༢༠༡༤ ཟླ་ ༩ ཚེས་ ༣༠ རེས་གཟའ་མིག་དམར།
༄༅། །ཕྱི་ལོ་ ༢༠༡༤ ཟླ་ ༩ ཚེས་ ༢༧ ཉིན་ཧོང་ཀོང་ནང་རྟེན་གཞི་བྱས་པའི་ (Regal Riverside Hotel) ཞེས་པའི་གསོལ་མགྲོན་ཁང་ནང་བོད་ཀྱི་གློག་བརྙན་དུས་སྟོན་ཞིག་གོ་སྒྲིག་གནང་བའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བརྙན་འཕྲིན་ལམ་ནས་བཀའ་སློབ་གསུང་འཕྲིན་སྩལ་དོན། ད་ལམ་ཧོང་ཀོང་ནང་བོད་དོན་དང་འབྲེལ་བའི་གློག་བརྙན་སྟོན་བཞིན་ཡོད་འདུག་པས། ཁྱེད་རང་ཚོ་འབད་བརྩོན་བྱེད་མཁན་ཚང་མར་ཐུགས་རྗེ་ཆེ་བརྗོད་རྒྱུ་དང་འབྲེལ་འཚམས་འདྲིའི་བཀྲ་ཤིས་བདེ་ལེགས་ཡོད། ཉེ་ཆར་བོད་ཀྱི་གནས་སྟངས་སྐོར་ལ་གློག་བརྙན་མང་དག་ཅིག་ཡོང་གི་ཡོད། དེ་བཞིན་གློག་བརྙན་གྱི་ལག་རྩལ་བྱུང་རྗེས་བོད་ནང་བརྒྱབ་པའི་གློག་བརྙན་རྙིང་པ་ཡོད་པ་དེ་དག་གི་གྲས་ཡོད་ངེས་རེད། གང་ལྟར་བོད་ཀྱི་དེ་སྔ་དང་དེང་སྐབས་ཀྱི་གནས་ཚུལ་དང་འབྲེལ་བའི་གློག་བརྙན་སྟོན་གྱི་ཡོད་ཀྱི་རེད།
དུས་རབས་བདུན་པ་བརྒྱད་པའི་སྐབས་གློག་བརྙན་མེད། དེ་དུས་ཀྱི་གློག་བརྙན་ཡོད་ན་ང་ཚོར་ཧ་ཅང་ལྟད་མོ་ཆེན་པོ་དང་བསླབ་བྱ་ལེན་རྒྱུ་ཞིག་ཡོད། དེ་བཞིན་གློག་བརྙན་བཟོ་རྒྱུ་ཡང་གཞི་མ་ལྟ་བུ་བོད་ཀྱི་གནས་ཚུལ་དང་འབྲེལ་བ་ཆགས་ཡོད་འདུག བོད་ལ་འཛམ་གླིང་སྤྱི་ཡོངས་ཀྱིས་འཛམ་གླིང་གི་ཡང་ཐོག་ཅེས་བརྗོད་ཀྱི་འདུག་པ་ནི་བདེན་པ་རེད། བོད་ནི་ས་མཐོན་པོ་དང་ས་གྲང་མོ་ཡིན་པར་བརྟེན་གངས་དང་འཁྱགས་པ་ཤུགས་ཆེན་པོ་ཡོད། དེ་ལྟ་བུའི་ཐོག་ནས་ཨེ་ཤི་ཡའི་ཕལ་ཆེར་ཁྱོན་ཡོངས་ཀྱི་རྒྱུག་ཆུ་གལ་ཆེ་བ་མང་པོ་ཞིག་བོད་ནས་ཡོང་གི་ཡོད་སྟབས། བོད་ཀྱི་ཁོར་ཡུག་ཧ་ཅང་གལ་ཆེན་པོ་ཆགས་ཡོད། དེ་བཞིན་ས་མཐོན་པོ་དང་རླུང་སྐམ་པོ་ཡིན་སྟབས། ཁོར་ཡུག་ལ་ཐེངས་ཤིག་གནོད་སྐྱོན་ཤོར་ན། དེ་རང་བཞིན་གྱིས་གསོ་རྒྱུར་དུས་ཡུན་རིང་པོ་འགོར་གྱི་རེད། ཅེས་མཁས་པ་ཚོས་བརྗོད་ཀྱི་འདུག དེར་བརྟེན་བོད་ཀྱི་ཁོར་ཡུག་སྲུང་སྐྱོབ་དང་བདག་གཅེས་བྱེད་རྒྱུ་ཤིན་ཏུ་ནས་གལ་འགངས་ཆེན་པོ་རེད། འཛམ་གླིང་སྤྱི་ལ་ཡང་འབྲེལ་བ་ཡོད། དེ་སྔ་ངོས་ཀྱིས་ཁོར་ཡུག་ཐོག་མཁས་པ་ཡིན་པའི་རྒྱ་རིགས་ཤིག་གིས་རྩོམ་ཡིག་བྲིས་པ་ཞིག་མཐོང་བྱུང་། དེའི་ནང་འཛམ་གླིང་ལྷོ་བྱང་རྩེ་མོ་གཉིས་ནས་དྲོད་ཚད་ཀྱི་ཤུགས་རྐྱེན་ག་ཚོད་སླེབས་ཀྱི་ཡོད་པ་ལྟར། བོད་ཀྱི་ས་མཐོའི་སྒང་ནས་ཤུགས་རྐྱེན་དེ་ཡོང་གི་ཡོད་པར་བརྟེན། ནམ་རྒྱུན་འཛམ་གླིང་ (South Pole) ལྷོ་སྣེ་དང་ (North Pole) བྱང་སྣེ་ཞེས་བརྗོད་ཀྱི་ཡོད།
དེ་བཞིན་བོད་ལ་ (Pole) སྣེ་གསུམ་པའི་ཐ་སྙད་ཅིག་ཀྱང་སྦྱར་གྱི་འདུག་པ་ཧ་ཅང་གནད་འགག་ཆེན་པོ་རེད་འདུག བོད་ལ་ལོ་སྟོང་ཕྲག་རིང་གི་རིག་གཞུང་ཡོད། གཙོ་བོ་ལུང་པ་གང་ཞིག་ཡིན་རུང་གཡས་གཡོན་ནས་རིག་གཞུང་དེ་འདྲ་ཡོང་གི་རེད། འོན་ཀྱང་ནང་པ་སངས་རྒྱས་པའི་ལྟ་གྲུབ་ལ་ཆ་མཚོན་ན། ཕལ་ཆེར་ན་ལེནྡྲའི་ཆོས་བརྒྱུད་གཙོ་བོ་བྱས་འདུག དེ་ནི་དངོས་གནས་རྒྱ་ཆེ་གཏིང་ཟབ་ཅིག་རེད། དེང་སྐབས་དུས་རབས་ཉེར་གཅིག་པ་འདིའི་ནང་ཚན་རིག་པ་དང་མཉམ་དུ་ནང་སེམས་ཁམས་རིག་པའི་སྐོར་དང་དངོས་པོའི་རྡུལ་ཕྲ་མོའི་ཐོག་ལྟ་སྐབས། དབྱིན་སྐད་ནང་ (Quantum Physics) ཀོན་ཊོམ་ཕི་སི་སི་ཞེས་བརྗོད་ཀྱི་འདུག དཔལ་ན༌ལེནྡྲའི་ཆོས་བརྒྱུད་ཀྱི་ལྟ་གྲུབ་ནང་དེ་དག་ཏག་ཏག་ཡོད་པ་ཞིག་ཆགས་ཀྱི་ཡོད། སེམས་ཁམས་རིག་པའི་སྐོར་ལ་ཆ་མཚོན་ན་ཧ་ཅང་རྒྱས་པོ་ཡོད།
བརྙན་འཕྲིན་གཟིགས་ཆེད་འདིར་གནོན།
དེང་སྐབས་ཚན་རིག་པ་དང་དམིགས་བསལ་ཆོས་ལ་དོ་སྣང་མེད་མཁན་ཚོས་དེ་དག་ལ་དོ་སྣང་བྱེད་བཞིན་འདུག འཛམ་གླིང་སྤྱི་ཡོངས་ཐོག་ཆ་བཞག་ན། ང་ཚོ་མི་ཚང་མ་འཚེ་བ་དང་གཅིག་གིས་གཅིག་ལ་ཕྲག་དོག་དང་འགྲན་སེམས། གཉའ་གནོན། བཤུ་གཞོག་སོགས་ཡིད་ཐང་ཆད་པའི་དུས་ཚོད་འདི་ལྟ་བུ་ནི་གཙོ་བོ་ནང་བསམ་བློའི་ཐོག་ནས་ཡོང་གི་ཡོད་པ་གཞི་ནས་དེང་སྐབས་དོ་སྣང་ཡོང་གི་འདུག དེ་སྔ་ཡིན་ན་རྐྱེན་ངན་དེ་དག་ཕྱི་རོལ་ནས་རང་བཞིན་གྱིས་བྱུང་བ་ལྟ་བུ་ཞིག་རེད་བསམས་ཀྱི་ཡོད་ཀྱང་དེ་ལྟར་མིན།
དཔེར་ན། ཚན་རིག་དང་འཕྲུལ་ཆས་རིགས་ནི་མིར་ཕན་བདེ་བསྒྲུབ་རྒྱུ་རེད་མ་གཏོགས་གནོད་པ་སྐྱེལ་ཆེད་མ་རེད། འོན་ཀྱང་ཀུན་སློང་རང་རྒྱལ་གཞན་ཕམ་ཐོག་ཕྱིན་ན། ངོ་མཚར་སྐྱེ་རྒྱུའི་ཚན་རིག་གི་ཤེས་བྱ་དང་འཕྲུལ་ཆས་རིགས་མིར་སྡུག་བསྔལ་བཟོ་རྒྱུའི་ཐོག་འགྲོ་གི་འདུག དེ་ལྟ་བུའི་སྐབས་ཤིག་ལ་དཔལ་ན་ལེནྡྲ་ནས་བརྒྱུད་པའི་སེམས་ཁམས་དང་དངོས་ཁམས་རིག་པའི་སྐོར་ཡོད་པ་འདི་དུས་རབས་ཉེར་གཅིག་པ་འདིའི་ནང་དགོས་མཁོ་དང་འབྲེལ་བ་ཡོད་པ་ཞིག་ཆགས་ཡོད། དེ་རིང་ཁྱེད་རང་ཚོས་བོད་དང་འབྲེལ་བའི་གློག་བརྙན་ལྟ་སྐབས། ཁ་ཐུག་ཕྱིའི་རྣམ་པ་གཟུགས་དང་སྒྲ། གང་ལྟར་གློག་བརྙན་ནང་ནས་དྲི་དང་རོ། རེག་བྱ་བསླེབ་རྒྱུ་མེད། འོན་ཀྱང་གཟུགས་དང་སྒྲ་དེའི་ནང་ཡོང་གི་ཡོད། དེར་བརྟེན་གཟུགས་སྒྲ་ཡོང་གཞི་ནི་མིའི་ཡིད་བློའི་རྣམ་པར་ཤེས་པ་དང་རྟོགས་པའི་སྒང་ནས་ཡོང་གི་ཡོད། རྟོགས་པ་བཟང་ངན་གྱི་རྐྱེན་པས་མིར་བདེ་སྡུག་ཡོང་གི་ཡོད་པ་མ་ཟད། སྤྱི་ཡོངས་ལ་ཕན་གནོད་ཡོང་རྒྱུ་ཡང་རྩ་བ་ཡིད་བློར་ཐུག་གི་ཡོད། དེར་བརྟེན་སེམས་ཁམས་རིག་པ་ནི་ཧ་ཅང་གལ་ཆེན་པོ་རེད་འདུག ངོས་རང་རྒྱུན་དུ་ནས་དེར་དོ་སྣང་བྱེད་ཀྱི་ཡོད། ངོས་ཀྱིས་འདས་པའི་ལོ་སུམ་ཅུ་བཞི་བཅུའི་རིང་ལ་ཚན་རིག་པ་མང་པོ་དང་ཐུག་སྟེ་གོ་བསྡུར་བྱེད་མྱོང་ཡོད། ཁྱེད་རང་ཚོ་ཚང་མས་བསམ་བློ་བཏང་སྟེ་གནས་ཚུལ་གང་ཞིག་ཡིན་རུང་སྣང་ཚོད་ཙམ་ལ་ཆ་མ་བཞག་པར། ཡིན་ལུགས་གང་འདྲ་ཡིན་མིན་ཐོག་ཞིབ་འཇུག་བྱེད་དགོས་རྒྱུ་ཧ་ཅང་གལ་ཆེན་པོ་རེད། ནང་པ་ཞིག་གི་ངོས་ནས་བཤད་ན། སངས་རྒྱས་བཅོམ་ལྡན་འདས་ཀྱིས། །དགེ་སློང་དག་གམ་མཁས་རྣམས་ཀྱིས། །བསྲེག་བཅད་བརྡར་བའི་གསེར་བཞིན་དུ། །ལེགས་པར་བརྟག་ལ་ང་ཡི་བཀའ། །བླང་བ་བྱ་ཡི་གུས་ཕྱིར་མིན། །ཞེས་གསུངས་པ་ལྟར་ཞིབ་འཇུག་དང་བརྟག་དཔྱད་བྱེད་རྒྱུ་ཧ་ཅང་གལ་ཆེན་པོ་རེད། ཐུགས་རྗེ་ཆེ། ཞེས་བཀའ་སློབ་གསུང་འཕྲིན་སྩལ་འདུག་པ་བཅས། །
