༢༠༡༤ ཟླ་ ༡༡ ཚེས་ ༢༥ རེས་གཟའ་མིག་དམར།
༄༅། །ཕྱི་ལོ་ ༢༠༡༤ ལོའི་ཟླ་ ༡༡ ཚེས་ ༢༤ ཉིན་གྱི་དགོང་མོར། བོད་མིའི་ཁྲིམས་ལུགས་རིག་པ་བའི་ཚོགས་པའི་གོ་སྒྲིག་འོག རྒྱ་གར་གྱི་ཁྲིམས་ལུགས་མཐོ་སློབ་སྙན་གྲགས་ཆེ་ཤོས་ National Law School Of India University ཀྱི་དགེ་རྒན་ཆེན་མོ་མཁས་དབང་འབུམ་རམས་པ་ལྕམ་ཨེ་ལི་ཛེ་བྷེ་ཏི་ལགས་ V.S Elizabeth གདན་ཞུས་ཀྱིས། བྷེང་ལོར་བོད་ཁྱིམ་སྡོད་ཁང་དུ་ཁུལ་དེའི་བོད་རིགས་གཞོན་སྐྱེས་ཚོར་གསུང་བཤད་ཀྱི་ལས་འགུལ་ཞིག་ཚོགས་ཡོད་པ་དང་། སྐབས་དེར་ལྕམ་ཨེ་ལི་ཟ་བྷེཌ་ལགས་ནས་ཚོགས་བཅར་བར་ཡུལ་མིའི་ནུས་པ་ཇི་ལྟར་ཐོན་ཏུ་འཇུག་དགོས་མིན་དང་། བོད་པ་ཚོར་རྒྱ་གར་ཡུལ་ཁྲིམས་ནང་ཐོབ་ཐང་དང་འགན་དབང་ཇི་ཡོད། ལྷག་པར་བོད་ཀྱི་བུད་མེད་ཚོས་ཇི་ལྟར་རང་ཉིད་ཀྱི་ནུས་པ་མཐོར་འདེགས་ཐོག་མི་རིགས་དང་རྒྱལ་ཁབ་ལ་ཞབས་འདེགས་ཞུ་ཕྱོགས་སྐོར་ལམ་སྟོན་གནང་བ་མ་ཟད། ཁྲིམས་ཀྱིས་སྐྱོང་བའི་མིའི་རིགས་ཀྱི་སྤྱི་ཚོགས་སུ་ཁྲིམས་ལུགས་རིག་པ་བའི་ཚོགས་པའི་གལ་འགངས་རང་བཞིན་དང་། རྒྱ་གར་གཞུང་གིས་བོད་པ་ཚོར་བསྩལ་གནང་བའི་ཐོབ་ཐང་སོགས་ཁྲིམས་མཐུན་གྱི་ལོངས་སུ་སྤྱད་ནས་མ་འོངས་པར་སོ་སོའི་མི་རིགས་ལ་ཞབས་འདེགས་ཇི་ལྟར་ཞུ་ཐུབ་མིན་མི་རིགས་ཤིག་གི་འཐབ་རྩོད་ལ་ཤེས་ཡོན་ནི་མེད་དུ་མི་རུང་བ་ཞིག་ཡིན་སྟབས་བོད་པའི་ན་གཞོན་ཚོས་ངེས་པར་ཏུ་སློབ་སྦྱོང་ལ་ཤུགས་སྣོན་བརྒྱབ་ཏེ་མུ་མཐུད་མི་རིགས་ཀྱི་འཐབ་རྩོད་ཀྱི་ལམ་ལ་ཞུགས་དགོས་པ་སོགས་གསུངས་ཡོད།
འདི་ནི་བོད་མིའི་ཁྲིམས་ལུགས་རིག་པ་བའི་ཚོགས་པའི་ངོས་ནས་རྒྱ་གར་ལྷོ་ཕྱོགས་བྷེང་ལོར་གྲོང་ཁྱེར་དུ་ཁྲིམས་ལུགས་གོ་རྟོགས་རྒྱ་ཆེར་སྤེལ་བའི་ལས་འགུལ་ཐེངས་དང་པོ་དེ་ཡིན་པ་དང་། གསུང་བཤད་མཛད་སྒོའི་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་སྐུ་ཚབ་ལྷོ་སྤྱི་སྐུ་ངོ་སྐར་མ་སེང་གེ་ལགས་དང་། བོད་ཁྱིམ་སྡོད་ཁང་འགན་འཛིན་རྒན་དོན་གྲུབ་ལགས་གཉིས་ཆེད་ཕེབས་གནང་ཡོད། བོད་མིའི་ཁྲིམས་ལུགས་རིག་པ་བའི་ཚོགས་པ་ནི་ཆེས་མཐོའི་ཁྲིམས་ཞིབ་ཁང་གི་གོ་སྒྲིག་འོག ཕྱི་ལོ་ ༢༠༡༣ ལོའི་ཟླ་ ༦ ཚེས་ ༢༨ ནས་ ༣༠ བར་བོད་མིའི་ཁྲིམས་ལུགས་རིག་པ་བའི་ཚོགས་ཆེན་སྐོང་ཚོགས་གནང་སྟེ། ཚོགས་འདུ་དེའི་ཐོག་མང་མོས་ཀྱི་གྲོས་མཐུན་གཞིར་བཟུང་བཙུགས་པའི་ཚོགས་པ་ཞིག་ཡིན་པ་དང་།
ཕྱི་ལོ་ ༢༠༡༤ ཟླ་ ༧ ཚེས་ ༢༣ ཉིན་དངོས་སུ་རྒྱ་གར་ལྷོ་ཕྱོགས་མངའ་སྡེ་ཀ་ན་ཊ་ཀའི་དེབ་སྐྱེལ་ཁྲིམས་ལུགས་འོག་ཁྲིམས་མཐུན་གྱི་དེབ་སྐྱེལ་བྱས་པའི་ཚོགས་པ་ཞིག་ཡིན། བོད་མིའི་ཁྲིམས་ལུགས་རིག་པ་བའི་ཚོགས་པའི་དྲུང་ཆེ་ཁྲིམས་ལུགས་རིག་པ་བ་བློ་བཟང་གྲགས་པས་གསུངས་གསལ་ལ། ཐེངས་འདིའི་མཁས་དབང་གདན་ཞུས་ཀྱི་ལས་འགུལ་ནི་གཙོ་བོར་བོད་ཀྱི་མཐོ་སློབ་སློབ་མ་ཚོར་ཁྲིམས་ལུགས་ཀྱི་རྨོངས་ཆ་སེལ་རྒྱུ་དང་། བོད་མིའི་མཐོ་སློབ་ཀྱི་སློབ་མ་མང་པོ་བྷེང་ལོར་གྲོང་ཁྱེར་གྱི་མཐོ་སློབ་གང་མང་ནང་ཡོད་པ་དང་། ཁོང་ཚོ་རྒྱ་གར་གྱི་སྤྱི་ཚོགས་ནང་འཚོ་བ་སྐྱེལ་གྱི་ཡོད་པས། རྒྱ་གར་གྱི་ཡུལ་ཁྲིམས་དང་སོ་སོའི་ཐོབ་ཐང་དང་འགན་དབང་སོགས་ཤེས་སུ་འཇུག་དགོས་པ་གལ་ཆེན་དུ་མཐོང་ནས་གོ་སྒྲིག་ཞུས་པ་ཞིག་ཡིན་ལུགས་དང་། མ་འོངས་པར་ཡང་བོད་མི་གནས་སྡོད་ས་གནས་ཁག་ཏུ་ཁྲིམས་ལུགས་མཁས་དབང་གདན་ཞུས་དང་། ཁྲིམས་ལུགས་ཀྱི་གོ་རྟོགས་གང་མང་སྤེལ་ཐབས་བྱེད་རྩིས་ཡོད་ཅེས་གསུངས་ཡོད།།
