༢༠༡༤ ཟླ་ ༡༠ ཚེས་ ༢༣ རེས་གཟའ་ཕུར་བུ།
༄༅། ། ཕྱི་ལོ་ ༢༠༡༤ ཟླ་ ༡༠ ཚེས་ ༢༡ ཉིན་གྱི་ཕྱེད་ཡོལ་༸གོང་ས་མཆོག་གིས་ཝན་ཁུ་ཝར་ཚོགས་ཁང་ Vancouver Convention Centre ཆེན་མོའི་ནང་མི་གྲངས་ ༣༠༠༠ བརྒལ་བར་བསམ་བློའི་སློབ་གསོའི་བརྗོད་གཞིའི་ཐོག་ Science of Education of the Heart བགྲོ་གླེང་ལྷན་ཚོགས་ཀྱི་ཚོགས་མགོན་དུ་ཆིབས་སྒྱུར་བསྐྱངས་ནས་བཀའ་སློབ་སྩལ། དེ་ཡང་མགོན་པོ་གང་ཉིད་མཆོག་ཚོགས་ཁང་ནང་ཆིབས་སྒྱུར་བསྐྱངས་སྐབས་ཡི་ཤུའི་རོལ་དབྱངས་སློབ་གྲྭའི་ Saint James Musical Academy སློབ་ཕྲུག་རྣམས་ཀྱིས་སྐྱིད་པའི་གླུ་དབྱངས། ཞེས་པའི་མཉམ་གཞས་གཟིགས་འབུལ་ཞུས། དེ་རྗེས་ལས་རིམ་གཙོ་སྐྱོང་བ་ལྕམ་སྐུ་ཕེའོ་ན་ཌོག་ལ་སི་ཀེ་རེམ་ཊོན་ Fiona Douglas-Crampton ལགས་ཀྱིས་བགྲོ་གླེང་ལྷན་ཚོགས་ངོ་སྤྲོད་ཞུས་པའི་ནང་བརྗོད་གཞི་ནི་ Be the Village ཞེས་པ་ཡིན་འདུག དེ་ཡང་སྐབས་དེར་ལྕམ་སྐུ་ཕེའོ་ན་ཌོག་ལ་སི་ཀེ་རེམ་ཊོན་ལགས་ནས་གོང་འཁོད་བརྗོད་གཞིར་རྩ་འཛིན་ལམ་སྟོན་ལྔ་ཡོད་པ་རྣམས་ངོ་སྤྲོད་ཞུས་པ་རྣམས་ནི། གཞན་དང་མཐུན་ཞིབ་བྱ་རྒྱུ་དང་། གཞན་ལ་བྱམས་བརྩེ་སྤེལ་རྒྱུ། དཀའ་ངལ་རྣམས་འཚེ་མེད་ཞི་བའི་ལམ་ནས་སེལ་ཐབས་བྱ་རྒྱུ། རང་ཉིད་ཞི་བདེ་བག་ཕེབས་ངང་འཚོ་གནས་བྱ་རྒྱུ། དུས་རྒྱུན་དུ་གཟབ་གྲུང་ངང་གནས་རྒྱུ། བཅས་ཡིན་འདུག
དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། ང་ཚོ་ཐོག་མར་ཆུང་དུས་འཚར་ལོངས་བྱེད་སྐབས། སུས་བྱམས་སྐྱོང་བྱས་པ་དེ་གལ་ཆེ་ཤོས་སུ་བརྩི་བའི་བཅོས་མིན་གྱི་བསམ་བློ་ཞིག་ཡོད་པ་ལས་བྱམས་སྐྱོང་བྱེད་མཁན་དེའི་རྒྱབ་ལྗོངས་ཀྱི་གནས་སྟངས་ཇི་འདྲ་ཡིན་མིན་ཐོག་བསམ་བློ་གང་ཡང་གཏོང་གི་མ་རེད། འོན་ཀྱང་རིམ་བཞིན་ང་ཚོ་ཆེ་རུ་འགྲོ་སྐབས་བྱིས་པའི་སྐབས་ཀྱི་བཅོས་མིན་གྱི་བསམ་བློ་དེ་ཡལ་ནས་མི་ཕན་ཚུན་དབར་དཔལ་འབྱོར་དང་སྤྱི་ཚོགས་སོགས་དབུལ་ཕྱུག་དང་གོ་ས་མཐོ་དམའ་སོགས་ཀྱི་ཁྱད་པར་ལྟར་སྣང་དེ་དག་གཙོ་བོར་འཛིན་བཞིན་ཡོད། ང་ཚོ་སུས་ཀྱང་རྙོག་གྲ་དང་དཀའ་ངལ་འདོད་ཀྱི་མེད། འོན་ཀྱང་དཀའ་ངལ་དང་རྙོག་གྲ་རྒྱུན་མི་ཆད་པ་ཞིག་ཡོང་བཞིན་ཡོད། དཀའ་རྙོག་དེ་དག་ཕལ་ཆེ་བ་ང་ཚོ་རང་ཉིད་ཀྱིས་བཟོས་པ་ཆགས་ཡོད། ང་ཚོས་མིའི་རྣམ་སྤྱོད་དང་མཐུན་སྐྱེན་བཀོལ་སྤྱོད་བྱས་ནས་གཏོར་བཤིག་ཚབས་ཆེ་བཟོ་ཐུབ་པའི་གོ་མཚོན་བཟོ་སྐྲུན་བྱེད་བཞིན་ཡོད། དེ་ནི་གཙོ་བོ་དཀའ་ངལ་གང་ཡིན་དྲག་ཤུགས་ཀྱིས་སེལ་ཐུབ་རྒྱུ་རེད། བསམས་པའི་བསམ་བློ་ལ་བརྟེན་ནས་ཡོང་བཞིན་ཡོད། དུས་ཚོད་དེ་ཡོལ་ཟིན། དྲག་ཤུགས་ཀྱིས་དཀའ་ངལ་སེལ་ཐབས་བྱས་ཚེ་ཉམ་ཆུང་བྱིས་པ་དང་བུད་མེད་ཚོར་དཀའ་སྡུག་མང་ཤོས་མྱོང་རྒྱུ་གདོན་མི་ཟ། དེང་སྐབས་འཛམ་གླིང་གི་གནས་སྟངས་ནི་ང་ཚོ་ཕན་ཚུན་གཅིག་ལ་གཅིག་བརྟེན་ནས་འཚོ་གནས་བྱེད་དགོས་པའི་དུས་སྐབས་ཤིག་ཆགས་ཡོད།
དེར་བརྟེན་ཇི་ཙམ་གཞན་གྱི་བདེ་སྡུག་ལ་ཕན་གནོད་བྱུང་བ་དེའི་ཚོད་རང་ཉིད་ཀྱི་བདེ་སྡུག་ལའང་ཕན་གནོད་ཀྱི་འབྲེལ་བ་ཡོད། དཔེར་ན། གོ་ལའི་གནམ་གཤིས་འགྱུར་ལྡོག་གིས་རྒྱལ་མཚམས་ལ་རྩིས་མེད་ཐོག་ཚང་མར་དོ་ཕོག་གཏོང་བཞིན་ཡོད་པ་དེ་ལྟར་ནའང་། ང་ཚོས་འགྲོ་བ་མི་རིགས་ཐེར་འབུམ་བདུན་ཡོད་པ་རྣམས་འགྲོ་བ་མིའི་ཁྱིམ་ཚང་གཅིག་ཡིན་བསམ་པའི་འདུ་ཤེས་རྩ་བ་ནས་མེད་པར་ཁོར་ཡུག་འབག་བཙོག་མུ་མཐུད་བཟོ་བཞིན་ཡོད། དཀའ་ངལ་འདི་ང་ཚོས་སེལ་ཐབས་ཇི་འདྲ་བྱེད་དགོས། ཁྲིམས་དང་གསར་འགྱུར་བརྒྱུད་ལམ། དེ་བཞིན་ཆོས་ཀྱི་ལམ་ནས་དཀའ་ངལ་འདི་མེད་པ་བཟོ་ཐུབ་བམ། བྱམས་བརྩེའི་བསམ་པའི་ཐོག་ནས་གཞན་གྱི་བདེ་དོན་ལ་བསམ་བློ་གཏོང་རྒྱུ་འདི་རྒྱས་སྤྲོས་ཀྱི་བསམ་བློ་ཞིག་མིན། བསམ་བློ་འདི་འདྲ་ཞིག་མེད་ན་ང་ཚོ་ཐུབ་རྒྱུ་ཁག་པོ་ཆགས་ཡོད། དེར་བརྟེན་བསམ་བློ་འདི་ནི་ང་ཚོ་འགྲོ་བ་མིའི་འཆི་གསོན་གྱི་གནད་དོན་ཞིག་ཆགས་ཟིན། དོན་དམ་གྱི་བདེ་སྐྱིད་བསྐྲུན་རྒྱུའི་ནུས་པ་ང་ཚོའི་རྒྱུད་ལ་ཡོད། བདེ་སྐྱིད་ཀྱི་རྩ་བ་བསམ་བློ་ཞི་བདེ་བག་ཕེབས་དགོས། དེ་འདྲ་བྱུང་ན་གང་ཟག་རང་ཉིད་འཕྲོད་བསྟེན་ཡག་པོ་ཡོང་རྒྱུ་མ་ཟད། ཁྱིམ་ཚང་བདེ་སྐྱིད་ལྡན་པ་ཞིག་ཡོང་ཐུབ་པ་དང་། ཁྱིམ་ཚང་བདེ་སྐྱིད་ལྡན་པ་ཞིག་ཡོང་ཐུབ་ན། སྤྱི་ཚོགས་བདེ་སྐྱིད་ལྡན་པ་ཞིག་ཡོང་ཐུབ། ཅེས་བཀའ་སློབ་སྩལ།
དེ་ནས་འབུམ་རམས་པ་སྐུ་ཞབས་ཀིམ་ཤོ་ནེ་ཏི་ Dr Kim Schonert-Reichl ལགས་ཀྱིས་༸གོང་ས་མཆོག་གི་ལམ་སྟོན་དང་ཏཱ་ལའི་བླ་མའི་བསྟི་གནས་ཁང་གཉིས་ཀྱིས་སྤེལ་གནང་མཛད་པའི་ལས་གཞི་དེ་དག་གིས་བྷི་རི་ཊི་ཤི་ཀོ་ལམ་བྷི་ཡའི་ British Columbia སློབ་གྲྭའི་ཤེས་ཡོན་ལམ་ལུགས་ལ་ཤུགས་རྐྱེན་ཇི་འདྲ་ཐེབས་མིན་སྐོར་ངོ་སྤྲོད་ཞུས། མཛད་སྒོའི་མཐའ་མར་ཡི་ཤུའི་རོལ་དབྱངས་སློབ་གྲྭའི་ Saint James Musical Academy སློབ་ཕྲུག་རྣམས་ཀྱིས་གླུ་དབྱངས་ལེན་ནས་མཛད་སྒོ་མཇུག་སྒྲིལ་གནང་འདུག
