༢༠༡༤ ཟླ་ ༡༠ ཚེས་ ༦ རེས་གཟའ་ཟླ་བ།
༄༅། །དཔལ་ལྡན་སྲིད་སྐྱོང་བློ་བཟང་སེང་གེ་མཆོག་ཕྱི་ལོ་ ༢༠༡༤ ཟླ་ ༡༠ ཚེས་ ༦ ཉིན་ས་གནས་སུ་ཕེབས་འབྱོར་གྱིས་ཁར་ཤང་དང་སོ་ན་དྷ་མི་མང་དང་སློབ་མ་ཚོར་གསུང་བཤད་གནང་། དེ་བཞིན་ཕྱི་ཚེས་ ༧ ཉིན་རྡོར་གླིང་མི་མང་དང་སློབ་ཕྲུག་རྣམས་ལ་གསུང་བཤད་གནང་རྒྱུ་ཡིན་འདུག
སྲིད་སྐྱོང་མཆོག་གི་ཐེངས་འདིའི་ལས་འཆར་གཙོ་བོ་རེས་གཟའ་ལྷག་པའི་ཉིན་ཀ་ལོན་སྦུག་དབུས་བོད་མིའི་སློབ་གྲྭ་དབུ་བརྙེས་ནས་ལོ་ལྔ་བཅུ་འཁོར་བའི་དུས་དྲན་གྱི་མཛད་སྒོའི་སྐུ་མགྲོན་གཙོ་བོར་མཉམ་ཞུགས་གནང་རྒྱུ་དང་། སྲིད་སྐྱོང་མཆོག་གིས་མཛད་སྒོའི་ཐོག་སློབ་གྲྭའི་སློབ་སྤྱི་དང་། དགེ་རྒན་ལས་བྱེད་ཟུར་པ་ཚོར་དྲན་རྟེན་ཕྱག་རྟགས་དང་གསུང་བཤད་གནང་རྒྱུ། དེ་བཞིན་སློབ་ཕྲུག་དང་སློབ་ཕྲུག་ཟུར་པ་ཚོ་དང་ལྷན་དུ་བཞུགས་མོལ་གནང་རྒྱུ་རེད་འདུག དཔལ་ལྡན་སྲིད་སྐྱོང་མཆོག་ས་གནས་སུ་ཕེབས་ཐེངས་གཉིས་པ་ཆགས་ཀྱི་ཡོད། མཛད་སྒོར་དཔལ་ལྡན་ཤེས་རིགས་བཀའ་བློན་དངོས་གྲུབ་ཚེ་རིང་མཆོག་ཀྱང་དམིགས་བསལ་སྐུ་མགྲོན་དུ་གདན་ཞུ་གནང་འདུག
ཕྱི་ཚེས་ ༡༠ ཉིན་གྱི་མཇུག་བསྡོམས་མཛད་སྒོའི་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ཕེབས་གནང་གི་ཡོད་པ་དང། ལྔ་བཅུ་དུས་དྲན་གྱི་མཛད་སྒོ་ཆ་ཚང་ www.golivewithus.com ཐོག་ཐད་ཀར་རྒྱང་སྲིང་གནང་རྒྱུ་རེད་འདུག
ཀ་ལོན་སྦུག་གཏན་སློབ་ནི་རྒྱ་གར་བྱང་ཤར་ནུབ་བྷང་གལ་མངའ་སྡེའི་ཀ་ལོན་སྦུག་གྲོང་ཁྱེར་གྱི་ཊོབ་ཁ་ན་ཞེས་པའི་ས་གནས་ཁོངས་སུ་ཆགས་ཡོད། སློབ་གྲྭ་འདི་ཐོག་མར་ཕྱི་ལོ་ ༡༩༦༤ ལོར་གསར་འཛུགས་གནང་འདུག སློབ་གྲྭའི་འཛིན་སྐྱོང་ལྡི་ལི་སྐྱབས་བཅོལ་བོད་མིའི་སློབ་གྲ་ཚོགས་པ་ནས་གནང་འདུག་ཀྱང་ཕྱིས་སུ་དབུས་བོད་སློབ་འཛིན་སྐྱོང་ཚོགས་པའི་ཁྱབ་ཁོངས་སུ་འགྱུར་ཡོད། སློབ་གྲྭ་འདིའི་སློབ་ཕྲུག་ཕལ་ཆེ་བ་རྒྱ་གར་བྱང་ཤར་བལ་ཡུལ་དང་། འབྲུག འབྲས་ལྗོངས་དང་ཨ་རུ་ན་ཅལ་མངའ་སྡེ་སོགས་ནས་ཡིན་འདུག
