༢༠༡༤ ཟླ་ ༡༢ ཚེས་ ༡༢ རེས་གཟའ་པ་སངས།

༄༅། །ཕྱི་ལོ་ ༢༠༡༤ ཟླ་ ༡༢ ཚེས་ ༡༠ ཉིན་བོད་མི་དང་ཨུ་རུ་སུ། བྷུ་རི་ཡ་ཏི། ཁལ་མུཀ ཐུ་ཝ། བོད་དོན་རྒྱབ་སྐྱོར་བ། བོད་མིའི་གྲོགས་པོ་བཅས་ཨུ་རུ་སུའི་རྒྱལ་ས་མོ་སི་ཁོར་ Moscow འདུ་འཛོམས་གནང་ནས་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་ནས་མི་ལོ་ ༢༥ འཁོར་བའི་མཛད་སྒོ་སྲུང་བརྩི་གཟབ་རྒྱས་ཞུས་འདུག མཛད་སྒོ་དེ་བཞིན་ཨུ་རུ་སུ་བོད་ཀྱི་སྐུ་ཚབ་དོན་གཅོད་ཁང་དང་། མོ་སི་ཁོར་རྟེན་གཞི་བྱས་པའི་བླ་མ་ཙོང་ཁ་པའི་ཆོས་ཚོགས། ཀ་ལིངྒ་ནོར་བུ་བསྟི་གནས་ཁང་། མོ་སི་ཁོར་རྟེན་གཞི་བྱས་པའི་བོད་ཁང་བཅས་ཐུན་མོང་གིས་གོ་སྒྲིག་གནང་བ་ཞིག་ཡིན་འདུག དེ་ཡང་གོང་ཚེས་ཉིན་མཛད་སྒོའི་ཐོག་མར་ཨུ་རུ་སུ་སྤྱི་མཐུན་ནང་བླ་མ་ཙོང་ཁ་པའི་ཆོས་ཚོགས་ཀྱི་དགེ་བཤེས་བྱམས་པ་འཕྲིན་ལས་ལགས་དབུ་བཞུགས་ཐོག ༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཞབས་པད་བསྐལ་བརྒྱར་བརྟན་ཅིང་ཐུགས་ཀྱི་བཞེད་དགོངས་ཐ་དག་ལྷུན་གྱི་བསྒྲུབ་ཆེད་སྨོན་ལམ་གསུང་འདོན་གནང་། དེ་རྗེས་ཨུ་རུ་སུ་སྐུ་ཚབ་དོན་གཅོད་ངག་དབང་རབ་རྒྱལ་ལགས་ཀྱིས་དེར་འདུས་མང་ཚོགས་རྣམས་ལ་འཚམས་འདྲི་ཞུས་པ་དང་སྦྲགས། དུས་ཆེན་ངོ་སྤྲོད་དང་འབྲེལ་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་མཛད་འགན་གཙོ་བོ་གསུམ་གྱི་སྐོར་གསུང་བཤད་གནང་གྲུབ་མཚམས། ཀ་ལིངྒ་ནོར་གླིང་བསྟི་གནས་ཁང་གི་ངེས་སྟོན་པ་ལྕམ་ན་ཏ་ལི་ཡ་ Ms. Natalia Kniazeva ལགས་དང་། མོ་སི་ཁོར་རྟེན་གཞི་བྱས་པའི་བོད་ཁང་གི་འགན་འཛིན་གཞོན་པ་ལྕམ་སྐུ་ནདྱ་བྷར་ཀེམ་ཇམ་ Mrs. NadyaBerkengeym ལགས་རྣམ་གཉིས་ཀྱིས་༸གོང་ས་མཆོག་གི་མཛད་འཕྲིན་དང་ཐུགས་ཀྱི་འཆར་སྣང་སྐོར་སོགས་ངོ་སྤྲོད་གནང་ཡོད།།

གཞན་ཡང་སྐབས་དེར་ཨུ་རུ་སུ་དང་། ཁལ་མུཀ། བྷུ་རི་ཡ་ཏི་བཅས་ཀྱི་སྒྱུ་རྩལ་བ་རྣམས་ཀྱིས་༸གོང་ས་མཆོག་ལ་བསྟོད་གླུ་ཕུལ་བ་དང་སྦྲགས། གཞས་སྣ་འདྲ་མིན་འཁྲབ་སྟོན་གནང་བ་མ་ཟད། ཕྱི་ལོ་ ༢༠༡༡ ལོར་༸གོང་ས་མཆོག་གིས་རྒྱལ་སྤྱིའི་ནང་པའི་ལྷན་ཚོགས་ཐོག་སྩལ་བའི་བཀའ་སློབ་དེ་ཨུ་རུ་སུའི་སྐད་ཐོག་ཕབ་བསྒྱུར་ཞུས་པའི་གློག་བརྙན་དང་། དེ་བཞིན་ཨུ་རུ་སུའི་སྐད་ཐོག་བོད་མིའི་སྒྲིག་འཛུགས་ཀྱིས་རྒྱུན་སྐྱོང་གནང་བཞིན་པ་དབུ་མའི་ལམ་གྱི་སྲིད་བྱུས་སྐོར་དུས་ཐུང་གློག་བརྙན་ཞིག་ཀྱང་མང་ཚོགས་རྣམས་ལ་བསྟན་རྗེས་མཛད་སྒོ་རྒྱལ་ཁའི་ངང་གྲུབ་འདུག །