༢༠༡༤ ཟླ་ ༡༠ ཚེས་ ༢༡ རེས་གཟའ་མིག་དམར།
༄༅། །ཕྱི་ལོ་ ༢༠༡༤ ཟླ་ ༡༠ ཚེས་ ༢༡ ཉིན་གྱི་སྔ་དྲོ་ཆུ་ཚོད་ ༡༠།༣༠ ཐོག་རྡ་ས་ས་གནས་འགོ་འཛིན་ལས་ཁུངས་ཀྱི་ཚོགས་ཁང་ནང་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་བོད་མིའི་ཚོང་ལས་ཡར་རྒྱས་རམ་འདེགས་ལས་གཞི་ (Tibetan Entrepreneurship Development) ཚན་པས་རྡ་ས་ཁུལ་གྱི་མི་མང་ལ་ལས་གཞིའི་སྐོར་གོ་རྟོགས་སྤེལ་སོང་།
དེ་ཡང་ཐོག་མར་དཔལ་འབྱོར་དྲུང་ཆེ་འཕྲིན་ལས་རྒྱ་མཚོ་ལགས་ཀྱིས་ལས་གཞིའི་སྐོར་ངོ་སྤྲོད་གསུང་བཤད་གནང་དོན། དེ་རིང་འདི་གར་འདུས་པའི་རྣམ་པ་ལྷན་རྒྱས་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། བོད་མིའི་སྒྲིག་འཛུགས་དཔལ་འབྱོར་ལས་ཁུངས་ནས་བོད་མིའི་ཚོང་ལས་ཡར་རྒྱས་རམ་འདེགས་ལས་གཞི་འདི་བཞིན་འཛུགས་དགོས་པའི་རྒྱུ་མཚན་ངོ་སྤྲོད་ཞུ་རྒྱུ་ཡིན། བཀའ་ཤག་སྐབས་བཅུ་གཉིས་དང་བཅུ་གསུམ་གྱི་དགོངས་གཞིར་དཔལ་འབྱོར་ལས་ཁུངས་ངོས་ནས་ཚོང་འབྲེལ་བྱེད་རྒྱུ་དེ་མཚམས་འཇོག་གནང་སྟེ། སྒེར་བདག་ཅན་དུ་གྱུར་བ་རེད། དེ་སྔ་ཡིན་ན་དཔལ་འབྱོར་ལས་ཁུངས་ཀྱིས་ཚོང་ལས་གནང་གི་ཡོད། རྒྱ་གར་དང་བལ་ཡུལ་ནང་ཚོང་གི་སྡེ་ཚན་མང་པོ་བཙུགས་ཏེ་གྲུབ་འབྲས་གང་ཙམ་ཐོན་ཡོད། འོན་ཀྱང་བཀའ་ཤག་སྐབས་བཅུ་གཉིས་དང་བཅུ་གསུམ་གྱིས་བོད་མིའི་སྒྲིག་འཛུགས་ཀྱི་ངོས་ནས་ཚོང་འབྲེལ་བྱེད་རྒྱུ་དེ་འོས་འཚམ་ཞིག་མི་འདུག དེར་བརྟེན་དཔལ་འབྱོར་ལས་ཁུངས་ནས་ཚོང་འབྲེལ་བྱེད་རྒྱུ་དེ་མཚམས་འཇོག་བྱས་ཏེ་སྒེར་བདག་ཅན་དུ་འགྱུར་གྱི་ཡིན། ཞེས་པའི་སྲིད་བྱུས་འཛིན་པའི་ཐོག་ནས་ཚོང་གི་སྡེ་ཚན་ཡོངས་རྫོགས་སྒེར་བདག་ཅན་དུ་འགྱུར་གནང་བ་རེད། བཀའ་ཤག་སྐབས་ ༡༢།༡༣།༡༤ བཅས་ཀྱི་དགོངས་པ་གཞི་བཟུང་བོད་མིའི་སྒྲིག་འཛུགས་ངོས་ནས་བཙན་བྱོལ་བོད་མིའི་སྡོད་གནས་ཁག་ནང་འཚོ་བའི་གནས་སྟངས་དང་། ཚོང་འབྲེལ་ཡར་རྒྱས་གཏོང་ཆེད་དམིགས་བསལ་སྲིད་བྱུས་དགོངས་བཞེས་ཀྱིས་ལས་དོན་སྤེལ་བཞིན་ཡོད།
དཔལ་འབྱོར་ལས་ཁུངས་ངོས་ནས་ཚོང་ལས་བྱེད་རྒྱུ་མཚམས་འཇོག་བྱས་ཡོད་ནའང་། བཙན་བྱོལ་བོད་མིའི་སྤྱི་ཚོགས་ནང་ཚོང་ལ་དོ་དབྱིངས་ཡོད་མཁན་གཞོན་སྐྱེས་གསོ་སྐྱོང་དང་། ཟབ་སྦྱོང་གནང་རྒྱུ། དེ་བཞིན་ཚོང་ལས་ཡར་རྒྱས་གཏོང་ཕྱོགས་སྐོར་ལས་འགུལ་སྣ་མང་སྤེལ་ཡོད། བཀའ་ཤག་གི་བཀའ་འབྲེལ་གཞི་བཟུང་ཚད་དང་ལྡན་པའི་ལས་དོན་སྤེལ་ཆེད་དཔལ་འབྱོར་ལས་ཁུངས་ངོས་ནས་ཚོང་ལས་ཡར་རྒྱས་རམ་འདེགས་ལས་གཞི་ཟུར་བཙུགས་གནང་སྟེ། འདི་ལོ་ནས་བཟུང་ལས་གཞི་འགོ་བཙུགས་ནས་ལས་འགུལ་སྤེལ་རྒྱུ་འཆར་གཞི་བསྒྲིགས་ཡོད། ཉེ་ཆར་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་གི་ནང་ཚོང་ལས་ཡར་རྒྱས་རམ་འདེགས་ལས་གཞིའི་འབྲེལ་ཡོད་ལས་བྱེད་གཉིས་ཀྱིས་མང་ཚོགས་ལ་ཚོང་ལས་ཡར་རྒྱས་རམ་འདེགས་ལས་གཞིའི་སྐོར་ངོ་སྤྲོད་ཞིབ་ཕྲ་གནང་ཡོད། ཚོང་ལས་ཡར་རྒྱས་རམ་འདེགས་ལས་གཞིའི་དགོས་དམིགས་ནི། ཚོང་ལས་ཐོག་དོ་དབྱིངས་ཡོད་མཁན་གཞོན་སྐྱེས་རྣམས་ལ་ཟབ་སྦྱོང་དང་། མཐུན་འགྱུར། གསོ་སྐྱོང་བྱེད་རྒྱུ་རྣམས་ཆགས་ཡོད། ལྷག་པར་ཚོང་ལས་གཉེར་བཞིན་པ་རྣམས་ལ་ཚོང་ལས་ཐོག་ཡར་རྒྱས་དང་། གཞི་རྒྱ་ཆེ་རུ་ཇི་ལྟར་གཏོང་རྒྱུས་མཚོན་གཞུང་འབྲེལ་ཐོག་ཚོང་རྒྱག་མཁན་ཡོད་པ་དེ་དག་ལ་མཐུན་འགྱུར་རོགས་རམ་གང་ཞིག་བྱེད་རྒྱུ་འདུག དེ་ཚོའི་ཐོག་ལ་དགོངས་པ་བཞེས་བཞིན་ཡོད། ཅེས་སོགས་ཀྱི་གསུང་བཤད་གནང་།
དེ་ནས་ཚོང་ལས་ཡར་རྒྱས་རམ་འདེགས་ལས་གཞིའི་འབྲེལ་ཡོད་ལས་བྱེད་བསྟན་འཛིན་དབང་རྒྱལ་དང་བསྟན་འཛིན་ནོར་བཟང་གཉིས་ཀྱིས་བོད་མིའི་ཚོང་ལས་ཡར་རྒྱས་རམ་འདེགས་ལས་གཞིའི་དགོས་དམིགས་གཙོ་བོ་ནི། བཀའ་ཤག་གི་དགོངས་དོན་བོད་མིའི་གཞིས་ཆགས་ཁག་སྲ་བརྟན་རྒྱུན་གནས་ཡོང་ཐབས་ཀྱི་ཆེད་གཞོན་སྐྱེས་ཁྱད་ལས་མང་དག་ཅིག་གསོ་སྐྱོང་གནང་སྟེ། གཞོན་སྐྱེས་རྣམ་པར་ལས་ཀའི་གོ་སྐབས་ཐོབ་པ་བྱེད་རྒྱུ་དེ་ཆགས་ཡོད་སྐོར་ངོ་སྤྲོད་གནང་ཡོད་པ་མ་ཟད། ལས་གཞིའི་བྱུང་རིམ་དང་དགོས་མཁོ། དམིགས་ཡུལ། ཁེ་ཕན། ནང་དོན། ལས་གཞིའི་ནང་འཛུལ་ཞུགས་བྱེད་སྟངས། ཆ་རྐྱེན་གང་ཚང་དགོས་པ་བཅས་ཀྱི་སྐོར་ལ་ཡང་ངོ་སྤྲོད་གནང་སོང་།
སྤྱིར་བཏང་དཔལ་འབྱོར་ལས་ཁུངས་ཀྱི་བོད་མིའི་ཚོང་ལས་ཡར་རྒྱས་རམ་འདེགས་ལས་གཞི་འདི་བཞིན་བཙན་བྱོལ་བོད་མིའི་མང་ཚོགས་ཀྱི་གནས་བབས་ཡར་རྒྱས་ཕུགས་བརྟན་འགྲོ་ཐབས་སྤྱི་དང་། ཡང་སྒོས་རང་རེའི་སྤྱི་ཚོགས་ནང་ན་གཞོན་ལས་མེད་ཀྱི་དཀའ་ངལ་སེལ་ཐབས་ཀྱི་དམིགས་ཡུལ་གཙོ་བཟུང་གིས་འགོ་འཛུགས་ཞུས་པ་དང་། ལས་གཞི་འདིའི་བརྒྱུད་རྒྱ་གར་དང་བལ་ཡུལ་ནང་གནས་སྡོད་བོད་རིགས་བཟོ་ཚོང་འདྲ་མིན་གཉེར་བཞིན་པའི་ཁོངས་ནས་རང་གི་ཚོང་ལས་འཆར་གཞི་དང་ལྡན་པའི་རྒྱ་སྐྱེད་གཏོང་འཆར་ཡོད་རིགས་དང་། དེ་མཚུངས་ཚོང་ལས་འཆར་གཞི་ཚད་ལྡན་ཁུངས་འཕེར་ཡོད་པའི་ཐོག་བཟོ་ཚོང་ལས་གཞི་གསར་འཛུགས་འདུན་པ་གཉིས་ལྡན་ཡོད་པའི་ན་གཞོན་ཁག་ལ་སྦྱོང་བརྡར་དང་། ཁྲིམས་སྒྲིག་གི་སློབ་སྟོན། མཁས་མྱོང་ཅན་གྱི་ཚོང་པ་དང་། དེ་བཞིན་བཟོ་ཚོང་གསར་འཛུགས་ཐོག་ལམ་སྟོན་དང་རམ་འདེགས་གནང་མཁན་གྱི་ཚོགས་སྡེ་ཆེ་ཁག་གི་མཉམ་འབྲེལ་མཐུད་འཛུགས་ཐབས་བཅས་གླ་ཡོན་གནང་མི་དགོས་པར་རོགས་ཕན་བྱ་རྒྱུ་དང་། བོད་རིགས་ཚོང་པ་གསར་རྙིང་སུ་རུང་ནས་ལས་གཞི་འདིའི་ནང་དོན་དམ་མཉམ་ཞུགས་གནང་འདོད་ཡོད་རིགས་ནས་ཕྱི་ལོ་ ༢༠༡༤ ཟླ་ ༡༡ ཚེས་ ༡༥ ནང་ཚུན་ཁྱབ་ཁོངས་ས་གནས་འགོ་འཛིན་ལས་ཁུངས་ནས་འགེངས་ཤོག་བཀང་སྟེ་དཔལ་འབྱོར་ལས་ཁུངས་སུ་འབུལ་ཐུབ་པ་གནང་དགོས་ཀྱི་འདུག་པ་བཅས།།
