༢༠༡༤ ཟླ་ ༡༡ ཚེས་ ༡༠ རེས་གཟའ་ཟླ་བ།
༄༅། །ཕྱི་ལོ་ ༢༠༡༥ ཟླ་ ༣ ཚེས་ ༡༤ ཉིན་གསུམ་བཅུའི་དུས་དྲན་ཐེངས་ ༥༦ འཁེལ་བཞིན་པ་དང་སྟབས་བསྟུན། ཉིན་དེར་ཡུ་རོབ་ཁུལ་གྱི་བོད་མི་རྣམས་ནས་རྒྱ་ནག་གཞུང་གིས་བོད་ནང་དབང་བསྒྱུར་བྱས་པ་དེར་ཞི་བའི་རྔམས་སྟོན་ཧ་ཅང་ཞི་རྒྱ་ཆེ་བའི་ལས་འགུལ་ཞིག་སྤེལ་ཆེད་འདི་ལོའི་ཕྱི་ཟླ་ ༡༡ ཚེས་ ༩ ཉིན་ཕ་རན་སིའི་རྒྱལ་ས་པེ་རི་སིར་ Paris ཡུ་རོབ་བོད་རིགས་སྤྱི་མཐུན་ཚོགས་པ་ཡོངས་ཀྱི་ཚོགས་གཙོ་སོགས་འདུ་འཛོམས་ཀྱིས་ལས་འགུལ་གོ་སྒྲིག་གི་ལྷན་ཚོགས་ཐེངས་དང་པོ་ཚོགས་འདུག སྐབས་དེར་ཡུ་རོབ་སྤྱི་འཐུས་དགེ་བཤེས་ཐུབ་བསྟན་དབང་ཆེན་ལགས་དང་དབང་པོ་བཀྲས་མཐོང་ལགས། སུད་སི་བོད་རིགས་བུད་མེད་ཚོགས་པའི་ཚོགས་གཙོ། དེ་བཞིན་ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་དང་ཡུ་རོབ་ས་གནས་བོད་རིགས་ཚོགས་པའི་ཚོགས་གཙོ་བཅས་མཉམ་ཞུགས་གནང་འདུག ལས་འགུལ་གོ་སྒྲིག་ལྷན་ཚོགས་ཐེངས་དང་པོའི་སྐབས་ཕ་རན་སི་བོད་རིགས་ཚོགས་པའི་ཚོགས་གཙོ་ཐུབ་བསྟན་རྒྱ་མཚོ་ལགས་ཀྱིས་གཙོ་སྐྱོང་གནང་འདུག སྐབས་དེར་ལས་འགུལ་སྤེལ་ཆེད་གོ་སྒྲིག་ཚོགས་ཆུང་གི་ཚོགས་མི་བསྐོ་གཞག་དང་ལས་འགུལ་གྱི་འགྲོ་གྲོན་མ་དངུལ་སོགས་སྐོར་གོ་བསྡུར་གནང་བ་མ་ཟད། ལས་འགུལ་གོ་སྒྲིག་ལྷན་ཚོགས་ཐེངས་དང་པོའི་ཚོགས་གཙོས་མོས་མཐུན་འོག་ཚོགས་མི་རྣམས་ཀྱིས་ལས་འགུལ་དངོས་གཞི་སྤེལ་ཉིན་འབྲེལ་ཡོད་ཡུ་རོབ་རྒྱལ་ཁབ་ཁུངས་སོ་སོ་ནས་བོད་རིགས་གང་མང་འདུ་བསྐོང་བྱ་རྒྱུའི་ཐག་གཅོད་ཡང་བྱུང་འདུག ཕྱོགས་མཚུངས་གསུམ་དུས་ཐེངས་ ༥༦ མ་བསླེབ་གོང་ཡུ་རོབ་རྒྱལ་ཁབ་འདྲ་མིན་ནང་བོད་དོན་ཞུ་གཏུགས་ཀྱི་ལས་འགུལ་འདྲ་མིན་སྤེལ་འཆར་འདུག་པ་བཅས།།
