༢༠༡༤ ཟླ་ ༡༡ ཚེས་ ༡༨ རེས་གཟའ་མིག་དམར།
༄༅། །ཕྱི་ལོ་ ༢༠༡༤ ཟླ་ ༡༡ ཚེས་ ༡༤ ཉིན་ཨུ་རུ་སུའི་རྒྱལ་ས་མོ་སི་ཁོར་རྟེན་གཞི་བྱས་པའི་ན་རན་བོད་ཀྱི་སྨན་ཁང་ Naran Tibetan Medical Clinic གིས་གོ་སྒྲིག་འོག་སྨན་ཁང་དེ་ཉིད་བཙུགས་ནས་ད་བར་མི་ལོ་ ༢༥ འཁོར་བའི་དུས་དྲན་སྲུང་བརྩི་ཞུ་སླད་ཨུ་རུ་སུའི་ཕྱི་འབྲེལ་ལས་དོན་ཚན་པའི་ཌིབ་ལོ་མེ་ཊིག་ཨེ་ཁ་ཌེ་མི་ Diplomatic Academy ཞེས་པའི་ཚོགས་ཁང་ནང་བོད་ཀྱི་སྲོལ་རྒྱུན་གསོ་བ་རིག་པའི་སྐུ་ཐང་སྙན་གྲགས་ཆེ་བ་ཁག་འགྲེམས་སྟོན་ཐོག་མ་དེ་གོ་སྒྲིག་གནང་འདུག སྐབས་དེར་བོད་ཀྱི་གསོ་བ་རིག་པའི་གཞུང་ནས་བཏུས་པའི་སྐུ་ཐང་གྲངས་ ༧༧ ཡོད་པ་དང་། དེ་ཡང་སྐུ་ཐང་འགྲེམས་སྟོན་གྱི་མཛད་སྒོ་དབུ་འཛུགས་ཀྱིས་ཐོག་མར་ན་རན་བོད་ཀྱི་སྨན་ཁང་ཞེས་པའི་འགན་འཛིན་ལྕམ་སྐུ་སུ་ཝེ་ཏི་ལ་ན་གལ་སལ་ནོ་ཝ་ Dr. (Mrs.) Svetlana Galsalnova ལགས་ཀྱིས་སྐུ་མགྲོན་རྣམ་པར་ཕེབས་བསུའི་གསུང་བཤད་གནང་། དེ་རྗེས་ཁོང་གིས་མུ་མཐུད་བོད་ཀྱི་གསོ་བ་རིག་པའི་གལ་གནད་སྐོར་སོགས་འགྲེལ་བརྗོད་གནང་།
སྐབས་དེར་སོག་པོའི་གཞུང་ཚབ་པ་མཆོག་དང་སྐུ་ཚབ་དོན་གཅོད་ངག་དབང་རབ་རྒྱས་ལགས་སོགས་ཆེད་ཕེབས་གནང་འདུག་པ་མ་ཟད། སྐུ་ཚབ་དོན་གཅོད་ལགས་ཀྱིས་ཐེངས་འདིར་བོད་ཀྱི་གསོ་རིག་དང་འབྲེལ་བའི་སྐུ་ཐང་འགྲེམས་སྟོན་གོ་སྒྲིག་གནང་བར་ཐུགས་རྗེ་ཆེ་གསུངས་པ་མ་ཟད། བོད་ཀྱི་གསོ་རིག་སྐུ་ཐང་གི་གླེགས་བམ་འདི་ནི་བོད་མིའི་སྤྱི་ཚོགས་དཔལ་ཡོན་གྱི་རིན་ཐང་ཆེ་བའི་དངོས་རྫས་ཆེས་གལ་ཆེ་ཞིག་ཡིན་པ་དང་། གསོ་རིག་སྐུ་ཐང་འབྲི་སྲོལ་ཐོག་མ་དེ་སྡེ་སྲིད་སངས་རྒྱས་རྒྱ་མཚོས་དུས་རབས་ ༡༧ ནང་གསར་གཏོད་མཛད་པ་ཞིག་ཡིན་པ་དང་། བོད་ཀྱི་ཐུན་མིན་རིག་གཞུང་གི་ཁྱད་ནོར་དེ་དག་འཛམ་གླིང་གི་སྤྱི་རྫས་ཤིག་ཆགས་ཡོད་སྟབས། ཡར་ཐོན་ཧ་ཅང་ཆེ་བའི་སྤྱི་ཚོགས་ཀྱི་ཁོར་ཡུག་འདིའི་ནང་ཞབས་འདེགས་ཞུ་རྒྱུའི་ནུས་པ་ཧ་ཅང་ལྡན་ཡོད་པར་བརྟེན། བོད་ཀྱི་ཐུན་མིན་རིག་གཞུང་དེ་དག་བདག་གཅེས་གནང་རྒྱུ་ནི་འཛམ་གླིང་མི་མང་སྤྱི་ལ་འཁྲིས་པའི་བཟང་སྤྱོད་ཀྱི་ལས་འགན་ཞིག་ཆགས་ཡོད། ཅེས་གསུངས།
སྤྱིར་བོད་ཀྱི་གསོ་བ་རིག་པའི་གཞུང་ལུགས་ལས་བཏུས་པའི་སྐུ་ཐང་གི་གླེགས་བམ་དེ་དག་ཕྱི་ལོ་ ༡༩༢༠ སྐབས་༸གོང་ས་སྐུ་ཕྲེང་ ༡༣ པ་ཆེན་པོའི་སྐབས་བསྐྱར་དུ་པར་སྐྲུན་ཞུས་གནང་མཛད་འདུག དེ་ལྟར་མཛད་དགོས་དོན་གཙོ་བོ་ནི་སྐབས་དེར་བྷུར་ཡ་ཏི་ཨེམ་ཆི་འམ་སྨན་པ་ཁག་གཅིག་ལ་སྨན་སྦྱོང་ཆེད་ཡིན་འདུག གོང་བརྗོད་ལྟར་སྤྱིར་གསོ་རིག་སྐུ་ཐང་གི་གླེགས་བམ་ངོ་མ་འདི་སྡེ་སྲིད་སངས་རྒྱས་རྒྱ་མཚོས་ཕྱི་ལོ་ ༡༦༨༧།༡༧༠༣ སྐབས་བཟོ་བཀོད་མཛད་པ་ཞིག་ཡིན་པ་དང་།
དེང་སྐབས་ལྷ་སའི་ནང་ཞུགས་ཡོད། ཕྱི་ལོ་ ༡༩༩༤ ལོར་ཤོག་གྲངས་ ༥༨༧ ཡོད་པའི་བོད་ཀྱི་གསོ་རིག་གཞུང་དང་སྐུ་ཐང་གླེགས་བམ་དེ་དག་ཨུ་རུ་སུའི་སྐད་ནང་ཕབ་བསྒྱུར་ཞུས་འདུག སྤྱིར་དེང་སྐབས་ཨུ་རུ་སུ་གཙོ་བོར་གྱུར་བའི་འཛམ་གླིང་ས་ཕྱོགས་གང་སར་བོད་ཀྱི་སོ་བ་རིག་པའི་རྣམ་གཞག་ལ་དོ་སྣང་ཇེ་ཆེར་འགྲོ་བཞིན་ཡོད་པ་དང་། བོད་ཀྱི་སོ་བ་རིག་པའི་བརྒྱུད་བཞི་ཡང་ཨུ་རུ་སུའི་སྐད་ནང་ཕབ་བསྒྱུར་ཞུས་ཟིན་འདུག དེ་སྐབས་ཨུ་རུ་སུའི་ནང་བོད་པའི་གསོ་རིག་སྨན་པ་གྲངས་ ༡༠ བརྟག་དཔྱད་གནང་མུས་ཡིན་པ་དང་། ལྷག་པར་བོད་ཀྱི་སྨན་རྩིས་ཁང་གིས་མཐུན་འགྱུར་འོག་ཨུ་རུ་སུ་དང་ཨུ་རུ་སུའི་སྤྱི་མཐུན་རྒྱལ་ཁབ་ཁག་ནང་གསོ་རིག་སྨན་པ་ཆེད་གཏོང་ཞུས་དང་ཞུ་མུས་ཡིན་འདུག
