༢༠༡༥ ཟླ་ ༡ ཚེས་ ༡༢ རེས་གཟའ་ཟླ་བ།

༄༅། །ཕྱི་ལོ་ ༢༠༡༥ ཟླ་ ༡ ཚེས་ ༡༡ ཉིན་རྒྱ་གར་གྱི་རྒྱལ་ས་ལྡི་ལིར་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་རྒྱ་བལ་འབྲུག་གསུམ་ནང་གི་ཕྱི་མི་གནས་སྤོའི་འབྲེལ་ཡོད་བློན་ཆེན་ལྕམ་སྐུ་ཤ་ནོན་ཕ་ར་སར་ Ms. Shannon Fraser མཆོག་དང་ལྷན་མཇལ་འཕྲད་ཀྱིས་འཚམས་འདྲི་ཞུས་འདུག དེ་ཡང་གོང་ཚེས་ཉིན་ནང་སྲིད་བཀའ་བློན་མཆོག་གིས་བློན་ཆེན་མཆོག་ལ་འཚམས་འདྲིའི་མཇལ་དར་ཕུལ་བ་དང་ལྷན། ཁེ་ན་ཌའི་གཞུང་ངོས་ནས་ད་བར་བོད་དོན་ཐོག་རྒྱབ་སྐྱོར་གནང་བར་ཐུགས་རྗེ་ཞུས་ཡོད་པ་མ་ཟད། ད་ལྟ་འགྲོ་བཞིན་པའི་ཁེ་ན་ཌར་བོད་མི་གཞིས་སྤོས་ཀྱི་ལས་གཞིའི་སྐོར་འགྲེལ་བརྗོད་གནང་འདུག དེ་བཞིན་བཀའ་བློན་མཆོག་གིས་དོགས་སེལ་དགོས་པའི་གནད་དོན་ཆུང་ཙག་ཁག་གཅིག་གི་ཐོག་ལམ་སྟོན་ཡང་ཞུས་ཡོད་འདུག

སྐབས་དེར་བློན་ཆེན་ལྕམ་སྐུ་ཤ་ནོན་ཕ་ར་སར་མཆོག་དང་ཁོང་གི་ཕྱག་རོགས་ལྕམ་སྐུ་ལི་ལི་ཡན་ Lillian Zadravetz ལགས་རྣམ་གཉིས་ཀྱིས་ཀྱང་བོད་མི་སྐུ་ཚབ་རྣམ་པར་གནས་ཚུལ་ཞིབ་ཕྲ་ངོ་སྤྲོད་གནང་བར་ཐུགས་རྗེ་ཆེ་ཞུས་པ་དང་སྦྲགས། ཁེ་ན་ཌར་བོད་མི་གཞིས་སྤོས་ཀྱི་ལས་གཞི་འདི་མདུན་བསྐྱོད་བྱེད་བཞིན་པར་འདོད་བློ་ཁེངས་པོ་བྱུང་ཡོད་པའི་རྣམ་པ་ཤུགས་ཆེ་སྟོན་འདུག དེ་བཞིན་ཁོང་རྣམ་གཉིས་ཀྱིས་དོགས་སེལ་དགོས་པའི་གནད་དོན་དེ་དག་གི་ཐོག་གཟིགས་ཞིབ་གནང་རྒྱུའི་ཁས་ལེན་ཡང་གནང་འདུག དེ་ཉིན་ལྡི་ལི་སྐུ་ཚབ་དོན་ཁང་གི་དྲུང་ཆེ་ཚེ་དབང་རྒྱལ་པོ་ལགས་ཀྱང་ལྷན་བཅར་ཞུས་འདུག