༢༠༡༤ ཟླ་ ༡༢ ཚེས་ ༦ རེས་གཟའ་སྤེན་པ།
༄༅། །ཕྱི་ལོ་ ༢༠༡༤ ཟླ་ ༡༢ ཚེས་ ༥ ཉིན་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་ལ་ཕ་རན་སིའི་གྲོས་ཚོགས་འཐུས་མི་དང་སྦེག་ལེ་སིའི་ Begles གྲོང་སྡེའི་སྤྱི་ཁྱབ་པ་ Mayor སྐུ་ཞབས་ནོ་ཝེལ་མ་མེར་ Mr. Noel Mamere མཆོག་གིས་གྲོང་སྡེའི་ཚོགས་ཁང་ནང་དུ་ཕེབས་བསུ་གཟབ་རྒྱས་ཞུས་འདུག ཐེངས་འདིར་ཕྱི་དྲིལ་བཀའ་བློན་མཆོག་ཕ་རན་སིའི་ནང་ཉིན་དྲུག་རིང་གཞུང་འབྲེལ་ཕྱོགས་ཕེབས་གནང་སྐབས། བཀའ་བློན་མཆོག་གིས་ཡུལ་དེའི་རྫོང་ཆེ་ཁག་ལྔ་སྟེ་བྷོག་རྡོ་ Bordeaux དང་ཊོ་ལུ་སི་ Toulouse ལ༌ཝོར་ Lavaur པེ་རི་སི་ Paris གི་རིན་ནོ་བེལ་ Grenoble བཅས་ནང་ཕེབས་ནས་མང་ཚོགས་དང་ལྷན་ཚོགས་ལ་གསུང་བཤད་གནང་རྒྱུ་དང་། གྲོས་ཚོགས་འཐུས་མི་མཇལ་འཕྲད། དེ་བཞིན་བོད་དོན་རྒྱབ་སྐྱོར་ཚོགས་མི་དང་ས་གནས་བོད་རིགས་བཅས་ལ་གསུང་བཤད་གནང་རྒྱུ་ཡིན་འདུག
དེ་ཡང་གོང་ཚེས་ཉིན་ཕྱི་དྲིལ་བཀའ་བློན་མཆོག་བྷོག་རྡོའི་ནང་ཕེབས་ནས་ཁུལ་དེའི་གྲོང་ཁྱེར་སྦེག་ལེ་སིའི་ནང་ཕེབས་འབྱོར་སྐབས་ཚོགས་ཁང་གི་ཕྱི་རོལ་དུ་བོད་ཀྱི་རྒྱལ་དར་འགྲེངས་འཛུགས་གནང་ནས་ཕྱི་དྲིལ་བཀའ་བློན་མཆོག་ལ་གུས་བརྩི་ཞུས་འདུག གཞན་ཡང་སྐབས་དེར་གི་རིན་ནོ་བེལ་རྫོང་གི་གྲོས་ཚོགས་འཐུས་མི་ལྕམ་སྐུ་མཱ་རི་ཡ་རི་ཀལ་ཌེ་ Ms. Marie Ricaldeམཆོག་ཀྱང་ཕེབས་འདུག
སྐབས་དེར་ཕྱི་དྲིལ་བཀའ་བློན་མཆོག་གིས་ཕ་རན་སིའི་གྲོས་ཚོགས་འཐུས་མི་རྣམས་དང་མཇལ་འཕྲད་སྐབས་ད་ལྟའི་བོད་ནང་གི་ཛ་དྲག་གནས་སྟངས་སྐོར་གོ་རྟོགས་སྤེལ་རྒྱུ་གལ་ཆེ་ཡིན་པ་མ་ཟད། ལྷག་པར་གཞོན་སྐྱེས་ཚོར་བོད་ཀྱི་གནས་སྟངས་སྐོར་གོ་རྟོགས་སྤེལ་རྒྱུ་གལ་ཆེ་ཡིན་པ་དང་། བོད་མིའི་སྒྲིག་འཛུགས་ཀྱིས་འཚེ་མེད་ཞི་བའི་ཐོག་གྲོས་མོལ་གྱི་ལམ་ནས་བོད་རྒྱ་མི་རིགས་གཉིས་སྨན་ཆེད་དབུ་མའི་ལམ་གྱི་སྲིད་བྱུས་རྒྱུན་སྐྱོང་ཐོག་བོད་ཀྱི་གནད་དོན་སེལ་ཐབས་བྱེད་བཞིན་ཡོད་སྐོར་འགྲེལ་བརྗོད་གནང་སྐབས་གྲོས་ཚོགས་འཐུས་མི་རྣམས་ནས་དོ་སྣང་ཧ་ཅང་གནང་འདུག་པ་མ་ཟད། བོད་དོན་འཐབ་རྩོད་ལ་མུ་མཐུད་རྒྱབ་སྐྱོར་གནང་རྒྱུའི་ཆོད་སེམས་བརྟན་པོ་ཡོད་པའི་རྣམ་འགྱུར་གསལ་སྟོན་གནང་འདུག
དེ་ཉིན་ཕྱེད་ཡོལ་དུ་བྷོག་རྡོའི་གཙུག་ལག་སློབ་གྲྭའི་སྲིད་དོན་ཚན་རིག་བསྟི་གནས་ཁང་དུ་མགྲོན་འབོད་ཐོག་ཕྱི་དྲིལ་བཀའ་བློན་མཆོག་གིས་བོད་མིའི་འཐབ་རྩོད་སྤྱི་དང་། ད་ལྟའི་བོད་ནང་གི་གནས་སྟངས་དང་། དེ་བཞིན་དབུ་མའི་ལམ་གྱི་སྲིད་བྱུས་ཀྱི་བྱུང་རིམ་སྐོར་གསུང་བཤད་གནང་སྐབས་སློབ་ཕྲུག་གཙོ་བོར་གྱུར་བའི་དོན་གཉེར་ཅན་མི་གྲངས་བརྒྱ་ལྷག་གིས་དོ་སྣང་ཆེན་པོ་གནང་འདུག གསུང་བཤད་གྲུབ་བསྟུན་ཚོགས་བཅར་བ་རྣམས་ཀྱི་དྲི་བར་ལན་འདེབས་དང་གསལ་བཤད་ཞིབ་ཕྲ་གནང་འདུག དྲི་བ་དེ་དག་ཁྲོད་བོད་མིའི་འཐབ་རྩོད་ཀྱི་བྱུང་རབས་ལོ་རྒྱུས་སྐོར་དང་། ད་ལྟའི་བོད་ནང་གི་གནས་སྟངས་དང་༸རྒྱལ་བའི་ཡང་སྲིད་སྐོར་སོགས་ཡིན་འདུག
དེ་རྗེས་བཀའ་བློན་མཆོག་གིས་བཀྲ་ཤིས་བདེ་ལེགས། ཞེས་བྷོག་རྡོ་རྫོང་གི་ས་གནས་བོད་དོན་རྒྱབ་སྐྱོར་ཚོགས་པའི་ཚོག་མི་རྣམས་དང་ཐུག་འཕྲད་གནང་ནས་ཁོང་རྣམས་ཀྱིས་ད་བར་བོད་དོན་ཐོག་རྒྱབ་སྐྱོར་གནང་བར་ཐུགས་རྗེ་ཆེ་གསུངས་པ་དང་སྦྲགས། འབྱུང་འགྱུར་ཡང་ཆོད་སེམས་འགྱུར་མེད་ཐོག་བོད་དོན་ཆེད་རྒྱབ་སྐྱོར་མུ་མཐུད་གནང་རྒྱུའི་འབོད་སྐུལ་གནང་བ་དང་ཆབས་གཅིག རྒྱ་ནག་གཞུང་གིས་བོད་ནང་གི་གནས་སྟངས་ཐོག་འཛམ་གླིང་ཕྱི་ལ་འཁྱོག་བཤད་ཀྱི་དྲིལ་བསྒྲགས་སྤེལ་བཞིན་པ་དེ་དག་ལ་གདོང་ལེན་བྱེད་ཆེད་བོད་ནང་གི་དངོས་ཡོད་གནས་ཚུལ་རྣམས་དྲིལ་བསྒྲགས་གང་ཆེ་གནང་རྒྱུར་རོགས་རམ་གནང་རོགས་ཞེས་འབོད་སྐུལ་གནང་འདུག དེ་ཡང་ཕྱི་དྲིལ་བཀའ་བློན་མཆོག་ཁུལ་དེའི་ལས་དོན་རྣམས་གྲུབ་རྗེས་ཊོ་ལུ་སི་ Toulouse རྫོང་དུ་ཕེབས་ཐོན་གནང་འདུག
.
