནས་བྱེད་བཞིན་པའི་ཨེ་ཤི་ཡའི་རྒྱལ་ཁབ་རྒྱ་གར་དང་པ་ཀི་སི་ཐན། རྒྱ་ནག ཀེམ་བྷོ་ཌི་ཡ། ལའོ་སི། ཐ་ཡི་ལེན་ཌི་སོགས་ནང་དེ་སྔ་རྒྱུག་ཆུ་ཡོད་པ་རྣམས་སྐམ་ནས་ད་ཆ་བྱེ་ཐང་གི་ངོ་བོར་གྱུར་ཉེན་གྱི་མཚམས་སུ་བསླེབས་ཡོད། ཅེས་གསུངས།
གཞན་ཡང་མུ་མཐུད་གསུང་བཤད་གནང་དོན། གསུམ་བཅུའི་དུས་དྲན་གྱི་ཉིན་མོ་འདི་ནི་ལོ་རྒྱུས་ཐོག་ཧ་ཅང་གལ་ཆེའི་ཉིན་མོ་ཞིག་ཡིན། ཉིན་མོ་འདིས་ང་ཚོར་ལོ་རྒྱུས་ཀྱི་ཉེན་བརྡ་དང་། ད་ལྟའི་ལས་འགན་དྲན་གསོ་གཏོང་བ་ཙམ་དུ་མ་ཟད། འབྱུང་འགྱུར་གྱི་མདུན་ལམ་བཟང་པོ་ཞིག་བཟོ་རྒྱུའི་གོ་སྐབས་ཤིག་སྐྲུན་བཞིན་ཡོད། ང་ཚོས་དེ་རིང་གྱི་ཉིན་མོ་འདི་ནམ་ཡང་བརྗེད་རྒྱུ་མེད། རྒྱལ་སྤྱིའི་སྤྱི་ཚོགས་ཀྱིས་བོད་མིའི་བདེན་པའི་འཐབ་རྩོད་དེ་དྲན་པའི་ཡུལ་ནས་བརྗེད་མི་ཡོང་ངམ་སྙམ་པའི་ངོས་ལ་སེམས་ཁྲལ་ཡོང་བཞིན་འདུག དེར་བརྟེན་དེ་རིང་གི་ཉིན་མོ་འདི་ནི་བོད་མིའི་དྲང་བདེན་གྱི་འཐབ་རྩོད་ལ་རྒྱབ་སྐྱོར་གྱི་སྐྱིད་སྡུག་མཉམ་མྱོང་བྱེད་དགོས་པའི་ཉིན་མོ་ཞིག་ཡིན་པ་ལས་བཟང་ངན་གྱི་ཚོར་བ་གང་ཡང་མེད་པར་ཁ་ཁུ་སིམ་པོར་སྡོད་ཐབས་མེད། དེར་བརྟེན་དེ་རིང་ངོས་ཀྱིས་རྒྱལ་སྤྱིའི་སྤྱི་ཚོགས་ལ་བརྡ་ལན་ཞིག་སྤྲོད་རྒྱུ་ཡོད་པ་ནི། ཁྱེད་ཚོས་བོད་མི་རྣམས་ནམ་ཡང་བརྗེད་མི་རུང་། གལ་ཏེ་བརྗེད་པ་ཡིན་ན། བོད་ཚོ་མུ་མཐུད་ནས་ཚེ་སྲོག་ཤོར་རྒྱུ་རེད། དེ་ཡང་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ཨེ་ལི་ཝི་སེལ་ Elie Weasel མཆོག་གིས་མནར་གཅོད་མྱོང་མཁན་དེ་བརྗེད་པ་ཡིན་ན། མནར་གཅོད་ཐེངས་མ་གཉིས་པ་བཏང་བ་ཞིག་ཆགས་ཡོད། ཅེས་གསུང་པར་བརྟེན་ང་ཚོས་བརྩེ་བའི་བོད་མི་གྲོགས་པོ་རྣམས་ནམ་ཡང་བརྗེད་མི་རུང་།
དེང་སྐབས་འཛམ་གླིང་ནང་དམག་འཁྲུག་དང་འཚེ་མའི་ལས་འགུལ་ཤུགས་ཆེ་སྤེལ་བཞིན་པའི་དུས་སྐབས་འདིར་བོད་མི་དང་རྒྱལ་སྤྱིའི་སྤྱི་ཚོགས་ལ་འཚེ་མེད་ཞི་བ་དང་འཆམ་མཐུན་གྱི་བསླབ་བྱ་འདོན་གནང་མཛད་མཁན་དབུ་ཁྲིད་ཡང་དག་པ་ཞིག་ཡོད་པ་ནི་བོད་ཀྱི་༧སྐྱབས་མགོན་ཏཱ་ལའི་བླ་མ་མཆོག་ཡིན། མགོན་པོ་གང་ཉིད་མཆོག་གི་དགོངས་པའི་འཆར་སྣང་ལ་ཡོད་པའི་འཛམ་གླིང་ནི། མནར་གཅོད་དང་ཞེ་སྡང། འཚེ་བ་སོགས་མེད་པར་བྱམས་བརྩེ་དང་དྲང་བདེན། བཟོད་སྲན། འཆམ་མཐུན་གྱི་སྤྱི་ཚོགས་ཤིག་སྐྲུན་ཐབས་མཛད་རྒྱུ་དེ་ཡིན། ཞེས་གསུང་པ་མ་ཟད། ལྕམ་སྐུ་མཆོག་གིས་སྐབས་དེར་བོད་མིས་རང་ལུས་མེར་སྲེག་བཏང་བའི་ཛ་དྲག་གི་གནས་སྟངས་སྐོར་གསུང་དོན།
རྒྱ་ནག་གཞུང་གི་བོད་མིའི་ཆོས་དང་སྐད་ཡིག རིག་གཞུང་སོགས་ལ་དམ་བསྒྲགས་བྱས་པ་མ་ཟད། བོད་ཀྱི་ཁོར་ཡུག་ལ་གཏོར་ཤིག་ཚབས་ཆེ་བཏང་བ་སོགས་ལ་བརྟེན་ནས་ད་བར་བོད་མི་ ༡༣༦ རང་ལུས་མེར་སྲེག་བཏང་སྟེ་ཞི་རྒོལ་ཤུགས་ཆེ་གནང་འདུག ངོས་ཀྱི་དེ་རིང་གོ་སྐབས་འདི་བཟུང་ནས་རྒྱ་ནག་གཞུང་ལ་རེ་འདུན་ཤུགས་ཆེ་ཞིག་འདོན་རྒྱུ་ཡོད་པ་ནི། ད་བར་རྒྱ་ནག་གཞུང་གིས་བོད་མིའི་ཆབ་སྲིད་བཙོན་པ་འཛིན་བཟུང་བཀག་ཉར་བྱས་པ་རྣམས་འཕྲལ་དུ་གློད་བཀྲོལ་བཏང་ནས་བོད་མི་རྣམས་རང་ཡུལ་ནང་རང་དབང་དང་ཆེ་མཐོང་ལྡན་པའི་ཐོག་ནས་རང་གི་ཐུན་མིན་ཆོས་དང་རིག་གཞུང་སྲུང་སྐྱོབས་དང་དར་སྤེལ་གནང་འཇུག་དགོས། ཞེས་སོགས་ཀྱི་བོད་དོན་རྒྱབ་སྐྱོར་གྱི་གསུང་བཤད་གནང་འདུག སྤྱིར་སྲིད་སྐྱོང་མཆོག་གིས་ཇར་མན་གྲོས་ཚོགས་ཀྱི་ཚོགས་གཞོན་མཆོག་ལ་རྡ་སར་གསུམ་བཅུའི་དུས་དྲན་གྱི་སྐུ་མགྲོན་དུ་ཕེབས་གནང་ཡོང་བ་དེ་སྔ་མཇལ་འཕྲད་སྐབས་མགྲོན་འབོད་ཞུས་པ་ལྟར། ལྕམ་སྐུ་མཆོག་ཕེབས་པ་ཞིག་ཡིན་འདུག ཚོཇར་མན་གྲོས་ཚོགས་ཀྱི་ཚོགས་གཞོན་ལྕམ་སྐུ་མཆོག་གཞི་རྩའི་ཇར་མན་གྲོས་ཚོགས་ནང་ལྗང་གུ་ཚོགས་པའི་ཚོགས་གཙོ་གནང་མྱོང་ཡོད་པ་མ་ཟད། ཁོར་ཡུག་སྲུང་སྐྱོབ་ཐོག་རྒྱལ་སྤྱིའི་ཁྱོན་ཡོངས་སུ་ཕྱག་ལས་ཤུགས་ཆེ་གནང་མཁན་ཞིག་ཡིན་འདུག
