༢༠༡༤ ཟླ་ ༡༡ ཚེས་ ༣ རེས་གཟའ་ཟླ་བ།
༄༅། །བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་རྒྱ་རི་སྒྲོལ་མ་མཆོག་ཕྱི་ལོ་ ༢༠༡༤ ཟླ་ ༡༠ ཚེས་༢༦ནས་ཚེས་༣༠བར་ཉིན་གྲངས་ལྔའི་རིང་འབྲས་ལྗོངས་ཀྱི་རྒྱལ་ས་སྒང་ཐོག་ཏུ་ཕེབས་ཏེ་མངའ་སྡེ་གཞུང་གི་དཔོན་རིགས་ཁག་དང་མཇལ་འཕྲད་ཀྱིས་འབྲས་ལྗོངས་ཁུལ་གྱི་སྐྱབས་བཅོལ་བོད་མི་དང་འབྲེལ་བའི་གནད་དོན་གཙོ་གྲས་ཁག་གཅིག་ཐོག་གོ་བསྡུར་གནང་འདུག
དེ་ཡང་ཕྱི་ཚེས་༢༧ཉིན་ནང་སྲིད་བཀའ་བློན་མཆོག་གིས་འབྲས་ལྗོངས་མངའ་སྡེའི་གཞུང་གི་དྲུང་ཆེ་ཚེ་རྒྱལ་བཀྲ་ཤིས་ལགས་དང།དྲུང་འཕར་བཀྲ་ཤིས་དབང་འདུས་ལགས་གཉིས་དང་མཇལ་འཕྲད་ཀྱིས་ར་ཝང་ལ་ཀུན་ཕན་གླིང་བོད་མིའི་གཞིས་ཆགས་ཀྱི་ས་ཞིང་དབྱེ་མཚམས་དང་ས་ཞིང་འབོག་གཏོང་གི་གན་རྒྱ་སྐོར་ལ་གོ་བསྡུར་གནང་བ་མ་ཟད།འབྲེལ་ཡོད་དཔོན་རིགས་ཁག་གཅིག་དང་མཇལ་འཕྲད་ཀྱི་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ `Tibetan Rehabilitation Policy 2014″ ཞེས་པའི་སྐོར་གོ་བསྡུར་གནང་ཡོད།
ཕྱི་ཚེས་༣༠ཉིན་མངའ་སྡེ་གཞུང་གི་སྤྱི་ཁྱབ་དྲུང་ཆེ་རིན་ཆེན་དབང་མོ་ལགས་དང་མཇལ་འཕྲད་ཀྱིས་ནང་སྲིད་བཀའ་བློན་མཆོག་གིས་ར་ཝང་ལ་གཞིས་ཆགས་ཀྱིས་ས་ཞིང་འབོག་གཏོང་གི་གན་རྒྱ་དང་ས་ཚིགས་དབྱེ་མཚམས།དེ་བཞིན་འབྲས་ལྗོངས་ཁུལ་གནས་སྡོད་བོད་མི་སྐྱབས་བཅོལ་བ་རྣམས་ཀྱི་དཀའ་ངལ། དཔེར་ན། ཚོང་ལས་དང་སྣུམ་འཁོར་གཏོང་ཆོག་པའི་ལག་འཁྱེར་གྱི་གནད་དོན། དེ་བཞིན་ས་གནས་ཡུལ་མི་ལྟར་བོད་མི་སྐྱབས་བཅོལ་ལག་དེབ་ཡོད་མཁན་རྣམས་ལ་ཟ་འབྲུའི་ཐོབ་ཐང་སྤྲོད་རྒྱུའི་ཆ་རྐྱེན་སྐོར་སོགས་ལ་གོ་བསྡུར་གནང་འདུག
