༢༠༡༤ ཟླ་ ༡༠ ཚེས་ ༢༦ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༡༠ ཚེས་ ༢༦ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་བྷར་མིང་ཧམ་གྲོང་སྡེ་ལས་ཁུངས་ཀྱིས་གོ་སྒྲིག་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་ཨ་ལ་བྷ་མ་མངའ་ཁོངས་བྷར་མིང་ཧམ་གྲོང་ཁྱེར་དུ་ཆོས་ལུགས་ཁག་གི་མི་སྣ་དང་ལྷན་ཆོས་དད་ཀྱི་རྭ་བ་ལས་བརྒལ་བ་ (Beyond Belief) ཞེས་པའི་བརྗོད་གཞིའི་ཐོག་བགྲོ་གླེང་ལ་ལྷན་ཞུགས་མཛད་ཡོད་པ་དང། དེ་བཞིན་ཉིན་རྒྱབ་ཨ་རིའི་ཨ་ལ་བྷ་མ་མངའ་ཁོངས་བྷར་མིང་ཧམ་གྲོང་ཁྱེར་གྱི་རྩེད་ཐང་ཆེན་མོར་ཁྱོན་མི་གྲངས་ ༨༠༠༠ བརྒལ་བ་རྣམས་ལ་རི་ཇན་སི་ཕིལ་ཌ་ (Regions Field) ཞེས་པར་ཆོས་ལུགས་དང་མ་འབྲེལ་བའི་བཟང་སྤྱོད་ (Secular Ethics in Our Time) ཅེས་པའི་བརྗོད་གཞིའི་ཐོག་བཀའ་སློབ་སྩལ་འདུག
དེ་ཡང་ཐོག་མར་བྷར་མིང་ཧམ་གྲོང་སྡེ་སྤྱི་ཁྱབ་ (Mayor) མཆོག་གིས་༸གོང་ས་མཆོག་ལ་ཕེབས་བསུ་ཞུས་པ་དང་ཆབས་ཅིག་ངོ་སྤྲོད་གསུང་བཤད་གནང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཨ་ལ་བྷ་མ་མངའ་ཁོངས་བྷར་མིང་ཧམ་གྲོང་ཁྱེར་དུ་ཆིབས་སྒྱུར་བཀའ་དྲིན་བསྐྱངས་པར་ངས་འཚམས་འདྲིའི་བཀྲ་ཤིས་བདེ་ལེགས་ཞུ་བཞིན་ཡོད། བྷར་མིང་ཧམ་གྲོང་ཁྱེར་འདི་བཞིན་མར་ཊིན་ལུ་ཐར་ཀིང་སོགས་ཀྱི་རླབས་ཆེན་མི་ཁག་གཅིག་གིས་བཀའ་དྲིན་ལ་བརྟེན་འཛམ་གླིང་སྟེང་འཕོ་འགྱུར་ཆེན་པོ་ཕྱིན་པའི་ས་གནས་ཤིག་ཆགས་ཡོད། འཛམ་གླིང་ལ་ཞི་བདེ་དགོས་རྒྱུ་གལ་ཆེན་པོ་ཆགས་ཡོད། གང་ལ་ཞེ་ན། ཞི་བདེ་ནི་འགྲོ་བ་མིའི་རིགས་ཀྱི་རྟེན་གཞི་ལྟ་བུ་ཡིན། ཞེས་སོགས་ཀྱི་གསུང་བཤད་གནང།
དེ་ནས་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ཕེབས་དོན། ངོས་རང་འདི་གར་ཡོང་སྟེ། ཁྱེད་རང་ཚོ་དང་ཐུག་རྒྱུ་བྱུང་བར་ཧ་ཅང་དགའ་པོ་བྱུང། ཆོས་ལུགས་གང་འདྲ་ཞིག་ཡིན་རུང་བྱམས་བརྩེའི་བསླབ་བྱ་དགོས་སྐོར་གཅིག་མཚུངས་གསུང་གི་ཡོད། སྤྱིར་བཏང་ཁ་ཆེ་དང་ཡི་ཤུ་ཙམ་དུ་མ་ཟད། ནང་པ་སངས་རྒྱས་པའི་ཆོས་ཀྱི་རྗེས་འབྲང་ནང་དུ་ཡང་ལོག་ལྟ་སྨྲ་མཁན་ཡོད་སྲིད། གལ་ཏེ་ལོག་ལྟའི་བྱ་སྤྱོད་དེ་རིགས་ཆོས་ལུགས་ཤིག་གི་ངོ་བོར་འགྱུར་ཐབས་བྱས་ན་འགྲིག་གི་མེད། དེ་བཞིན་སྐྱེ་བ་ནས་འཆི་བའི་བར་མཚམས་སུ་ང་ཚོ་ནི་འཚོ་བཞིན་གནས་པའི་སེམས་ཅན་ཞིག་ཆགས་ཡོད་པར་བརྟེན། ལུས་སེམས་གཉིས་བདེ་གནས་ཐོག་ཞི་བདེའི་ངང་ནས་འཚོ་ཐབས་ལ་སྔར་ལྷག་འབད་བརྩོན་བྱེད་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། གང་ལ་ཞེ་ན། སེམས་སྐྱིད་པོ་བྱུང་ན་ལུས་པོ་བདེ་ཐང་ལ་ཕན་ཐོགས་ཆེན་པོ་ཡོད། ལྷག་པར་རང་ཉིད་ཀྱི་མི་ཚེ་སྐྱིད་པོ་ཞིག་དང་ཁྱིམ་ཚང་བདེ་སྐྱིད་ལྡན་པ་ཡོང་རྒྱུར་དངུལ་དང་དབང་ཤུགས་ཁོ་ནའི་ཐོག་ནས་ཡོང་ཐབས་མེད། དེར་བརྟེན་རང་རྒྱུད་ལ་ཡོད་པའི་བཟང་སྤྱོད་གོང་འཕེལ་ཐོག་ང་ཚོས་གཞན་གཅེས་འཛིན་གྱི་བསམ་བློ་གཏོང་ཐུབ་ན། རང་ཉིད་ལ་བདེ་སྐྱིད་ཡོང་གི་ཡོད། དེ་ལྟར་ཡོང་བར་སློབ་ཆུང་སྐབས་ནས་སློབ་ཆེན་བར་གྱི་སློབ་ཕྲུག་སོགས་ལ་བྱམས་བརྩེ་གཞི་ལ་བཞག་པའི་ཐོག་ནས་ཤེས་ཡོན་གྱི་སློབ་གསོ་སྤྲོད་དགོས་རྒྱུ་ཤིན་ཏུ་ནས་གལ་འགངས་ཆེན་པོ་ཆགས་ཡོད། ཅེས་སོགས་ཀྱི་བཀའ་སློབ་སྩལ་འདུག
