༢༠༡༤ ཟླ་ ༩ ཚེས་ ༨ རེས་གཟའ་ཟླ་བ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་རྒྱ་གར་ནང་ཆོས་ལུགས་འདྲ་མིན་གྱི་དབུ་ཁྲིད་རྣམས་ལྷན་ཚོགས་གནང་རྒྱུ་ཡིན་འདུག
ཕྱི་ལོ་ ༢༠༡༤ ཟླ་ ༩ ཚེས་ ༢༠ དང་ ༢༡ བར་ཉིན་གྲངས་གཉིས་རིང་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་ཧེ་ཡ་རི་ཇོན་སིན་ཞེས་པའི་གསོལ་མགྲོན་ཁང་དུ་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་ཆེད་དུ་མགྲོན་འབོད་གནང་བའི་རྒྱ་གར་རྒྱལ་ཡོངས་མངའ་སྡེ་འདྲ་མིན་ ༢༤ ལྷག་གི་ཆོས་ལུགས་འདྲ་མིན་གྱི་དབུ་ཁྲིད་ཁག་དང་མཁས་པའི་མི་སྣ་སོགས་ཀྱིས་ལྷན་ཚོགས་གནང་འཆར་ཡོད་འདུག
དེ་ཡང་མགོན་པོ་གང་ཉིད་མཆོག་གིས་ལྷན་ཚོགས་དེ་ལྟར་སྐོང་ཚོགས་མཛད་དགོས་པའི་དམིགས་ཡུལ་གཙོ་བོ་ནི། འཛམ་གླིང་འདིའི་ནང་ཆོས་ལུགས་འདྲ་མིན་ཡོད་པ་རྣམས་ནས་འགྲོ་བ་མིའི་བདེ་དོན་སྒྲུབ་ཐབས་བྱེད་དགོས་པའི་དོན་གནད་དང། དེ་བཞིན་རྒྱ་གར་ནང་ཆོས་ལུགས་འདྲ་མིན་མཉམ་གནས་བྱེད་བཞིན་ཡོད་པ་ཚོའི་འོས་འགན་སྒྲུབ་ཐབས་ཡིན་སྐོར་ལྡི་ལི་སྐུ་ཚབ་དོན་གཅོད་བཀའ་ཟུར་བསྟན་པ་ཚེ་རིང་མཆོག་གིས་བརྒྱུད་ལམ་ཁག་གཅིག་ནང་འགྲེལ་བརྗོད་གནང་གསལ། སྤྱིར་བཏང་ལྷན་ཚོགས་འདི་ནི་ཧ་ཅང་གནད་འགག་ཆེན་པོ་རེད་བསམ་གྱི་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་རྟག་ཏུ་ཆོས་ལུགས་འདྲ་མིན་དར་སྤེལ་ཡོང་དགོས་དོན་ནི། མིའི་ཁམས་དང་མོས་པར་བསྟུན་ཡོད་པ་མ་ཟད། འགྲོ་བ་མིའི་ཞབས་འདེགས་བསྒྲུབ་རྒྱུའི་ཆ་རྐྱེན་ཞིག་ཆགས་ཡོད། དེར་བརྟེན་ཆོས་ཕྱོགས་དབུ་ཁྲིད་རྣམས་ཕན་ཚུན་དབར་དམ་ཚིག་གཙང་མ་དགོས་རྒྱུ་ཧ་ཅང་གལ་ཆེ་ཡིན།
དེ་ལྟར་ཡོད་པའི་ཐོག་ནས་མང་ཚོགས་ལ་ཞབས་འདེགས་བསྒྲུབ་དགོས། ལྷག་པར་རྒྱ་གར་ནང་འཛམ་གླིང་འདིའི་ཐོག་གི་ཆོས་ལུགས་ཆེ་ཁག་མང་ཆེ་བ་ཉམས་ལེན་བྱེད་མཁན་རྣམས་གནས་ཡོད། དེར་བརྟེན་རྒྱ་གར་ནང་གི་ཆོས་ལུགས་མཐུན་སྒྲིལ་དེ་ནི་མིག་དཔེ་བཟང་པོ་ཞིག་ཏུ་འགྲོ་རྒྱུའི་གནས་ཚུལ་ཡག་པོ་ཡོད་སྟབས། རྒྱ་གར་གཞུང་དམངས་གཉིས་ཀྱིས་དེ་ཤེས་པའི་ཐོག་ནས་གོང་འཕེལ་གཏོང་རྒྱུས་མཚོན་མིག་དཔེ་བཟང་པོ་འདི་འཛམ་གླིང་མི་མང་ནང་ཁྱབ་ཐབས་བྱེད་རྒྱུར་བསམ་བློ་གཏོང་དགོས། དེ་བཞིན་རྒྱ་གར་ནང་གི་ཆོས་བྱེད་མཁན་ཚོའི་ངོས་ནས་མཆོད་ཁང་ནང་དུ་བསྡད་པ་ཙམ་མ་ཡིན་པར་མི་དམངས་ཁྲོད་ལ་ཕེབས་ཏེ། མི་དམངས་ཀྱི་བདེ་དོན་ཐོག་བསམ་བློ་གཏོང་རྒྱུ་ཧ་ཅང་གལ་ཆེན་པོ་ཆགས་ཡོད། ཅེས་སོགས་ཀྱི་བཀའ་སློབ་སྩལ་དང་སྩོལ་མུས་ཀྱི་ཐུགས་ཞིབ་མང་དག་ཅིག་མཛད་དེ་༸གོང་ས་༸སྐྱབས་མགོན་ཆེན་པོ་མཆོག་གིས་ཐེངས་འདིའི་ལྷན་ཚོགས་བསྡུ་སྐོང་མཛད་ཀྱི་ཡོད། ཅེས་སོགས་ཀྱི་འགྲེལ་བརྗོད་གནང་འདུག
