༢༠༡༤ ཟླ་ ༩ ཚེས་ ༡༩ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༩ ཚེས་ ༡༨ ཉིན་བཞུགས་སྒར་དུ་རྟེན་གཞི་བྱས་པའི་དབུ་མའི་ལམ་མི་དམངས་ལས་འགུལ་ཁང་གིས་གོ་སྒྲིག་འོག་དབུ་མའི་ལམ་གྱི་ཉིན་ཐེངས་བཞི་པ་སྲུང་བརྩིའི་མཛད་སྒོར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དྲིལ་བསྒྲགས་དྲུང་ཆེ་བཀྲ་ཤིས་ཕུན་ཚོགས་ལགས་ཀྱིས་གཙོས་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་དང་། མི་མང་རྣམས་ལྷན་འཛོམས་ཐོག་ལས་འགུལ་ཁང་གི་ཚོགས་གཞོན་ཡོན་ཏན་རྒྱ་མཚོ་ལགས་ཀྱིས་ངོ་སྤྲོད་གསུང་བཤད་གནང་།
དེ་ནས་སྐུ་མགྲོན་གཙོ་བོས་གསུང་བཤད་གནང་དོན། དེ་རིང་འདི་གར་ཕེབས་པའི་རྣམ་པ་ལྷན་རྒྱས་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། སྤྱིར་བཏང་དབུ་མའི་ལམ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་བཀའ་སྤྱི་གཉིས་ནས་མང་གཙོའི་འགྲོ་ལུགས་ལྟར། གོ་བསྡུར་རིམ་པ་གནང་བའི་ཐོག་ནས་གཏན་འབེབས་གནང་བའི་སྲིད་བྱུས་ཤིག་ཆགས་ཀྱི་ཡོད། སྤྱི་ཚོགས་ནང་བསམ་ཚུལ་དང་དམིགས་ཡུལ་སོགས་འདྲ་མིན་ཡོང་སྲིད་ཀྱི་རེད། འོན་ཀྱང་མཐར་དོན་བབས་ས་མང་ཚོགས་ཀྱི་བདེ་དོན་རྒྱུ་མཚན་ལྡན་ཐོག་དངོས་ཡོད་གནས་ཚུལ་དང་མཐུན་པ་མ་ཟད། དེང་དུས་ཆབ་སྲིད་ཀྱི་འགྲོ་སྟངས་དང་མཐུན་པའི་ཐབས་ལམ་བཟང་ཤོས་གང་ཞིག་འདུག དེའི་ཐོག་བསམ་བློ་བཏང་སྟེ་འགྲོ་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། ང་ཚོ་ལྟ་བུ་ཡིན་རུང་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་འོག་འཚར་ལོངས་བྱུང་སྟེ། མང་གཙོའི་སྤྱི་ཚོགས་བརྒྱུད་མྱོང་མཁན་ཞིག་ཆགས་ཡོད། དེར་བརྟེན་དབུ་མའི་ལམ་ནི། ༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་མི་མང་སོགས་ཀྱིས་བསམ་ཞིབ་བྱས་པའི་ཐུན་མོང་གི་སྲིད་བྱུས་ཤིག་ཡིན་པ་འགན་ཁུར་བླང་པའི་ཐོག་ནས་ངོས་ལེན་བྱེད་དགོས་རྒྱུ་ཤིན་ཏུ་ནས་གལ་འགངས་ཆེན་པོ་ཆགས་ཡོད། དབུ་མའི་ལམ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་རྒྱའི་གནད་དོན་འཚེ་བ་མེད་པ་དང་། གྲོས་མོལ་གྱི་ལམ་ནས་སེལ་རྒྱུར་དམིགས་ཏེ་ལམ་སྟོན་མཛད་པའི་སྲིད་བྱུས་ཤིག་ཆགས་ཡོད། དེ་བཞིན་མང་ཚོགས་ཀྱི་ངོས་ནས་དེ་རིང་དབུ་མའི་ལམ་སྲུང་བརྩི་ཞུས་པ་ཙམ་མ་ཡིན་པར། དབུ་མའི་ལམ་གྱི་སྲིད་བྱུས་བརྒྱུད་ནས་བོད་ཀྱི་སྤྱི་དོན་ལ་གྲུབ་འབྲས་ཐོན་ཐབས་སུ་མཉམ་རུབ་གནང་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། ཅེས་སོགས་ཀྱི་གསུང་བཤད་གནང་། །
