༢༠༡༤ ཟླ་ ༡༡ ཚེས་ ༣ རེས་གཟའ་ཟླ་བ།
༄༅། །བོད་མིའི་སྒྲིག་འཛུགས་ཀྱི་དྲིལ་བསྒྲགས་དྲུང་ཆེ་བཀྲ་ཤིས་ཕུན་ཚོགས་ལགས་དེང་སྐབས་དབྱིན་ཇིའི་རྒྱལ་ས་ལོན་ཌོན་ LONDON དུ་གཞུང་འབྲེལ་ཕྱོགས་ཕེབས་སྐབས་དང་སྟབས་བསྟུན། ཕྱི་ལོ་ ༢༠༡༤ ཟླ་ ༡༠ ཚེས་ ༣༡ རེས་གཟའ་པ་སངས་ཉིན་ལོན་ཌོན་དུ་གཞུང་འབྲེལ་མིན་པའི་བོད་དོན་རྒྱབ་སྐྱོར་ཚོགས་པ་ ༡༨༠ བསྡུས་པའི་འབྲེལ་གཏུགས་ཚོགས་ཆུང་ International Tibet Network གི་འགན་འཛིན་ལྷན་ཚོགས་ཀྱི་ཚོགས་འདུར་བཅར་ཏེ་ལྷན་ཚོགས་དབུ་འབྱེད་ཉིན་བོད་དོན་ཆེད་སྤེལ་བའི་ལས་འགུལ་དེ་དག་ལ་ཧ་ཅང་བསྔགས་བརྗོད་གནང་བ་དང་སྦྲགས། བོད་དོན་བདེན་མཐའ་མགྱོགས་མྱུར་གསལ་ཆེད་བོད་དོན་རྒྱབ་སྐྱོར་ཚོགས་པའི་ལས་འགུལ་དེ་དག་ཧ་ཅང་གལ་ཆེན་པོ་ཆགས་ཡོད་སྐོར་དང་། བོད་ནང་གི་གནས་སྟངས་ཧ་ཅང་ཛ་དྲག་ཆགས་ཡོད་སྐོར་ངོ་སྤྲོད་གནང་སྐབས་ཕྱི་ལོ་ ༢༠༠༩ ནས་ད་བར་བོད་ནང་དུ་བོད་མི་གྲངས་ ༡༣༢ ཀྱིས་རང་ལུས་མེར་སྲེག་བཏང་སྟེ་རྒྱ་ནག་གཞུང་གིས་བོད་མིའི་ཆོས་དང་རིག་གཞུང་། སྐད་ཡིག་སོགས་རྩ་མེད་བཟོ་བཞིན་པ་མ་ཟད། བོད་མི་རྣམས་དཔལ་འབྱོར་ཟུར་ཕུད་བྱས་པ་དང་། བོད་ཀྱི་ཁོར་ཡུག་གཏོར་ཤིག་བཏང་བ་སོགས་དམ་བསྒྲགས་ཅན་གྱིས་སྲིད་བྱུས་སྤེལ་ཏེ་བོད་ཡུལ་འདི་བོད་མི་རྣམས་ཀྱི་བཙོན་ཁང་ལྟ་བུར་གྱུར་ནས་བོད་མི་དེ་དག་གི་ཆེ་མཐོང་ལ་རྩིས་མེད་རྡོག་རོལ་བཏང་བ་དང་། ཉིན་ལྟར་དམ་བསྒྲགས་སུན་གཙེར་དང་ཞེད་སྣང་། དངངས་སྐྲག་བྱས་ནས་འཚོ་བ་སྐྱེལ་དགོས་པའི་གནས་སྟངས་འོག་ད་ཆ་བོད་མི་རྣམས་བཟོད་ཐབས་བྲལ་ནས་ཞི་རྒོལ་བྱས་དང་བྱེད་མུས་ཡིན་སྐོར་སོགས་གསུངས། གཞན་ཡང་དྲུང་ཆེས་སྐབས་དེར་གསུང་དོན།
ད་ལྟའི་བོད་ནང་གི་ཛ་དྲག་གནས་སྟངས་འདིར་གཞིགས་ནས་བོད་མིའི་སྒྲིག་འཛུགས་ཀྱིས་དངོས་ཡོད་གནས་སྟངས་དང་འཚམ་པའི་གཉིས་སྨན་དབུ་མའི་ལམ་གྱི་སྲིད་བྱུས་རྒྱུན་སྐྱོང་བྱེད་བཞིན་ཡོད་པ་དང་། དབུ་མའི་ལམ་གྱི་སྲིད་བྱུས་འདི་འཚེ་མེད་ཞི་བའི་ཐབས་ལམ་ལ་བརྟེན་པ་ཞིག་ཡིན་སྟབས་རྒྱལ་ཁབ་མང་པོའི་གཞུང་མང་གཉིས་ཀས་རྒྱབ་སྐྱོར་ཆེན་པོ་གནང་དང་གནང་མུས་ཡིན་པ་དང་། བོད་ནང་གི་དངོས་ཡོད་གནས་སྟངས་ཇི་ཙམ་གོ་རྟོགས་རྒྱ་བསྐྱེད་གཏོང་ཐུབ་པ་དེའི་ཚོད་ཀྱིས་བོད་དོན་ལ་རྒྱབ་སྐྱོར་ཤུགས་ཆེ་བ་ཐོབ་རྒྱུ་ཡིན་སྐོར་གསུངས། ཕྱོགས་མཚུངས་སྐབས་དེར་བོད་དོན་རྒྱབ་སྐྱོར་ཚོགས་པའི་གྲུབ་འབྲས་ཐོག་བསྔགས་བརྗོད་གནང་དོན།
འདས་པའི་ལོ་ངོ་བཅུ་ཕྲག་འགའ་ཤས་རིང་བོད་དོན་རྒྱབ་སྐྱོར་ཚོགས་པས་ལས་འགུལ་ཤུགས་ཆེ་སྤེལ་བ་དེས་བོད་དོན་ལ་རྒྱལ་སྤྱིའི་ཐོག་རྒྱབ་སྐྱོར་ཤུགས་ཆེ་ཐོབ་ཡོད་པ་ནི་ཡོངས་གྲགས་ཤིག་ཆགས་ཡོད། རྒྱབ་སྐྱོར་དེ་དག་ལ་བརྟེན་ནས་བོད་དོན་འཐབ་རྩོད་ཀྱི་རྨང་གཞི་ཧ་ཅང་སྲ་བརྟན་ཆགས་ཐུབ་ཡོད། དེ་ཡང་༸གོང་ས་མཆོག་གིས་བོད་དོན་རྒྱབ་སྐྱོར་ཚོགས་པ་ནི། བོད་མི་ཚོར་དཀོན་མཆོག་བཞི་པ་ལྟ་བུ་ཆགས་ཡོད། ཅེས་བསྔགས་བརྗོད་ཤུགས་ཆེ་མཛད་ཡོད། བོད་དོན་རྒྱབ་སྐྱོར་ཚོགས་པའི་བྱས་རྗེས་ལ་བསྔགས་བརྗོད་དེ་ལས་ལྷག་པ་ཞིག་ཐོབ་ཐབས་མེད། ཉེ་ལམ་བོད་དོན་རྒྱབ་སྐྱོར་ཚོགས་པ་ཁག་གིས་རྒྱལ་ཁབ་བྱེ་བྲག་པ་དང་རྒྱལ་སྤྱིའི་ནང་གཟེངས་སུ་ཐོན་པའི་བོད་དོན་ཆེད་ལས་འགུལ་ཧ་ཅང་ཤུགས་ཆེ་སྤེལ་ཡོད། ལས་འགུལ་དེ་དག་གི་གྲུབ་འབྲས་ནི་ཕུགས་རྒྱང་རིང་པོར་བོད་དོན་འཐབ་རྩོད་ལ་ཧ་ཅང་ཕན་ཐོགས་ཡོང་ངེས་ཡིན། ང་ཚོས་བོད་མི་གཞོན་སྐྱེས་རྣམས་དང་ལྷག་པར་རྒྱ་རིགས་མང་ཚོགས་སོགས་ལ་དབུ་མའི་ལམ་གྱི་སྲིད་བྱུས་ངོ་སྤྲོད་བྱ་རྒྱུ་ནི་ལས་དོན་གལ་སྒང་ཆེ་ཤོས་ཤིག་ལ་ངོས་འཛིན་ཞུ་མུས་ཡིན་སྟབས་རྒྱབ་སྐྱོར་ཚོགས་པ་རྣམས་ཀྱིས་བོད་མིའི་སྒྲིག་འཛུགས་ཀྱི་ལས་དོན་འདིའི་ཐོག་རྒྱབ་སྐྱོར་གནང་རྒྱུའི་རེ་བ་ཞུ་རྒྱུ་ཡིན། ཞེས་གསུངས།
དེ་ཡང་ཕྱི་ལོ་ ༢༠༡༤ ཟླ་ ༡༠ ཚེས་ ༢༩ ཉིན་དྲིལ་བསྒྲགས་དྲུང་ཆེ་བཀྲ་ཤིས་ཕུན་ཚོགས་ལགས་ཀྱིས་དབྱིན་ཇིའི་རྒྱལ་ས་ལོན་ཌོན་གྱི་ཝེ་སི་མིན་སི་ཊར་ Westminster Londonཞེས་པའི་ས་གནས་སུ་རྟེན་གཞི་བྱས་པའི་པོ་ཊི་ཀལ་ལི་སིའི་ཚོགས་ཁང་དུ་ Portcullis House གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་དང་ལྷན་ཚོགས་གནང་ཡོད། སྐབས་དེར་དྲུང་ཆེས་དབྱིན་ཇིའི་གྲོས་ཚོགས་ཀྱི་ངལ་རྩོལ་ཚོགས་པའི་ Labour Partyའཐུས་མི་སྐུ་ཞབས་ཕེ་བྷི་ཡེན་ཧེ་མིལ་ཊོན་ Mr Fiabian Hamilton མཆོག་དང་མཇལ་འཕྲད་གནང་འདུག
