༢༠༡༥ ཟླ་ ༡ ཚེས་ ༢༧་རེས་གཟའ་ཟླ་བ།
༄༅། །ཕྱི་ལོ་ ༢༠༡༥ ཟླ་ ༡ ཚེས་ ༢༤ དང་ ༢༥ བཅས་ཉིན་གྲངས་གཉིས་རིང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱིས་གོ་སྒྲིག་འོག རྒྱ་གར་ལྷོ་ཕྱོགས་སྦེང་ལོར་དུ་རྟེན་གཞི་བྱས་པའི་ནི་ལ་མངྒལ་ལས་རིགས་སྦྱོང་བརྡར་བསྟི་གནས་ཁང་དུ་སྦྱོང་བརྡར་གནང་བཞིན་པའི་སློབ་ཕྲུག་གྲངས་ ༣༦ ལ་འབྱུང་འགྱུར་བོད་མིའི་ཚོང་ལས་ནུས་ཤུགས་གོང་སྤེལ་གཏོང་ཐབས་དང་འབྲེལ་བའི་ཟབ་སྦྱོང་གནང་འདུག
དེ་ཡང་ཟབ་སྦྱོང་དབུ་འབྱེད་ཀྱི་མཛད་སྒོར་ནི་ལ་མངྒལ་ལས་རིགས་སྦྱོང་བརྡར་བསྟི་གནས་ཁང་གི་འགན་འཛིན་དགྲ་འདུལ་ལགས་ཀྱིས་ཕེབས་བསུའི་གསུང་བཤད་གནང་ཡོད། ཟབ་ཁྲིད་པའི་ཁོངས་སུ་བོད་མི་མང་སྤྱི་འཐུས་བུ་མོ་ཚེ་རིང་ལགས་དང་ རྒྱལ་སྤྱིའི་བོད་མིའི་ཆེད་ལས་མཐུན་ཚོགས་ཀྱི་ཚོགས་མི་བསྟན་འཛིན་པདྨ་ལགས། ཁྲིམས་ལུགས་རིག་པ་བའི་ཚོགས་པའི་དྲུང་ཆེ་བློ་བཟང་གྲགས་པ་ལགས་བཅས་ཡིན་འདུག
ཟབ་སྦྱོང་སྐབས་ནི་ལ་མངྒལ་ལས་རིགས་སྦྱོང་བརྡར་བསྟི་གནས་ཁང་གི་སློབ་ཟུར་བསྟན་འཛིན་ཚེ་འཕེལ་དང་བློ་བཟང་བསྟན་པ་རྣམ་གཉིས་ཀྱིས་རང་ཉིད་ཀྱི་མྱོང་ཚོར་སྐོར་གསུངས་འདུག དེ་བཞིན་ཟབ་སྦྱོང་སྐབས་ནང་སྲིད་ལས་ཁུངས་ཀྱི་བུད་མེད་ནུས་ཤུགས་གོང་སྤེལ་ཚན་པའི་འབྲེལ་མཐུད་པ་ཀརྨ་སྒྲོལ་མ་ལགས་ཀྱིས་བོད་མིའི་སྒྲིག་འཛུགས་ཀྱི་བུད་མེད་ནུས་ཤུགས་གོང་སྤེལ་གཏོང་ཐབས་ཀྱི་སྲིད་བྱུས་དང་སྐོར་རྒྱག་བུན་གཏོང་མ་དངུལ་སོགས་ཀྱི་སྐོར་ངོ་སྤྲོད་གནང་། ཐེངས་འདིའི་ཟབ་སྦྱོང་གི་དམིགས་ཡུལ་གཙོ་བོ་ནི་ཟབ་སྦྱོང་བ་རང་ཉིད་ལ་གདེང་སྤོབས་དང་ཡིད་ཆེས་གོང་མཐོར་གཏོང་ཐབས། དེ་བཞིན་བུད་མེད་ནུས་ཤུགས་གོང་སྤེལ་གཏོང་ཐབས་ཀྱི་སྐོར་གོ་རྟོགས་ཡོང་ཆེད་ཡིན་འདུག
