ཕྱི་ལོ་ ༢༠༡༥ ཟླ་ ༢ ཚེས་ ༡༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༥ ཟླ་ ༢ ཚེས་ ༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ནོར་ཝེའི་གྲོང་ཁྱེར་ཌོ་རོནཌ་ཧེམ་Trondheim དུ་རྒྱལ་སྤྱིའི་སློབ་ཕྲུག་དུས་སྟོན་དུ་སློབ་ཕྲུག་ ༡༨༠༠ ཙམ་ལ་ལྐོག་ཟ་རུལ་སུངས་སྐོར་བཀའ་སློབ་སྩལ་འདུག
དེ་ཡང་མགོན་པོ་གང་ཉིད་མཆོག་གིས་ལྐོག་ཟ་རུལ་སུངས་དང་དེའི་ཉེས་སྐྱོན། ལྐོག་ཟ་རུལ་སུངས་ཀྱི་དཀའ་ངལ་སེལ་ཐབས་སོགས་ཀྱི་སྐོར་ལ་བཀའ་སློབ་སྩལ་དོན། འདས་ཟིན་པའི་དུས་ཚོད་ནང་གནས་ཚུལ་བཟང་ངན་དང་སྐྱིད་སྡུག་ཇི་འདྲ་ཞིག་བྱུང་རུང་། དེ་ལ་སུས་ཀྱང་འགྱུར་བ་གཏོང་ཐུབ་ཀྱི་མེད་ཅིང་། ད་བར་གནས་ཚུལ་ཐབས་སྡུག་ཞིག་ལ་དྲག་པོའི་དཀའ་ངལ་མང་ཆེ་བ་ནི། མི་རང་གིས་བཟོས་པ་ཆགས་ཀྱི་ཡོད།
ལྐོག་ཟའི་བྱ་སྤྱོད་ནི་དྲང་བདེན་གྱི་ལྟ་གྲུབ་ལས་འགལ་བའི་རྣམ་པ་ཞིག་ཆགས་ཀྱི་ཡོད་པ་མ་ཟད། བྱ་སྤྱོད་འདི་འཚེ་བའི་བྱ་སྤྱོད་ཡིན་པ་དང་། གཞན་གྱི་ཐོབ་ཐང་འཕྲོག་ཅིང་། སེམས་ལ་གནོད་པའི་བྱ་སྤྱོད་ཅིག་ཡིན། འཚེ་བ་ཞེས་པ་ནི། ཕྱིའི་རྣམ་འགྱུར་དང་བྱ་སྤྱོད་གཅིག་པུར་མི་གོ་ཞིང་། ཁོང་ཁྲོ་དང་ཞེ་སྡང་། དེ་བཞིན་འདོད་རྔམ་དང་
འཇིགས་སྣང་སོགས་ཀུན་ནས་བླངས་པའི་བྱ་སྤྱོད་ཞིག་ལ་གོ་དགོས།
དེང་སང་ཡུལ་གྲུ་གང་དུ་བལྟས་ཀྱང་ཚང་མས་འཛམ་གླིང་ཞི་བདེའི་སྐོར་གསུང་གི་ཡོད་ཅིང་། འོན་ཀྱང་དྲག་པོའི་དཀའ་ངལ་མང་ཆེ་བ་མིས་བཟོས་པ་མ་གཏོགས་སེམས་ཅན་དུད་འགྲོའི་རིགས་ཀྱིས་བཟོས་པ་མིན་སྟབས། འཛམ་གླིང་ཞི་བདེ་ལྡན་པ་དང་། ལྐོག་ཟ་རུལ་སུངས་རྩ་བ་ནས་འགོག་ཐབས་ཆེད་ང་ཚོ་མི་རེ་ངོ་རེར་འགན་ཡོད།
གལ་ཏེ་ང་ཚོས་འགྲོ་བ་མི་ཚང་མར་གཅིག་གྱུར་གྱི་འདུ་ཤེས་འཛིན་ཐུབ་ཚེ་མི་ཕན་ཚུན་དབར་རྙོག་གྲ་ཡོང་གཞི་གང་ཡང་མེད། དུས་རབས་ཉི་ཤུ་རྩ་གཅིག་འདི་ཞི་བདེ་དང་། བདེ་སྐྱིད་ལྡན་པ་ཞིག་འབྱུང་བར་དེང་དུས་ཀྱི་ཤེས་ཡོན་སློབ་གསོའི་ལམ་ལུགས་ནང་ངེས་པར་དུ་ནང་སེམས་ཀྱི་བྱམས་པ་དང་བརྩེ་སེམས། གཞན་ཕན་ལྷག་བསམ་ལ་སོགས་པའི་རིན་ཐང་ངོ་སྤྲོད་ཀྱི་སློབ་གསོ་ངེས་པར་སྤྲོད་ཐུབ་པ་བྱ་རྒྱུ་གལ་ཆེན་པོ་ཡིན། ཞེས་སོགས་ཀྱི་བཀའ་སློབ་སྩལ།
ཕྱི་ཚེས་ ༡༠ ཉིན་མགོན་པོ་གང་ཉིད་མཆོག་ཌེན་མག་ཏུ་ཞབས་སོར་འཁོད་ནས། ཕྱི་ཚེས་ ༡༡ ཉིན་ཌེན་མག་གི་གྲོང་ཁྱེར་ཀོ་པེན་ཧེ་གྷན་དུ་བྱམས་བརྩེ་དང་ཕན་ཚུན་འབྲེལ་ལམ་བརྒྱུད་ནས་སྙིང་སྟོབས་སྤེལ་བ་ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་བསྩལ་རྒྱུ་དང་། ཕྱི་ཚེས་ ༡༢ ཉིན་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མའི་གསུང་ཆོས་བསྩལ་རྒྱུ་ཡིན་འདུག
