ཕྱི་ལོ་ ༢༠༡༥ ཟླ་ ༡ ཚེས་ ༣༠ རེས་གཟའ་ཕུར་བུ།
༄༅། །ཕྱི་ལོ་ ༢༠༡༥ ཟླ་ ༡ ཚེས་ ༢༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ལྡི་ལི་གཙུག་ལག་སློབ་གཉེར་ཁང་གི་ཁྱབ་ཁོངས་སུ་ཡོད་པའི་ཀ་ལིན་ཌི་ (Kalindi College) བུད་མེད་མཐོ་སློབ་ཀྱིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར། བཀའ་བཞེས་བཟང་པོ་ཐོབ་སྟེ་བྱམས་བརྩེ་དང་ཤེས་ཡོན་ཞེས་པའི་བརྗོད་གཞིའི་ཐོག་བཀའ་སློབ་སྩལ་འདུག དེ་ཡང་༸གོང་ས་མཆོག་ཀ་ལིན་ཌི་མཐོ་སློབ་ཏུ་༸ཞབས་སོར་འཁོད་སྐབས་ལྡི་ལི་གཙུག་ལག་སློབ་གཉེར་ཁང་གི་ཉེ་བའི་རིག་བདག་སྐུ་ཞབས་ཌི་ནེ་ཤི་སིངྒ་ (Dr Prof. Dinesh Singh) ལགས་ཀྱིས་གཙོས་མཐོ་སློབ་དེའི་སློབ་སྤྱི་དང་སློབ་སྤྱི་གཞོན་པ། དགེ་ལས་སློབ་ཕྲུག་ཉིས་སྟོང་བརྒལ་བས་ཕེབས་བསུའི་སྣེ་ལེན་གཟབ་རྒྱས་ཞུས་འདུག
དེ་རྗེས་ཁོང་རྣམ་གཉིས་ཀྱིས་མགོན་པོ་གང་ཉིད་མཆོག་ལ་སྔ་དྲོའི་གསོལ་ཇ་འདེགས་འབུལ་ཞུས་ཡོད་པ་དང་། སྐབས་དེར་ཁོང་རྣམ་པས་ཤེས་ཡོན་ནང་ཕོ་མོ་འདྲ་མཉམ་དང་འབྲེལ་བའི་གནད་དོན་ཐོག་གླེང་སློང་མཛད་ཡོད་འདུག དེ་ནས་༸གོང་ས་མཆོག་གིས་མཐོ་སློབ་དེའི་བསྐྱར་བཟོ་གནང་བའི་ཚོགས་ཁང་གསར་པ་དབུ་འབྱེད་མཛད་རྗེས་མགོན་པོ་གང་ཉིད་མཆོག་གིས་ལྡི་ལི་གཙུག་ལག་སློབ་གཉེར་ཁང་གི་ཁྱབ་ཁོངས་སུ་ཡོད་པའི་མཐོ་སློབ་ཁག་གི་དགེ་ལས་སློབ་ཕྲུག་རྣམས་ལ་བྱམས་བརྩེ་དང་ཤེས་ཡོན་ཞེས་པའི་བརྗོད་གཞིའི་ཐོག་བཀའ་སློབ་སྩལ་དོན། བཀུར་འོས་གཅེན་གཅུང་རྣམ་པ་ང་ཚོ་ཚང་མ་འགྲོ་བ་མི་གཅིག་མཚུངས་ཡིན་སྟབས། ང་ཚོས་ཤེས་ཡོན་དང་། སྤྱི་ཚོགས། ལས་རིགས། ཁྱིམ་ཚང་སོགས་ཀྱི་ཁྱད་པར་ལ་མ་ལྟོས་པར་འགྲོ་བ་མི་གཅིག་གྱུར་གྱི་འདུ་ཤེས་འཛིན་རྒྱུ་ཧ་ཅང་གལ་ཆེན་པོ་ཆགས་ཡོད། ང་ཚོ་འགྲོ་བ་མིར་འཕྲད་བཞིན་པའི་དཀའ་ངལ་མང་ཆེ་བ་ང་ཚོས་རིམ་པ་གཉིས་པའི་སྟེང་ནས་དབྱེ་བ་ཕྱེ་པར་བརྟེན་བྱུང་བཞིན་ཡོད། ད་ཆ་ང་ཚོར་སྤྱི་ཚོགས་ནང་མིའི་གཞི་རྩའི་རང་བཞིན་དུ་ཡོད་པའི་བྱམས་བརྩེའི་ནུས་པ་དེ་སྤྱི་ཚོགས་ནང་གོང་སྤེལ་གཏོང་རྒྱུའི་འགན་འཁྲི་ཡོད།
དེང་གི་སྤྱི་ཚོགས་ནང་ནང་སེམས་ཀྱི་བྱམས་བརྩེ་གོང་འཕེལ་ཡོང་ཆེད་བུད་མེད་ཚོར་ནུས་པ་དམིགས་བསལ་ཡོད། ཤེས་ཡོན་གྱི་ཕོ་མོའི་དབར་འདྲ་མཉམ་ཡོང་རྒྱུར་ཕན་ཐོགས་ཡོད་ཀྱང་། འཛམ་གླིང་འདིའི་སྟེང་ད་དུང་མུ་མཐུད་ཕོའི་དབང་བསྒྱུར་བྱས་ནས་བསྡད་ཡོད་སྟབས། ཤེས་ཡོན་ཁོ་ནའི་མི་ཚེ་བདེ་སྐྱིད་ལྡན་པ་ཞིག་བསྐྲུན་རྒྱུ་དཀའ་ལས་ཁག་པོ་ཡིན་པར་བརྟེན། གཞན་གཅེས་འཛིན་གྱི་བྱམས་བརྩེ་དང་ལྡན་པའི་འགན་ཡོད་པའི་ཤེས་ཡོན་སྤྲོད་རྒྱུ་ཧ་ཅང་གལ་ཆེན་པོ་རེད། ཤེས་ཡོན་ཁོ་ནའི་མི་ཚེའི་བདེ་སྐྱིད་སྤྲོད་རྒྱུར་འདང་གི་མེད་སྟབས། ཤེས་ཡོན་གྱི་ཐོག་ནས་ནང་སེམས་ཀྱི་བྱམས་པ་དང་བརྩེ་གོང་འཕེལ་ཡོང་རྒྱུར་གལ་གནད་ཆགས་ཡོད་པ་མ་ཟད། སྐྱེ་དངོས་རིག་པའི་ཐོག་ནས་བུད་མེད་ཚོས་མིའི་འཚོ་བའི་བདེ་སྡུག་ལ་བསམ་བློ་མང་བ་བཏང་གི་ཡོད་པ་བཤད་པ་ལྟར། ཚན་པ་རིག་པ་ཚོས་ཀྱང་དེ་ལྟར་བཤད་ཀྱི་ཡོད།
དེར་བརྟེན་བུད་མེད་ཚོས་དམིགས་བསལ་འབད་བརྩོན་ཐོག་དེང་གི་སྤྱི་ཚོགས་ནང་ནང་སེམས་ཀྱི་བྱམས་བརྩེ་གོང་འཕེལ་ཡོང་ཆེད་འགན་མང་ཙམ་བཞེས་དགོས། ཞེས་དང་། དེ་བཞིན་མགོན་པོ་གང་ཉིད་མཆོག་གིས་མི་དབུལ་ཕོངས་ཚོར་སྤྱི་ཚོགས་ནང་དཔལ་འབྱོར་མེད་པ་མ་གཏོགས་ཁོང་ཚོར་ཡང་འགྲོ་བ་མི་གཞན་ལྟར་རྣམ་དཔྱོད་ཀྱི་ནུས་པ་གཅིག་མཚུངས་ཡོད་སྐོར་བཀའ་སློབ་སྩལ་དོན། མི་དབུལ་ཕོངས་ཚོར་དཔལ་འབྱོར་མེད་པར་བརྟེན་སྤྱི་ཚོགས་ནང་རྗེས་ལུས་ཐེབས་ནས་བསྡད་ཡོད་པར་བརྟེན། ད་དུང་ཡང་མི་རིགས་དབྱེ་འབྱེད་ཀྱི་དཀའ་ངལ་རིགས་ལ་ང་ཚོས་དོ་སྣང་མང་ཙམ་སྤྲད་རྒྱུ་གལ་ཆེན་པོ་ཆགས་ཡོད། ཁོང་ཚོ་ཡང་ང་ཚོ་ལྟར་འགྲོ་བ་མི་གཅིག་མཚུངས་ཡིན་པ་མ་ཟད། ཁོང་ཚོར་དཔལ་འབྱོར་གྱི་དཀའ་ངལ་ཡོད་པ་མ་གཏོགས་འགྲོ་བ་མིར་ཡོད་པའི་རྣམ་དཔྱོད་ཀྱི་ནུས་པ་གཅིག་མཚུངས་ཡོད། 
དེར་བརྟེན་ཤེས་ཡོན་ནི་དབུལ་ཕྱུག་དབར་གྱི་བར་ཁྱད་ཆུང་དུ་གཏོང་རྒྱུའི་ལག་ཆ་གལ་ཆེན་པོ་ཞིག་ཆགས་ཡོད་སྟབས། རྒྱ་གར་ཡར་རྒྱས་འགྲོ་རྒྱུར་དགག་རྩ་བཟོ་མཁན་གྱི་སྐྱོན་ཆ་དེ་དག་ཤེས་ཡོན་གྱི་ཐོག་ནས་མེད་པ་བཟོ་རྒྱུ་ཧ་ཅང་གལ་ཆེན་པོ་ཆགས་ཡོད། ཅེས་དང་། གཞན་ཡང་༸གོང་ས་མཆོག་གིས་རྒྱ་གར་ནང་གནའ་རབས་ནས་དར་བའི་འཚེ་མེད་ཞི་བའི་ལྟ་གྲུབ་དང་ཆོས་ལུགས་མཐུན་སྒྲིལ། དེ་བཞིན་རྒྱ་གར་ལ་གནའ་རབས་ནས་ཡོད་པའི་སེམས་ཁམས་རིག་པ་སོགས་ཀྱི་ཐོག་དོ་སྣང་དང་གཅེས་འཛིན་གནང་རྒྱུ་གལ་ཆེན་པོ་ཡིན་སྐོར་སོགས་ཀྱི་བཀའ་སློབ་སྩལ་གྲུབ་རྗེས་སློབ་མ་རྣམས་ཀྱི་དྲི་བར་བཀའ་ལན་སྩལ་ཡོད་འདུག
