༢༠༡༥ ཟླ་ ༢ ཚེས་ ༢༥ རེས་གཟའ་མིག་དམར།
༄༅། །ཕྱི་ལོ་ ༢༠༡༥ ཟླ་ ༢ ཚེས་ ༢༣ བོད་ཀྱི་ལོ་གསར་ཚེས་ ༥ ཉིན་ཨ་མི་རི་ཀའི་ཕྱི་སྲིད་ལས་ཁུངས་ཀྱི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ས་ར་སི་ཝེལ་ Sarah Sewall མཆོག་གིས་ཕྱི་སྲིད་ལས་ཁུངས་ནང་བོད་ཀྱི་ལོ་གསར་སྲུང་བརྩི་ཞུས་ཡོད་འདུག སྐབས་དེར་མཛད་སྒོའི་ཐོག་ཨ་རིའི་ཕྱི་སྲིད་ལས་ཁུངས་ཀྱི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ ས་ར་སི་ཝེལ་མཆོག་གིས་བོད་མི་ཨ་རི་བ་རྣམས་དང་ཨ་རིའི་གཞུང་འབྲེལ་མི་སྣ། ཨ་རིའི་ཕྱི་སྲིད་ལས་ཁུངས་ཀྱི་སྐུ་ཚབ་བཅས་སྐུ་མགྲོན་རྣམས་ལ་འཚམས་འདྲི་ཞུས་པ་དང་ཆབས་ཅིག་བོད་མི་ཚོ་མི་འབོར་གྱི་ཆ་ནས་ཉུང་ཉུང་ཡིན་ཡང་། སོ་སོའི་ངོ་བོ་དང་རིག་གཞུང་མི་ཉམ་རྒྱུན་འཛིན་ཐུབ་པ་དང་། ད་རེས་ཕྱི་སྲིད་ལས་ཁུངས་ནང་བོད་ཀྱི་ལོ་གསར་སྲུང་བརྩི་དང་བོད་མིའི་ངོ་བོ་ངོ་སྤྲོད་གནང་ཐུབ་པར་དགའ་ཚོར་ཆེན་པོ་བྱུང་ཞེས་གསུངས་འདུག དེ་མིན་སྔ་ལོ་ཁོ་མོ་རྒྱ་གར་དང་བལ་ཡུལ་ནང་འཚམས་གཟིགས་སྐབས་བོད་རིགས་རྣམས་ཐུགས་འཕྲད་སྐབས་ཀྱི་མྱོང་ཚོར་སྐོར་གསུངས།
དེ་རྗེས་༸གོང་ས་མཆོག་གི་དམིགས་བསལ་སྐུ་ཚབ་ཟུར་པ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་གིས་བོད་ཀྱི་ལོ་གསར་སྐོར་ངོ་སྤྲོད་དང་འབྲེལ་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག་བཅས་སྲུང་སྐྱོབ་བྱ་རྒྱུ་གལ་གནད་ཆེན་པོར་བརྩིས་ནས་དམིགས་བསལ་གཞུང་འབྲེལ་ཐོག་སྲིད་བྱུས་གཏན་འབེབས་གནང་བ་ཙམ་མ་ཟད།
དོན་དངོས་ལག་བསྟར་གནང་མུས་ཡིན་སྐོར་སོགས་ངོ་སྤྲོད་དང་འབྲེལ་ཐུགས་རྗེ་ཆེ་ཞུས་འདུག ཐེངས་འདིར་ཨ་རིའི་ཕྱི་སྲིད་ལས་ཁུངས་ནང་བོད་ཀྱི་ལོ་གསར་སྲུང་བརྩི་ཞུས་པ་ཐོག་མ་དེ་ཆགས་ཡོད།
སྤྱིར་བཏང་ཕྱི་སྲིད་ལས་ཁུངས་ནང་རྒྱལ་ཁབ་འདྲ་མིན་གྱི་དུས་ཆེན་སྲུང་བརྩི་ཞུ་རྒྱུའི་ལམ་སྲོལ་ཡོད་པ་ལྟར། ད་རེས་བོད་ཀྱི་ལོ་གསར་སྲུང་བརྩི་ཞུས་པ་ཞིག་ཡིན་འདུག
