༢༠༡༤ ཟླ་ ༡༠ ཚེས་ ༢༤ རེས་གཟའ་པ་སངས།

༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁེ་ན་ཌའི་སྲིད་བློན་སྐུ་ཞབས་སི་ཊེ་ཕེན་ཧར་པར་ Prime Minister Stephen Harper མཆོག་ལ་ཐུགས་གསོ་དང་གདུང་སེམས་མཉམ་སྐྱེའི་གསུང་འཕྲིན་སྩལ་བ་བརྒྱུད་ཉེ་ལམ་ཁེ་ན་ཌའི་གྲོས་ཚོགས་དང་ཉེ་འཁྲིས་སུ་དམག་གི་དྲན་རྟེན་གྱི་འགྲེམས་སྟོན་ཁང་ནང་མི་ཞིག་གིས་མེ་མདས་རྒོལ་རྡུང་བཏང་བར་བརྟེན། དམག་མི་གཅིག་འདས་གྲོངས་སུ་གྱུར་བ་དང་གཞན་ཁག་གཅིག་ལ་རྨས་སྐྱོན་བཏང་བར་མགོན་པོ་གང་ཉིད་མཆོག་གིས་ཤུལ་ལུས་ནང་མི་རྣམས་ལ་སེམས་གསོ་མཛད་ཡོད། དེ་ཡང་གསུང་འཕྲིན་ནང་འཁོད་དོན། བསམ་ཤེས་རྩ་བ་ནས་མེད་པའི་འཚེ་བའི་ལས་དེ་ལྟ་བུ་ནི་ཐ་ཤལ་གྱི་བྱ་སྤྱོད་གཅིག་ཡིན་པར་ངོས་ཀྱི་མཐའ་གཅིག་ཏུ་སྐྱོན་བརྗོད་བྱེད་རྒྱུ་ཡིན། དོན་རྐྱེན་དེའི་འོག་ཚེ་སྲོག་ཤོར་བ་རྣམས་ལ་བསྔོ་སྨོན་དང་རྨས་སྐྱོན་ཕོག་པ་རྣམས་མགྱོགས་མྱུར་དྲག་སྐྱེད་ཡོང་བའི་སྨོན་འདུན་ཞུས་པ་དང་སྦྲགས། འདས་གསོན་ཡོངས་ཀྱི་ཤུལ་ལུས་ནང་མི་སྤུན་མཆེད་རྣམས་དང་ཁེ་ན་ཌའི་མི་མང་རྣམས་ལ་ངོས་ཀྱིས་སྙིང་ཐག་པ་ནས་སེམས་གསོ་དང་གདུང་སེམས་མཉམ་སྐྱེ་ཞུ་རྒྱུ་ཡིན། སྤྱིར་ང་ཚོས་འཚེ་བའི་བྱ་སྤྱོད་དེའི་རིགས་ལ་སྐྱོན་བརྗོད་བྱེད་བཞིན་ཡོད་ཀྱང་དོན་རྐྱེན་དེ་རིགས་ནི་ནད་ཀྱི་མངོན་རྟགས་ལྟ་བུ་ཡིན་པ་ལས་རྒྱུ་རྐྱེན་ངོ་མ་དེ་བས་ཉེན་ཁ་དང་ཛ་དྲག་ཆེ་བའི་གནས་སྟངས་ཤིག་ཡིན་པར་ངོས་ཀྱིས་ཡིད་ཆེས་བྱེད་བཞིན་ཡོད། དེར་བརྟེན་ང་ཚོས་ཕུགས་རྒྱང་རིང་པོར་དམིགས་ནས་རྣམ་དཔྱོད་ཀྱི་བློ་རྒྱ་ཡངས་པོར་ཕྱེ་སྟེ། དཀའ་ངལ་དེ་དག་ལ་གདོང་ལེན་བྱ་རྒྱུ་ཧ་ཅང་གལ་ཆེན་པོ་ཆགས་ཡོད། ཅེས་འཁོད་འདུག