༢༠༡༤ ཟླ་ ༡༢ ཚེས་ ༣༡ རེས་གཟའ་ལྷག་པ།
༄༅། །འདི་ག་ཕྱི་དྲིལ་བོད་ཡིག་ཚན་པའི་གསར་འགོད་པ་ངག་དབང་ཐོགས་མེད་ཀྱིས་ས་གནས་ནས་བཏང་བའི་གནས་ཚུལ་ནང་འཁོད་དོན། ཕྱི་ལོ་ ༢༠༡༤ ཟླ་ ༡༢ ཚེས་ ༣༠ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་གིས་མོན་གྷོ་འདོད་རྒུ་གླིང་གཞིས་ཆགས་ཀྱི་ས་འཐུས་ཚོགས་ཁང་གསར་པའི་ནང་སྤྱི་འཐུས་དབུ་དཀར་ཚང་ཚེ་རིང་གཡུ་སྒྲོན་ལགས་ཀྱིས་གཙོ་སྐྱོང་འོག་རྒྱལ་སྤྱིའི་བོད་མིའི་ཁེ་ལས་ཚོགས་ཆེན་ཐོག་གསུང་བཤད་གནང་ཡོད། དེ་ཡང་ཐོག་མར་དཔལ་ལྡན་སྲིད་སྐྱོང་མཆོག་དང་སྐུ་ཞབས་སན་དིབ་མར་ཝ་ (Sandeep Marwah) ལགས་གཉིས་ནས་སྣང་གསལ་ཞལ་ཕྱེ་གནང་། དེ་རྗེས་བོད་མི་མང་སྤྱི་འཐུས་དབུ་དཀར་ཚང་གཡུ་སྒྲོན་ལགས་ནས་ངོ་སྤྲོད་ཀྱི་གསུང་བཤད་གནང་གྲུབ་བསྟུན། སྲིད་སྐྱོང་མཆོག་གིས་གསུང་བཤད་གནང་དོན། སྐྱབས་གནས་དགེ་འདུན་གྱི་སྡེ། དེ་བཞིན་མོན་གྷོ་འདོད་རྒུ་གླིང་གི་ས་གནས་ཚོགས་གཙོ་དང་མཉམ་སྦྲེལ། དེ་བཞིན་ས་གནས་འགོ་འཛིན། ལྷག་པར་ཚོགས་འདུར་མཉམ་ཞུགས་གནང་མཁན་སྐུ་མགྲོ་གཙོ་བོ་དང་ལམ་སྟོན་གསུང་བཤད་གནང་མཁན་བཅས་ཚང་མར་ཐོག་མར་བཀའ་ཤག་གི་ཚབ་ཞུས་ནས་ངོས་ཀྱིས་སྙིང་ཐག་པ་ནས་བཀྲ་ཤིས་བདེ་ལེགས་ཞུ་རྒྱུ་ཡིན།
ད་ལྟ་འདིར་༧གོང་ས་མཆོག་གིས་བརྙན་འཕྲིན་བརྒྱུད་བཀའ་སློབ་སྩལ་བ་ལྟར།
༧གོང་ས་མཆོག་གིས་ཉེ་ཆར་ཨ་རིའི་རྒྱལ་ས་ཝ་ཤིང་ཊོན་དུ་ཆིབས་སྒྱུར་བསྐྱངས་སྐབས་དམིགས་བསལ་བོད་མི་རྣམས་ལ་ཟུར་དུ་བཀའ་སློབ་གཅིག་ཕེབས་མཐར་ང་ཚོའི་སྤྱི་ཚོགས་ནང་ཨ་སྒོར་ས་ཡ་བདག་པོ་དང་དུང་འཕྱུར་བདག་པོ་དེ་འདྲ་འཐོན་དགོས་ཀྱི་འདུག་ཅེས་བཀའ་སློབ་སྩལ་སོང་། དེར་བརྟེན་རྒྱ་གར་གྱི་སྒོར་མོ་བརྩིས་ན་བོད་མིའི་ཁྲོད་དུང་འཕྱུར་དང་ཐེར་འབུམ་བདག་པོ་དེ་འདྲ་ཕལ་ཆེར་ཡོད། བཀའ་དེ་འདྲ་སྩལ་སྐབས་ང་ཚོའི་ངོས་ནས་ཀྱང་དམིགས་ཚད་མཐོ་ཙམ་བཞག་ནས་སྤྱི་ཚོགས་ནང་དཔལ་འབྱོར་གྱི་གནས་སྟངས་ཡར་རྒྱས་གཏོང་དགོས་པ་གལ་ཆེན་པོ་ཆགས་ཡོད། གཞི་རྩའི་སྤྱི་ཚོགས་ཁྱོན་ཡོངས་ཀྱི་ཐོག་ནས་ལྟ་སྐབས་ང་ཚོའི་མ་རྩ་དེ་ཆོས་དང་སྐད་ཡིག་རེད། ༧གོང་ས་མཆོག་དང་བོད་མི་མི་རབས་རྒན་པ་ཚོས་བཀའ་དྲིན་ལ་བརྟེན་ནས་ཉེ་བའི་ཆར་བོད་ཕྱི་ནང་གཉིས་ཀར་གཟིགས་པ་ཡིན་ནའང་། བོད་མིའི་ཆོས་དང་རིག་གཞུང་ཆ་ནས་སྤྱི་ཚོགས་ནང་མགོ་སྐྱག་ནས་འགྲོ་ཐུབ་པ་གཅིག་ཆགས་ཡོད། བོད་ནང་དུ་རྒྱ་ནག་གཞུང་གིས་བོད་ཀྱི་ཆོས་རིག་གཞུང་། སྐད་བཅས་ཚང་མ་གང་འདྲ་བྱས་ནས་རྩ་མེད་གཏོང་དགོས་འདུག་བསམས་ནས་འབད་བརྩོན་བྱས་ཡོད་ཀྱང་། ལོ་ལྔ་བཅུ་ཙམ་མར་ཕྱིར་མིག་ལྟ་སྐབས་ཆོས་དང་རིག་གཞུང་སྐད་ཡིག་དེ་དག་བདག་གཅེས་ཡག་ཐག་ཆོད་ཐུབ་པ་བྱུང་ཡོད།
དེ་བཞིན་༧གོང་ས་མཆོག་གིས་ཕྱི་ལོ་ ༢༠༠༨ ལོར་དམིགས་བསལ་ཚོགས་ཆེན་རེད། དེའི་སྔོན་དུའང་བཀའ་སློབ་ཞིག་སྩལ་བའི་ནང་ང་ཚོ་བཙན་བྱོལ་ལ་འབྱོར་རྗེས་ལོ་ཤས་རིང་ཐོམ་མ་སངས་པར་ལུས་པ་ཞིག་ལ་བརྩི་ཆོག་ཀྱང་དེ་རྗེས་ལོ་ཉི་ཤུ་རྩ་གྲངས་གི་རྗེས་འཐུས་ཤོར་འགྲོ་རྒྱུ་དེ་ཤེས་ཡོན་ཐོག་ཏན་ཏན་འཐུས་ཤོར་ཕྱིན་འདུག བཀའ་ཤག་ནས་དེའི་ཐོག་དམིགས་བསལ་འགན་ཁུར་ཐོག་ཤེས་ཡོན་ཡར་རྒྱས་ཆེད་འབད་བརྩོན་བྱེད་དགོས་པ་བཀའ་སློབ་ཕེབས་ཡོད། དེར་བརྟེན་བཀའ་བློན་རྣམ་པ་དང་སྲིད་སྐྱོང་ཆེད་མངགས་སློབ་གྲྭ་ཁག་གི་ནང་བཅར་ནས་དམིགས་བསལ་སློབ་ཕྲུག་དང་ལྷན་དུས་ཚོད་བཏང་ནས་ཤེས་ཡོན་གལ་ཆེན་པོ་ཡིན་སྐོར་གཏམ་བཤད་བྱེད་ཀྱི་ཡོད། དཔེར་ན་ཕྱི་ལོ་ ༢༠༡༠ ལོར་འཛིན་རིམ་བཅུ་གཉིས་ཡིག་རྒྱུགས་བཏང་ནས་བརྒྱ་ཆ་བརྒྱ་བཅུ་ལོན་མཁན་སློབ་ཕྲུག་བརྒྱ་དང་ཉི་ཤུ་རྩ་བདུན་ཙམ་བྱུང་འདུག ཐེངས་འདིར་ཕྱི་ལོ་ ༢༠༡༤ ལོར་བརྒྱ་ཆ་བརྒྱ་བཅུ་ཡན་ལོན་མཁན་སློབ་ཕྲུག་གསུམ་བརྒྱ་ཉི་ཤུ་རྩ་གཅིག་བྱུང་འདུག དེར་བརྟེན་བརྒྱ་ཆ་བརྒྱ་དང་ལྔ་བཅུ་ཙམ་འཕར་བ་བྱུང་ཡོད། ཕྱི་ལོ་ ༢༠༠༤ ལོར་ཤེས་རིག་ལས་ཁུངས་ཀྱིས་མཐོ་སློབ་སློབ་ཡོན་ཆེད་སྒོར་འབུམ་ ༨༩ རེད། ཐེངས་འདིར་མཐོ་སློབ་ཁག་ཏུ་སློབ་ཡོན་ཆེད་ཤེས་རིག་ལས་ཁུངས་ནས་འབུམ་གསུམ་བརྒྱ་བཞི་བཅུ་ཙམ་གཏོང་གི་ཡོད། ཅེས་སོགས་ཀྱི་གསུང་བཤད་གནང་།
དེ་ཡང་ཉིན་གཉིས་ཀྱི་ལྷན་ཚོགས་སྐབས་དེར་ཁེ་ལས་པའི་གནས་སྟངས་ཡར་རྒྱས་ཇི་ལྟར་གཏོང་ཐུབ་མིན་དང་།རང་ཉིད་ཡར་རྒྱས་གཏོང་རྒྱུ་ཙམ་མིན་པར་སྤྱི་ཚོགས་ནང་ཡར་རྒྱས་ཇི་ལྟར་གཏོང་ཐུབ་མིན་སྐོར་གོ་བསྡུར་གནང་འདུག སྤྱིར་རྒྱལ་སྤྱིའི་བོད་མིའི་ཁེ་ལས་ལྷན་ཚོགས་ཀྱི་དམིགས་ཡུལ་གཙོ་བོ་བཞི་སྟེ། ཤེས་ཡོན་དང་དཔལ་འབྱོར་ཡར་རྒྱས། རྒྱལ་སྤྱིའི་འབྲེལ་ལམ། འཕྲོད་བསྟེན་བཅས་རེད། དེ་ཡང་ལྷན་ཚོགས་སུ་སྐྲ་བཟོ་དང་ཟ་ཁང་། མགྲོན་ཁང་། ཚོང་ཁང་། གློག་ཀླད་སྡེ་ཚན། སློབ་གྲྭ ཨར་ལས། བཟོ་གྲྭ། འཛུགས་སྤྲུན་ལས་གཞི། བཅས་ལས་རིགས་འདྲ་མིན་བཅུ་ནས་ཁེ་ལས་དོན་གཉེར་བ་རྒྱ་གར་དང་བལ་ཡུལ་དེ་བཞིན་དབྱིན་ཡུལ་དང་པོ་ལེན་ཌི་སོགས་ནས་མི་གྲངས་ ༥༠ ཕེབས་འདུག གཞན་ཡང་སྐབས་དེར་བོད་མིའི་སྤྱི་མཐུན་མཉམ་སྦྲེལ་གྱི་འགན་འཛིན་བཀྲ་ཤིས་དབང་བསྡུས་ལགས་སོགས་ཀྱིས་གཙོས་འབྲེལ་ཡོད་ལས་བྱེད་རྣམས་ཕེབས་འདུག ཕྱི་ཚེས་ ༣༠ ཉིན་གྱི་ཕྱེད་ཡོལ་དུ་སྲིད་སྐྱོང་མཆོག་གི་ མོན་གྷོའི་ནང་གཞུང་དོན་ལས་དོན་རྣམས་ཡོངས་སུ་ལེགས་གྲུབ་ཀྱིས་ཕེབས་ཐོན་གནང་བ་བཅས།།
