༢༠༡༤ ཟླ་ ༡༡ ཚེས་ ༡༩ རེས་གཟའ་ལྷག་པ།

༄༅། །དཔལ་ལྡན་སྲིད་སྐྱོང་མཆོག་ཕྱི་ལོ་ ༢༠༡༤ ཟླ་ ༡༡ ཚེས་ ༡༩ ཉིན་རྡ་ས་ནས་ལྡི་ལིར་ཕེབས་ཐོན་གནང་ནས་ཁུལ་དེར་ཕྱི་ཚེས་ ༢༠ ཉིན་གནད་ཡོད་མི་སྣ་དང་མཇལ་འཕྲད་གནང་ནས། ཉིན་དེར་ཨ་རིའི་གྲོང་ཁྱེར་ནི་ཝག་ (Newark) ཏུ་ཕེབས་ཐོན་གནང་ནས་ཕྱི་ཚེས་ ༢༡ ཉིན་ཕེབས་འབྱོར་གནང་ནས་ཉིན་དེར་ཁེ་ན་ཌའི་གྲོང་ཁྱེར་ཧ་ལི་ཕེག་སི་ Halifax ནང་ཕེབས་འབྱོར་གནང་རྒྱུ་དང་། ཕྱི་ཟླ་ ༡༡ ཚེས་ ༢༡ ནས་ ༢༦ བར་ཁེ་ན་ཌའི་གྲོང་ཁྱེར་ཧ་ལི་ཕེག་སི་Halifax རུ་རྒྱལ་སྤྱིའི་བདེ་འཇགས་གླེང་སྟེགས། (Halifax International security forum) ཞེས་པའི་ལྷན་ཚོགས་སུ་མཉམ་ཞུགས་གནང་རྒྱུ་དང་། དེ་བཞིན་ཁེ་ན་ཌའི་གྲོང་ཁྱེར་མོན་ཌ་རེལ་ (Montreal) དང་ཨོ་ཊ་ཝ་ (Ottawa) བཅས་སུ་ཕེབས་ནས་བོད་རིགས་རྣམས་ལ་གསུང་བཤད་གནང་རྒྱུ་དང་གནད་ཡོད་མི་སྣ་སོགས་དང་མཇལ་འཕྲད་གནང་རྒྱུ་མ་ཟད། དེ་རྗེས་ཨ་རིར་ཕེབས་ནས་ཕྱི་ཟླ་ ༡༡ ཚེས་ ༢༧ ཉིན་གྲོང་ཁྱེར་ཝར་མོན་ཌ་ཁུལ་གྱི་བོད་རིགས་རྣམས་ལ་གསུང་བཤད་གནང་རྒྱུ་དང་། ཝར་མོན་ཌ་གྲོང་སྡེའི་སྲིད་སྐྱོང་ (Governor) མཆོག་དང་མཇལ་འཕྲད་གནང་རྒྱུ་ཡིན་འདུག དེ་རྗེས་ཕྱི་ཟླ་ ༡༡ ཚེས་ ༢༨།༢༩ བཅས་ཉིན་གཉིས་རིང་སྲིད་སྐྱོང་མཆོག་སྐུ་སྒེར་གུང་གསེང་ཐོག་ཕེབས་རྒྱུ་དང་། སླར་ཡང་ཕྱི་ཟླ་ ༡༡ ཚེས་ ༣༠ ནས་ཕྱི་ཟླ་ ༡༢ ཚེས་ ༥ བར་ཨ་རིའི་གྲོང་ཁྱེར་ཝི་སི་ཀོན་སིན་(wisconcin)དང་ཤི་ཁ་ཁོ། (Chicago) ནིའུ་མེཀ་སི་ཁོ། (New Maxico) སན་ཏ་ཕེ། (Santa Fe) བྷོ་སི་ཊོན་བཅས་ནང་བོད་རིགས་ལ་གསུང་བཤད་དང་། གྲོས་ཚོགས་འཐུས་མི་དང་གནད་ཡོད་མི་སྣ་ཁག་གཅིག་དང་ལྷན་མཇལ་འཕྲད་གནང་རྒྱུ་ཡིན་འདུག ཕྱི་ཟླ་ ༡༢ ཚེས་ ༦།༧ ཉིན་བྷོ་སི་ཊོན་ནས་ཛུ་རིཀ་ (Zuric) བརྒྱུད་ལྡི་ལིར་ཕེབས་ཐོན་གནང་ནས་ཕྱི་ཚེས་ ༨ ཉིན་ལྡི་ལི་ནས་རྡ་སར་ཕེབས་འབྱོར་གནང་རྒྱུ་ཡིན་འདུག