༢༠༡༤ ཟླ་ ༡༠ ཚེས་ ༢༤ རེས་གཟའ་པ་སངས།

༄༅། །ཕྱི་ལོ་ ༢༠༡༤ ཟླ་ ༡༠ ཚེས་ ༢༣ ཉིན་སྤེལ་བའི་གནས་ཚུལ་ལྟར་ན། ཨ་རིའི་གྲོང་ཁྱེར་ནིའུ་ཡོཀ་དང་རྒྱ་གར་རྒྱལ་ས་དིལླི། དེ་བཞིན་སེ་པེན་རྒྱལ་ས་སྦར་སེ་ལོ་ན་བཅས་ནང་རྟེན་གཞི་བྱས་པའི་བོད་པའི་རིག་གཞུང་བསྟི་གནས་ཁང་བོད་ཁང་ཞེས་ཡོངས་གྲགས་ལས་ཁུང་གསུམ་གྱིས་ཐུན་མོང་ཐོག་གླེང་གཞི་ཅན་གྱི་དྲེགས་པ་དོལ་རྒྱལ་ལམ་རྡོ་རྗེ་ཤུགས་ལྡན་ཟེར་བའི་སྐོར་དངོས་ཡོད་བདེན་པའི་གནས་ཚུལ་གཟུར་གནས་བློ་ལྡན་དོན་གཉེར་ཅན་རྣམས་ཀྱི་མཁྱེན་རྟོགས་སླད་དཔེ་དེབ་གཅིག་དང་དྲ་རྒྱ་གསར་པ་ཞིག་དབུ་འབྱེད་གནང་འདུག དེ་ཡང་གོང་འཁོད་བསྟི་གནས་ཁང་གསུམ་གྱི་བསྒྲགས་གཏམ་ནང་གསལ་ལྟར་ན། ཐེངས་འདིར་དྲ་རྒྱ་ (www.shugdeninfo.com) དང་དཔེ་དེབ་དབུ་འབྱེད་གནང་དགོས་པའི་རྒྱུ་མཚན་གཙོ་བོ་ནི། སྤྱི་ཚོགས་ནང་དོལ་རྒྱལ་རྗེས་འབྲང་པ་ཚོས་དོལ་རྒྱལ་ལམ་རྒྱལ་པོ་ཤུགས་ལྡན་ཟེར་བའི་རྒྱུ་དང་ངོ་བོ། བྱེད་ལས་སོགས་ཀྱི་ཁྱད་པར་གང་ཡིན་ཐོག་དྲང་བདེན་མིན་པའི་གནས་ཚུལ་ཁྱབ་སྤེལ་བྱས་པ་ཙམ་མ་ཟད། བཙན་བྱོལ་བོད་མིའི་སྤྱི་ཚོགས་ནང་དོལ་རྒྱལ་རྗེས་འབྲང་པ་ཚོར་དབྱེ་འབྱེད་དང་མཐོང་ཆུང་ཁྱད་གསོད་བྱས་པ་སོགས་གཞི་མེད་ཀྱི་དཀྲོག་གཏམ་ཚད་ལས་བརྒལ་བ་དེ་དག་ལ་བརྟེན་ནས་སྤྱི་ཚོགས་ནང་བོད་མིའི་རིག་གཞུང་ལ་མཐོང་ཕྱོགས་ངན་པ་བཟོ་བཞིན་ཡོད་པ་དེ་དག་འགོག་ཐབས་ཆེད་ཡིན་འདུག གཞན་ཡང་དཔེ་དེབ་ཀྱི་འགོ་བརྗོད་དུ་རྡོ་རྗེ་ཤུགས་ལྡན་གྱི་ལོ་རྒྱུས། ‘Dorje Shugden: A History’ ཞེས་པ་དྲ་རྒྱའི་ཐོག་ནས་ལྟ་ཐུབ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་ནས་དུས་སུ་བོད་མི་ཚོར་དོལ་རྒྱལ་ལམ་རྡོ་རྗེ་ཤུགས་ལྡན་བསྟེན་གསོལ་བྱས་ན། བོད་བརྒྱུད་ནང་བསྟན་རིམ་བཞིན་ལྷ་གསོལ་འདྲེ་གསོལ་བྱ་རྒྱུ་ལྟ་བུར་གྱུར་ནས་དཔལ་ན་ལེནྡྲའི་མཁས་གྲུབ་དུ་མས་སྲོལ་གཏོད་པའི་བཞེད་སྲོལ་དྲི་མ་མེད་པ་དེ་དག་ཉམས་ཆག་ཏུ་འགྲོ་རྒྱུའི་ཉེན་ཁར་གཟིགས་པ་ཙམ་མ་ཟད། དོལ་རྒྱལ་བསྟེན་གསོལ་བྱས་པ་དེས་ཆོས་བརྒྱུད་ནང་ཕན་ཚུན་དབར་དབྱེན་དཀྲུག་དང་ཕྱོགས་རིས་ཡོང་བཞིན་པ་དེས་བོད་རིགས་སྤྱིའི་བདེ་དོན་ལ་གནོད་གཞིར་འགྲོ་བཞིན་ཡོད་པ་དེར་དགོངས་བཞེས་མཛད་ནས་བཀའ་སློབ་སྩོལ་བཞིན་ཡོད།