༢༠༡༤ ཟླ་ ༡༡ ཚེས་ ༡༤ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༡༡ ཚེས་ ༡༠ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དཔལ་ས་སྐྱའི་ཆོས་སྒར་དབུ་བརྙེས་ནས་ལོ་ངོ་ལྔ་བཅུ་ཧྲིལ་པོ་འཁོར་བའི་རྗེས་དྲན་ཐོག་ཆེད་འཕྲིན་གནང་བའི་ནང་འཁོད་དོན། འཕགས་ཡུལ་བྱང་ཕྱོགས་དེཧརཱ་དཱུན་རྫོང་ཁོངས་རཱཇ་པུར་དུ་ཆགས་པའི་དཔལ་ས་སྐྱའི་ཆོས་སྒར་བརྩེ་ཆེན་བསྟན་པའི་དགའ་ཚལ་བཤད་སྒྲུབ་ཆོས་འཁོར་གླིང་ཐོག་མར་ཕྱག་བཏབ་པ་ནས་བཟུང་ད་བར་མི་ལོ་ལྔ་བཅུ་ཧྲིལ་པོ་འཁོར་བའི་དུས་ཚིགས་ཁྱད་པར་ཅན་དང་བསྟུན་ཏེ། བོད་ཀྱི་སྔགས་འཆང་རྡོ་རྗེ་འཛིན་པ་ཡོངས་ཀྱི་རྒྱལ་པོ། འཁོན་རིགས་བསྟན་པའི་སྲོག་ཤིང་། སྐྱབས་མགོན་ས་སྐྱའི་ཁྲི་འཛིན་ཞེ་གཅིག་པ་ཆེན་པོ་མཆོག་ལ་དཔལ་ས་སྐྱའི་བུ་སློབ་ཡོངས་ནས་བཀའ་དྲིན་རྗེས་དྲན་མཚོན་ཕྱིར་ཕྱི་ལོ་ ༢༠༡༤ ཟླ་ ༡༡ ཚེས་ ༡༣ དང་ ༡༤ ཉིན་གཉིས་རིང་ལྔ་བཅུའི་རྟེན་འབྲེལ་མཛད་སྒོ་ཞིག་གནང་རྒྱུ་ཡིན་འདུག་པར། བོད་མིའི་སྒྲིག་འཛུགས་ཀྱི་ངོས་ནས་དུས་དྲན་དེའི་ཐོག་དཔལ་ས་སྐྱའི་ཆོས་སྒར་གྱི་དབུ་བླ་འདུས་མང་ཡོངས་ལ་དགའ་གུས་ཆེན་པོས་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་དང་། དུས་དྲན་གོ་སྒྲིག་གནང་མཁན་འབྲེལ་ཡོད་རྣམ་པར་ལེགས་གསོའི་བསྔགས་བརྗོད་ཞུ་རྒྱུ་ཡིན།
བརྩེ་ཆེན་བསྟན་པའི་གཙུག་ནོར་སྐྱབས་མགོན་ས་སྐྱའི་ཁྲི་འཛིན་ཞེ་གཅིག་པ་ཆེན་པོ་མཆོག་ནས་སྐུ་ན་ཕྲ་མོའི་དུས་ནས་བཟུང་ཐུགས་བསྐྱེད་དམ་བཅའ་བརྟན་པོས་བསྟན་པ་དང་འགྲོ་བའི་དོན་དུ་སྐུ་ངལ་བརྒྱ་ཕྲག་ལྷུར་བཞེས་མཛད་པའི་འབྲས་བཟང་མངོན་གྱུར་རང་ཅག་ཡོངས་ཀྱི་མཐོང་ཆོས་སུ་གྲུབ་པ་འདི་དག་དང་། ཁྱད་པར་བོད་ཀྱི་བསྟན་སྲིད་བདེ་ཐབས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གཞོགས་འདེགས་བླ་ན་མེད་པ་མཛད་དང་མཛད་བཞིན་པ་བཅས་ཀྱི་བཀའ་དྲིན་ནི་བསྐལ་པའི་བར་དུ་གཞལ་བར་མི་ནུས་པ་ཞིག་ཡིན་ན། ད་རེས་གོ་སྐབས་འདི་བརྒྱུད་སྐྱབས་མགོན་ས་སྐྱའི་ཁྲི་འཛིན་རིན་པོ་ཆེར་བཀའ་དྲིན་ལན་བརྒྱར་ཆེ་ཆེ་ཞུ་རྒྱུ་དང་། སླད་མའི་ཆར་ཡང་བོད་ཀྱི་བསྟན་སྲིད་ཉག་ཕྲའི་གནས་ལ་དགོངས་ཏེ་སྐུ་ཚེ་ཞབས་པད་ཡུན་དུ་བརྟན་པའི་གསོལ་འདེབས་ཤུགས་དྲག་ཞུ་རྒྱུ་ཡིན། དཔལ་ས་སྐྱའི་འདུས་སྡེ་དང་བུ་སློབ་ཡོངས་ནས་ཀྱང་བཀའ་དྲིན་རྗེས་དྲན་ཞུ་ཕྱོགས་བཟང་ཤོས་སྐྱབས་མགོན་ཁྲི་འཛིན་རིན་པོ་ཆེ་གང་ཉིད་ཀྱི་བཀའ་དགོངས་ཟབ་མོ་རྣམས་སྒྲུབ་པ་ལག་ལེན་གྱིས་མཐར་ཕྱིན་གནང་ཐུབ་པ་ཞིག་ཅི་ནས་གནང་གལ་ཆེ་བར་སྐུལ་འདེབས་ཞུ་རྒྱུ་བཅས། ཞེས་ཆེད་འཕྲིན་གནང་འདུག
