༢༠༡༤ ཟླ་ ༩ ཚེས་ ༢༩ རེས་གཟའ་ཟླ་བ།
༄༅། །རྒྱ་གཞུང་གིས་འབྲི་རུ་རྫོང་རྩ་ལ་ཤང་གི་བོད་མི་ཚོར་བཙན་བཀའ་བཏང་སྟེ། བོད་མི་ཚོས་དབྱར་སྐྱིད་ལ་མ་རོལ་ཚེ་བཙོན་འཇུག་བྱ་རྒྱུ་ཡིན་ཚུལ་བརྗོད་ཡོད་འདུག
དེ་ཡང་བརྒྱུད་ལམ་ཁག་གི་ནང་གནས་ཚུལ་ཐོན་གསལ་ལྟར་ན། ཉེ་ལམ་རྒྱ་ནག་གཞུང་གིས་འབྲི་རུ་རྫོང་རྩ་ལ་ཤང་དུ་ལས་བྱེད་མངགས་གཏོང་གིས་མི་མང་ལ་འདི་ལོའི་ས་གནས་ཀྱི་དབྱར་སྐྱིད་སྐབས། ས་གནས་གཞན་དུ་ཡོད་པའི་འབྲི་རུ་རྫོང་གི་མི་མང་ཚང་མ་ས་གནས་སུ་མཉམ་འཛོམས་ཐོག་གླུ་གཞས་འཁྲབ་སྟོན་སོགས་ཀྱི་ལམ་ནས་དབྱར་སྐྱིད་ལ་རོལ་དགོས་པའི་བཙན་བཀའ་བཏང་ཡོད་པ་མ་ཟད། གལ་སྲིད་དབྱར་སྐྱིད་ཀྱི་ལས་འགུལ་ནང་མཉམ་ཞུགས་མ་བྱས་པའི་རིགས་ཡོད་ཚེ། ལོ་རྗེ
ས་མར་ས་གནས་སུ་དབྱར་རྩྭ་དགུན་འབུ་བཀོག་རྒྱུར་བཀག་འགོག་བྱ་རྒྱུ་དང་། རྩ་ལ་ཤང་གི་དམག་སྒར་དུ་བཙོན་འཇུག་བཀག་ཉར་གྱིས་རྒྱལ་གཅེས་ཆོས་གཅེས་ཀྱི་སློབ་གསོ་སོགས་སྤེལ་རྒྱུ་ཡིན་ཚུལ་བརྗོད་འདུག
ཕྱི་ལོ་ ༢༠༠༨ ལོར་བོད་ས་ཁྱོན་ཡོངས་སུ་ས་བྱི་ཞི་རྒོལ་ཆེན་མོ་བྱུང་སྟེ། རྒྱ་ནག་གཞུང་གིས་བོད་མི་མང་པོ་དམར་གསོད་དང་འཛིན་བཟུང་བྱས་རྗེས། བོད་རང་སྐྱོང་ལྗོངས་ནག་ཆུ་ས་ཁུལ་འབྲི་རུ་རྫོང་གི་བོད་མི་ཚོས། ལོ་རེར་འཆར་ཅན་རོལ་བཞིན་པའི་ལོ་གསར་དང་དབྱར་ཁའི་དབྱར་སྐྱིད་གཙོས་དམངས་ཁྲོད་ཀྱི་ལས་འགུལ་མང་དག་ཅིག་སྤེལ་གྱི་མེད་ཀྱང་། ཉེ་ཆར་རྒྱ་གཞུང་གིས་འབྲི་རུ་མི་མང་ལ་བཙན་བཀའ་བཏང་རྗེས། ས་གནས་གཞན་དུ་ཡོད་པའི་འབྲི་རུ་རྫོང་གི་བོད་མི་ཚོ་འདོད་མོས་ཡོད་མེད་ལ་མ་ལྟོས་པར་ཕྱིར་རང་ཡུལ་དུ་ལོག་དགོས་བྱུང་ཡོད་འདུག་ལ། རྒྱ་གཞུང་གིས་ད་ལྟའི་ཆར་ཡང་ས་གནས་སུ་དམག་མི་འགྲེམས་འཇོག་གིས་དམ་བསྒྲགས་དང་ལྟ་རྟོག་ནན་མོ་བྱེད་ཀྱི་ཡོད་འདུག
ཕྱི་ལོ་ ༢༠༡༣ ལོར་རྒྱ་གཞུང་གིས་འཛམ་གླིང་མི་མང་ལ་བོད་ནང་གི་བོད་མི་ཚོས་ཞི་བདེ་ལྷིང་འཇགས་ཀྱི་འཚོ་བ་རོལ་བཞིན་པའི་རྣམ་པ་སྟོན་ཆེད་འབྲི་རུ་ས་གནས་སུ་བཙན་དབང་གིས་བྱ་འགུལ་མང་དག་ཅིག་སྤེལ་བཅུག་ཡོད་ཀྱང་། ས་གནས་བོད་མི་ཚོས་གཏེར་ཁ་སྔོག་འདོན་དང་བཙན་དབང་གིས་རྒྱ་དར་སྒྲེང་འཛུགས་བྱས་བཅུག་པའི་སྲིད་བྱུས་རིམ་པར་ངོ་རྒོལ་བྱས་སྟབས། སྐབས་དེར་དམག་མི་སྟོང་ཕྲག་མང་པོ་འགྲེམས་འཇོག་གིས་བོད་མི་དམར་གསོད་དང་། འཛིན་བཟུང་ཁྲིམས་ཆད་སོགས་བཏང་སྟེ། བོད་མི་མང་པོ་ཞིག་ད་ལྟའི་ཆར་རྒྱ་གཞུང་གི་བཙོན་ཁང་དུ་ལྷག་ཡོད་འདུག
