༢༠༡༤ ཟླ་ ༩ ཚེས་ ༢༢ རེས་གཟའ་ཟླ་བ།
༄༅། །ཨ་རིའི་བོད་དོན་དམིགས་བསལ་འབྲེལ་འཐུས་མ་ལྕམ་སྐུ་ས་རཱ་སི་ཝལ་ Sarah Sewall མཆོག་གིས་ཨ་རིའི་གྲོས་ཚོགས་འོག་མའི་ཚོགས་ཆུང་གལ་ཆེ་ House Oversight and Government Reform Subcommittee on National Security ཞེས་པ་དེའི་ནང་ཨ་རིའི་གཞུང་གིས་བོད་ནང་གི་བོད་མི་ཚོའི་ཆོས་དད་རང་དབང་སྲུང་སྐྱོབ་ཆེད་འབད་བརྩོན་ཇི་འདྲ་གནང་མུས་ཡིན་པའི་སྐོར་སྙན་གསེང་ཞུས་དོན། བོད་མི་ཚོའི་ཆོས་དད་རང་དབང་སྲུང་སྐྱོབ་ཆེད་ང་ཚོས་མུ་མཐུད་རྒྱབ་སྐྱོར་ཧ་ཅང་ཤུགས་ཆེ་བྱེད་བཞིན་པ་དེ་འདྲ་ད་བར་བྱུང་མྱོང་མེད། ཕྲན་རང་ཉིད་ཨ་རིའི་བོད་དོན་དམིགས་བསལ་འབྲེལ་འཐུད་མ་ཡིན་སྟབས། བོད་མིའི་ཆོས་དད་རང་དབང་ཐོག་རྒྱ་གཞུང་གིས་ཐེ་བྱུས་བྱེད་རྒྱུ་མཚམས་འཇོག་ཡོང་སླད་ཨ་རིའི་གཞུང་གིས་འབད་བརྩོན་གནང་བཞིན་པ་དེར་མཐུན་འགྱུར་རམ་འདེགས་ཞུ་རྒྱུ་ཁོ་མོའི་འོས་འགན་ཞིག་ཡིན།

དེར་བརྟེན་ཕྲན་ནས་བོད་མིའི་ཆོས་ཕྱོགས་དང་འབྲེལ་བའི་ཐུན་མིན་རིག་གཞུང་དེ་དག་སྲུང་སྐྱོབ་བྱ་རྒྱུའི་སྲིད་བྱུས་ལག་བསྟར་ཡོང་རྒྱུར་རྒྱབ་སྐྱོར་ཞུ་བཞིན་ཡོད། འདི་ལོའི་ཕྱི་ཟླ་ ༢ པའི་ནང་ཕྲན་གྱི་ལས་ཁུངས་ནང་ལས་ཉིན་གཉིས་པའི་སྐབས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་མཇལ་བ་མ་ཟད། ཕྱི་ཟླ་ ༡༠ ནང་ཕྲན་རང་རྒྱ་གར་དང་བལ་ཡུལ་ནང་བསྐྱོད་ནས་བོད་མི་རྣམས་དང་ཐུག་འཕྲད་བྱ་འཆར་ཡོད། སྲིད་འཛིན་ཨོ་བྷ་མ་མཆོག་དང་ཕྱི་འབྲེལ་དྲུང་ཆེ་ཇོན་ཀེ་རི་མཆོག་རྣམ་གཉིས་ནས་རྒྱ་ནག་གཞུང་ལ་ཤར་ཏུ་ཀི་སི་ཐན་དང་བོད་མི་གནས་སྡོད་ས་ཁུལ་ཁག་ཏུ་ཆོས་དད་རང་དབང་ཐོག་དམ་བསྒྲགས་བྱེད་བཞིན་པ་དེ་དག་ལྷོད་ཡང་གཏོང་པའི་རེ་འདུན་ཡང་ཡང་བཏོན་གནང་ཟིན་པར་བརྟེན། སྔ་ལོ་ཨར་རྒྱ་གཉིས་ཀྱིས་འགྲོ་བ་མིའི་ཐོབ་ཐང་གི་གནད་དོན་ཐོག་གྲོས་མོལ་གནང་སྐབས་གནད་དོན་དེ་དག་ཐོག་ང་ཚོར་སེམས་འཚབ་ཡོད་པ་གསལ་སྟོན་བྱས་པ་མ་ཟད། ང་ཚོས་མུ་མཐུད་ཆོས་དད་རང་དབང་ལ་རྩིས་མེད་རྡོག་རོལ་བཏང་བའི་སྙན་ཐོ་ཨ་རིའི་གྲོས་ཚོགས་ནང་འདོན་རྒྱུ་ཡིན། ང་ཚོས་རྒྱ་ནག་གཞུང་དང་འབྲེལ་བ་བྱེད་སྐབས་གནད་དོན་གལ་གནད་ཆེ་ཤོས་གཉིས་ཡོད་པ་ནི། ཆོས་དད་རང་དབང་དང་འགྲོ་བ་མིའི་ཐོབ་ཐང་གི་གནས་སྟངས་ཡིན། ཕྱི་གསལ་ནང་གསལ་གྱི་སྤྱི་ཚོགས་དང་འཇིགས་སྐུལ་རིང་ལུགས་ལ་གདོང་ལེན་བྱ་རྒྱུ་གཉིས་དབར་རང་བཞིན་གྱི་འབྲེལ་བ་ཞིག་ཡོད་པ་ང་ཚོས་ཉམས་མྱོང་བསགས་ཡོད། ང་ཚོས་ཉམས་མྱོང་འདི་རྒྱ་ནག་གཞུང་ལ་སྤེལ་བཞིན་ཡོད། སྤྱི་ཚོགས་ནང་ཕྱི་གསལ་ནང་གསལ་ཡོད་ན། གྲངས་ཉུང་མི་རིགས་ཀྱི་ཐོབ་ཐང་བརྡལ་བཤིག་གཏོང་སྐབས་ངོ་རྒོལ་བྱེད་ཆོག་པ་མ་ཟད། ཁྲིམས་ལུགས་དབང་བསྒྱུར་ཐོག་ནས་ཐོབ་ཐང་དེ་དག་སྲུང་སྐྱོབ་བྱེད་ཐུབ། ཅེས་སོགས་གསུངས།