༢༠༡༤ ཟླ་ ༨ ཚེས་ ༡༤ རེས་གཟའ་ཕུར་བུ།
༄༅། །ཕྱི་ལོ་ ༢༠༡༤ ཟླ་ ༨ ཚེས་ ༡༣ 
ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེང་གེ་མཆོག་དབུ་བཞུགས་ཐོག་བཞུགས་སྒར་དུ་རྟེན་གཞི་བྱས་པའི་འཕགས་ཡུལ་ཀིརྟི་བྱེས་པ་གྲྭ་ཚང་གི་ཆེས་མཐོའི་བོད་ཀྱི་རིག་གནས་སློབ་གཉེར་ཁང་གི་སྐབས་དང་པོ་དང་། གཉིས་པའི་དབུ་མ་རམ་འབྱམས་པའི་བསླབ་པ་མཐར་སོན་དང་། སྐབས་གསུམ་པ་དང་བཞི་པའི་ཕར་ཕྱིན་གྱི་བསླབ་པ་མཐར་སོན། དེ་བཞིན་འབྲིང་རིམ་རིག་གནས་བསླབ་པ་མཐར་སོན་པའི་མཛད་སྒོ་ཀིརྟི་བྱེས་པ་གྲྭ་ཚང་གི་ཚོགས་ཁང་ནང་ཚོགས་འདུག
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ པའི་ཐོག་སྐུ་མགྲོན་གཙོ་བོ་སྲིད་སྐྱོང་བློ་བཟང་སེང་མཆོག་གིས་དབུས་དགེ་སློབ་ཁྱོན་མི་གྲངས་ ༡༧༠ བརྒལ་བའི་ལྷན་འཛོམས་ཀྱི་ཐོག་མར་ཀིརྟི་དགོན་པའི་སློབ་སྤྱི་དང་དགེ་རྒན་གཅིག་ལྕོགས་སོ་རུ་བློ་བཟང་དར་རྒྱས་ལགས་ཀྱིས་སློབ་གཉེར་ཁང་དེའི་སློབ་སྦྱོང་བྱེད་ཕྱོགས་དང་འབྲེལ་བའི་ལས་བསྡོམས་སྒྲོགས་སྦྱང་གནང་ཡོད། དེ་ནས་སྐུ་མགྲོན་གཙོ་བོ་མཆོག་གིས་དེར་འདུས་རྣམ་པར་གསུང་བཤད་གནང་དོན། ང་རང་སྲིད་སྐྱོང་གི་འགན་ཁུར་ནས་ཀིརྟིའི་དགོན་པ་ཡོང་ཐེངས་དང་པོ་ཡིན་སྟབས། བཀའ་ཤག་སྐབས་ ༡༤ ཚབ་ཞུས་ཏེ་སྙིང་ཐག་ནས་ཚང་མར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ཀིརྟིའི་དགོན་པ་རྔ་པ་ཁུལ་གྱི་ཡན་ལག་མང་པོ་ཡོད་པའི་དགོན་ཆེན་ཞིག་དང་། དེའི་ནང་མདོ་སྔགས་རིག་གནས་གཙོས་གསོ་བ་རིག་པའི་སྡེ་ཚན་སོགས་ཡོད། དམིགས་བསལ་རིག་གནས་ཐོག་ལ་དོ་སྣང་ཡོད་པའི་དགོན་སྡེ་ཞིག་ཆགས་ཡོད། བཙན་བྱོལ་ནང་དུའང་རིག་གནས་ཐོག་དཔེ་དེབ་ ༡༤༠ ལྷག་པར་སྐྲུན་གནང་བར་བསྔགས་བརྗོད་ཞུ་རྒྱུ་ཡིན།
སྤྱིར་བཏང་ཤེས་ཡོན་གལ་ཆེན་པོ་ཡིན་པར་བརྟེན། བསླབ་པ་མཐར་སོན་བྱུང་བ་དེ་ཧ་ཅང་ཡག་པོ་རེད། ལྷག་པར་བརྒྱ་ཆ་ ༧༥ ལོན་པ་ནི་དེ་བས་ཀྱང་ཡག་པོ་རེད། འོན་ཀྱང་སྤུས་ཚད་ལྡན་པའི་ཐོག་འཛམ་གླིང་ནང་སྙན་གྲགས་ཅན་གྱི་མཐོ་སློབ་ནང་བོད་པ་ཚོ་འདྲ་འདྲའི་ནང་ནས་མི་འདྲ་ཞིག་ཐོན་ཐབས་བྱེད་དགོས་རྒྱུ་ཧ་ཅང་གལ་ཆེན་པོ་རེད། ངས་དུས་རྟག་ཏུ་བོད་པའི་སློབ་ཕྲུག་ཚོར་རྗོད་བཞིན་ཡོད། དེ་བཞིན་དགེ་འདུན་པ་རྣམས་ནས་ཀྱང་སློབ་སྦྱོང་བྱེད་སྐབས། རང་ཉིད་ཀྱི་མི་ཚེའི་བསྐྱལ་རྒྱུ་ཁོ་ནའི་ཆེད་དུ་སློབ་སྦྱོང་གནང་གི་མེད། བོད་ཀྱི་ཛ་དྲག་གནས་སྟངས་སྐབས་ལ་བོད་སྤྱི་དོན་སླད་ལས་དོན་བསྒྲུབ་རྒྱུ་གལ་འགངས་ཆེན་པོ་ཆགས་ཡོད། སློབ་སྦྱོང་ཆོས་ཕྱོགས་ཐོག་ནས་ཏན་ཏན་ཡག་པོ་གནང་དང་གནང་མུས་ཡིན་པ་ལྟར། དེང་དུས་ཀྱི་ཤེས་ཡོན་ཐོག་ལ་ཡང་སྔར་ལྷག་འབད་བརྩོན་གནང་དགོས། འཛིན་སྐྱོང་བཀའ་ཤག་ངོས་ནས་སྤྱིར་ཀིརྟི་དགོན་པ་ནི་རིས་མེད་ཐོག་དོ་སྣང་གནང་མཁན་བོད་རྔ་པའི་དགོན་ཆེན་ཁྱད་པར་བ་ཞིག་དང་། ཡང་སྒོས་དགོན་བདག་སྐྱབས་རྗེ་བཀའ་ཟུར་ཀིརྟི་རིན་པོ་ཆེ་མཆོག་ནི་ཆོས་སྲིད་གང་ཅིའི་ཐོག་ཐུགས་འགན་བཞེས་མཁན་ཞིག་ཏུ་ངོས་འཛིན་ཞུ་བཞིན་ཡོད།
ལྷག་པར་རིན་པོ་ཆེ་མཆོག་གིས་བོད་ནང་གི་རང་ལུས་མེར་སྲེག་བྱུང་ཡུལ་མང་ཤོས་རྔ་པ་ཀིརྟི་དགོན་པས་གཙོས་བོད་ནང་གི་ཛ་དྲག་གནས་ཚུལ་རྣམས་ཨ་རི་དང་ཡུ་རོབ་སོགས་རྒྱལ་སྤྱིའི་གཞུང་དམངས་ལ་དྲིལ་བསྒྲགས་ཀྱི་འགན་འཁུར་ཆེར་བཞེས་གནང་ཡོད། དེ་བཞིན་ཀིརྟི་དགོན་པ་འདིའི་ནང་ཛ་དྲག་ཚོགས་ཆུང་ཞེས་ཁོང་རྣམ་པ་གཉིས་ནས་བོད་ནང་གི་གནས་ཚུལ་ཁུངས་ལྡན་བསྡུ་རུབ་གནང་བ་མ་ཟད། རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་ཁྱབ་བསྒྲགས་གནང་མུས་རེད། ཅེས་སོགས་ཀྱི་གསུང་བཤད་གནང། དེ་ནས་སློབ་སྤྱིའི་ལས་རོགས་ཀླུ་ཆུ་དཀོན་མཆོག་རྒྱ་མཚོ་ལགས་ཀྱིས་ཐུགས་རྗེ་ཆེ་ཞུས་ཏེ་མཛད་སྒོ་གྲོལ།
སྤྱིར་བཏང་ད་ལྟའི་ཆར་ཀིརྟི་དགོན་པར་དགེ་ལས་ཁྱོན་བསྡོམས་དགེ་འདུན་པ་ ༡༧༣ ཡོད་ཁོངས་ནས་སློབ་གཉེར་བ་ ༨༥ དང་། དགེ་རྒན་ ༡༧ ཡོད་འདུག་པ་བཅས། །
