༢༠༡༤ ཟླ་ ༡༠ ཚེས་ ༡༥ རེས་གཟའ་ལྷག་པ།
༄༅། །བོད་མིའི་སྒྲིག་འཛུགས་ཕྱི་དྲིལ་འགྲེམས་སྟོན་ཚན་པས་ཕྱི་ལོ་ ༢༠༡༤ ཟླ་ ༡༠ ཚེས་ ༡༣ ཉིན་རྒྱ་གར་བྱང་ཕྱོགས་བོད་མིའི་གཞིས་ཆགས་རཱཇ་པུར། བོད་ཁྱིམ་སློབ་གྲྭའི་ནང་སྐོར་བསྐྱོད་ཀྱི་པར་རིགས་འགྲེམས་སྟོན་གནང་འདུག དེ་ཡང་ཐོག་མར་ཕྱི་དྲིལ་འགྲེམས་སྟོན་ཚན་པའི་འགན་འཛིན་བཀྲ་ཤིས་ཕུན་ཚོགས་ལགས་ཀྱིས་ཕྱི་དྲིལ་ལས་ཁུངས་ཀྱི་ལས་དོན་སྤྱི་དང་། ལྷག་པར་ཕྱི་དྲིལ་འགྲེམས་སྟོན་ཚན་པའི་ལས་དོན་སྐོར། དེ་བཞིན་ཐེངས་འདིར་པར་རིགས་འགྲེམས་སྟོན་གོ་སྒྲིག་ཞུ་དགོས་པའི་རྒྱུ་མཚན། པར་རིགས་འགྲེམས་སྟོན་ནང་བརྗོད་གཞི་གཙོ་བོ་གང་ཡིན་སྐོར་སོགས་ཞིབ་ཕྲ་གསལ་བཤད་གནང་།
དེ་རྗེས་རཱཇ་པུར་བོད་ཁྱིམ་སློབ་གྲྭའི་སློབ་སྤྱི་གཞོན་པ་སྐུ་ཞབས་མིག་དམར་ཚེ་རིང་ལགས་ཀྱིས་སྔ་དྲོ་ཆུ་ཚོད་ ༩།༡༥ ཐོག་པར་རིགས་འགྲེམས་སྟོན་དབུ་འབྱེད་གནང་སྐབས་དགེ་ལས་སློབ་ཕྲུག་གྲངས་ ༥༠༠ ཙམ་གྱིས་དོ་སྣང་ཆེན་པོས་པར་རིགས་དང་ཡིག་ཆ་ཁག དེ་བཞིན་ཕྱི་དྲིལ་ལས་ཁུངས་ཀྱི་ཟླ་རེའི་ཤེས་བྱ་དང་། དེ་བཞིན་བོད་མིའི་སྒྲིག་འཛུགས་ཀྱི་སྲིད་བྱུས་ལམ་སྟོན་དང་འབྲེལ་བའི་དཔེ་དེབ་སོགས་ལ་དོ་སྣང་ཧ་ཅང་གནང་འདུག ཕྱེད་ཡོལ་བོད་དོན་དང་འབྲེལ་བའི་གློག་བརྙན་བསྟན་ཡོད།
ཐེངས་འདིར་པར་རིགས་འགྲེམས་སྟོན་གྱི་བརྗོད་གཞི་གཙོ་བོ་གསུམ་ལ་དབྱེ་ཡོད་པ་རྣམས་ནི། ༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེའི་མཛད་ཁུར་གཙོ་བོ་གསུམ་དང་། བཙན་བྱོལ་བོད་མི་རྣམས་ཀྱི་མི་ལོ་ལྔ་བཅུའི་ལྷག་གི་གནས་སྟངས་སྐོར། ཕྱོགས་མཚུངས་བོད་མི་ཚོས་རང་ལུས་མེར་སྲེག་གཏོང་དགོས་དོན་གང་ཡིན། ཞེས་པའི་དེང་སྐབས་ཛ་དྲག་གི་དྲི་བ་གལ་ཆེན་པོ་ཆགས་ཡོད་པའི་སྐོར་སོགས་ཀྱི་གནད་དོན་རྣམས་པར་རིགས་དང་ཡིག་ཆའི་ལམ་ནས་འགྲེམས་སྟོན་གནང་ཡོད།
དེ་ཡང་སྐབས་བཅུ་བཞི་པའི་བཀའ་ཤག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་ཞུ་སླད་ཕྱི་ལོ་ ༢༠༡༤ ལོ་ཧྲིལ་པོའི་རིང་རྒྱ་གར་གཙོ་བོར་གྱུར་བའི་བཙན་བྱོལ་བོད་མིའི་གནས་ཡུལ་རྒྱལ་ཁབ་འདྲ་མིན་ནང་༸གོང་ས་མཆོག་གི་སྐུའི་མཛད་ཁུར་གཙོ་བོ་གསུམ་དང་།
བོད་ནང་གི་ཛ་དྲག་གནས་སྟངས་སྐོར་གོ་རྟོགས་ལས་འགུལ་འདྲ་མིན་སྤེལ་འགོ་བཙུགས་པའི་ཆ་ཤས་སུ་ཐེངས་འདིར་ཕྱི་དྲིལ་འགྲེམས་སྟོན་ཚན་པས་པར་རིགས་འགྲེམས་སྟོན་གྱི་སྐོར་བསྐྱོད་ལས་གཞི་དབུ་འཛུགས་གནང་བ་ཞིག་ཡིན་པ་དང་། ཕྱི་ཚེས་ ༡༥།༡༦ ཉིན་བདེ་སྐྱིད་གླིང་གཞིས་ཆགས་སུ་པར་རིགས་འགྲེམས་སྟོན་གནང་རྒྱུ་ཡིན་འདུག
