༢༠༡༤ ཟླ་ ༩ ཚེས་ ༡༩ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༩ ཚེས་ ༡༨ ཉིན་སྔ་དྲོ་ཆུ་ཚོད་ ༩།༣༠ ཐོག་དཔལ་ལྡན་ཚོགས་གཙོ་མཆོག་གིས་གྲོས་ཚོགས་དབུ་འཛུགས་ཐོག ཉིན་འདིའི་ལས་རིམ་ ༡ པོ། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞིའི་དོན་ཚན་ ༡༢༨ པའི་དགོངས་དོན་ལྟར། བཙན་བྱོལ་བོད་མིའི་ཤེས་ཡོན་སྲིད་བྱུས་གཏན་འབེབས་ཟིན་ནས་མི་ལོ་ ༡༠ ཙམ་སོང་ཟིན་པ། བཙན་བྱོལ་བོད་མིའི་སློབ་གྲྭ་ཡོངས་སུ་ལག་བསྟར་ཇི་ཙམ་འཁེལ་མིན་ཐད་ཤེས་ཡོན་ཚོགས་ཆུང་ཞིག་འཛུགས་རྒྱུའི་གཞུང་འབྲེལ་གྲོས་ཆོད་གྲོས་འཆར་ཞིག་སྤྱི་འཐུས་བློ་བཟང་ཡེ་ཤེས་ལགས་ཀྱིས་བཏོན་གནང་བ་དང་། སྤྱི་འཐུས་སྒྲོལ་མ་ཚེ་རིང་ལགས་ཀྱིས་རྒྱབ་སྐྱོར་གནང་། དེ་བགྲོ་གླེང་དུ་ཚུད་པར་དཔལ་ལྡན་སྲིད་སྐྱོང་མཆོག་གིས་དགག་བྱ་གནང་བ་དང་སྦྲགས་འཛིན་སྐྱོང་ནས་མི་ལྔ་ལས་གྲུབ་པའི་རྟོག་ཞིབ་ཚོགས་ཚུང་ཞིག་བཙུགས་ཟིན་པ་སོགས་ཀྱི་གསལ་བཤད་གནང་རྗེས། དགག་བྱ་ ༦ དང་རྒྱབ་སྐྱོར་ ༢༠ ཡི་ཐོག་གྲོས་ཆོད་གྲོས་འཆར་དེ་མང་མོས་ཐོག་ཚུད་དེ། གྲོས་ཚོགས་ནང་ཚོགས་ཐུན་གསུམ་མིན་ཙམ་རིང་སྤྱི་འཐུས་ཆ་ཤས་བཞེས་མཁན་རྣམས་ཀྱིས་དགོངས་ཚུལ་གསུངས་པ་དང་། དཔལ་ལྡན་སྲིད་སྐྱོང་དང་ཤེས་རིག་བཀའ་བློན་མཆོག་གིས་གསལ་བཤད་གནང་དགོས་ཁག་གནང་མཐར་དགག་བྱ་ ༡༥ དང་རྒྱབ་སྐྱོར་ ༡༧ ཐོག་གྲོས་ཆོད་གྲོས་འཆར་ལ་མང་མོས་བྱུང་སྟེ་ཤེས་ཡོན་སྲིད་བྱུས་དང་འབྲེལ་བའི་ཤེས་ཡོན་ཚོགས་ཆུང་འཛུགས་རྒྱུ་གནང་།
