༢༠༡༤ ཟླ་ ༡༠ ཚེས་ ༨ རེས་གཟའ་ལྷག་པ།
༄༅། །༸གོང་ས་༸སྐྱབས་མགོན་ཆེན་པོ་མཆོག་ལ་ཐེ་ཝན་དད་ལྡན་ཆོས་ཞུ་བ་རྣམས་ཀྱིས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ། ཕྱི་ལོ་ ༢༠༡༤ ཟླ་ ༡༠ ཚེས་ ༦ ནས་ ༩ བར་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔར་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རྩ་བ་ཤེས་རབ་ཀྱི་བཀའ་ཆོས་དབུ་འཛུགས་མཛད་ཡོད། དེ་ཡང་ཕྱི་ཚེས་ ༨ དང་བོད་ཟླ་ ༨ ཚེས་ ༡༥ ཆོས་འབྲེལ་ཉིན་གསུམ་པའི་སྐབས་སྔ་དྲོ་ཆོས་འབྲེལ་འཕྲོ་སྐྱོང་མ་མཛད་གོང་སེར་བྱེས་ཀེའུ་ཚང་རིན་པོ་ཆེ་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་ལ་འཆི་མེད་འཕགས་མའི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་ཡོད། སྐབས་དེར་རྣམ་རྒྱལ་གྲྭ་ཚང་གི་མཁན་པོ་ཁྲོམ་ཐོག་རིན་པོ་ཆེས་དབུ་ཁྲིད་ནས་རྣམ་གྲྭ་དགེ་འདུན་པ་རྣམས་ཀྱིས་བརྟན་བཞུགས་ཀྱི་ཆོ་ག་རྣམས་གསུང་འདོན་གནང་བསྟུན། བརྟན་བཞུགས་བསྟར་འབུལ་ཞུས་པ་༸གོང་ས་མཆོག་གིས་དགྱེས་བཞེས་མཛད་ཡོད། ཀེའུ་ཚང་རིན་པོ་ཆེ་མཆོག་ནི་༸གོང་ས་སྐུ་ཕྲེང་ ༡༤ པ་ཆེན་པོ་མཆོག་དང་ཐུན་མིན་གྱི་འབྲེལ་བ་ཡོད་པ་ནི་ཀེའུ་ཚང་རིན་པོ་ཆེ་སྐུ་ཕྲེང་གོང་མས་ཕྱི་ལོ་ ༡༩༣༧ ལོར་རྒྱལ་བའི་ཡང་སྲིད་འཚོལ་ཆེད་ལྷ་ས་ནས་ཨ་མདོ་སྟག་འཚེར་ཕྱག་འབྲེལ་དང་བཅས་ཕེབས་ཡོད། བརྟན་བཞུགས་གྲུབ་མཚམས་ཆོས་འབྲེལ་འཕྲོ་སྐྱོང་མཛད་ཡོད་ཅིང་། ཕྱི་ཚེས་ ༩ ཉིན་༸གོང་ས་མཆོག་གིས་བྱང་སེམས་སྡོམ་པ་འབོགས་ཆོག་མཛད་རྒྱུ་ཡིན་འདུག
