༢༠༡༤ ཟླ་ ༨ ཚེས་ ༢༢ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༨ ཚེས་ ༢༣ ཉིན་ནས་བཟུང་བོད་མི་མང་སྤྱི་འཐུས་ཚོགས་གཙོ་སྤེན་པ་མཆོག་གིས་གཙོས་སྤྱི་འཐུས་ཐུབ་བསྟན་ལུང་རིགས་ལགས་དང། སྤྱི་འཐུས་བསོད་ནམས་རྒྱལ་མཚན་ལགས། སྤྱི་འཐུས་རྣམ་དག་གཙུག་ཕུད་ལགས་བཅས་ཨོ་སི་ཊོ་ལི་ཡར་འཚམས་གཟིགས་དང་འབྲེལ་ཁུལ་དེའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་ཁག་གཅིག་དང་མཇལ་འཕྲད་གནང་རྒྱུ་སོགས་ཀྱི་ལས་འཆར་ཡོད་འདུག
དེ་ཡང་སྤྱི་འཐུས་རྣམ་པས་གོང་ཚེས་ཉིན་ཨོ་སི་ཊོ་ལི་ཡའི་གྲོང་ཁྱེར་སི་ཌེ་ནི་ནས་འགོ་འཛུགས་ཀྱིས་མངའ་སྡེ་ཁག་གསུམ་ནང་དུས་ཡུན་བདུན་ཕྲག་གཅིག་རིང་འཚམས་གཟིགས་གནང་རྒྱུ་ཡིན་སྐོར་ཨོ་སི་ཊོ་ལི་ཡའི་རྒྱལ་ཡོངས་བོད་རིགས་སྤྱི་མཐུན་ཚོགས་པའི་ཚོགས་གཙོས་བརྒྱུད་ལམ་ཁག་གཅིག་ནང་གསུང་གསལ། སྤྱི་འཐུས་རྣམ་པ་ཨོ་སི་ཊོ་ལི་ཡའི་ནང་བདུན་ཕྲག་གཅིག་རིང་འཚམས་གཟིགས་ཆེད་དུ་ཕེབས་ཀྱི་ཡོད། ནམ་རྒྱུན་སྤྱི་འཐུས་རྣམ་པ་གཞུང་འབྲེལ་ཕྱོགས་ཕེབས་ཀྱི་ལས་རིམ་ཞིག་ཡོད། ལྷག་པར་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དམིགས་བསལ་བོད་རྒྱལ་ཡོངས་སྤྱི་མཐུན་ཚོགས་པས་མགྲོན་འབོད་གནང་བ་ཞིག་ཆགས་ཀྱི་ཡོད། གང་ལ་ཞེ་ན། བོད་དོན་རྒྱབ་སྐྱོར་ཚོགས་པ་དང་སྐུ་ཚབ་དོན་གཅོད་ཀྱིས་རྒྱབ་སྐྱོར་འོག་ཨོ་སི་ཊོ་ལི་ཡའི་ནང་རྒྱ་རིགས་མང་གཙོ་དོན་གཉེར་བ་མཁས་དབང་དང། རྒྱ་ནག་གི་ཆབ་སྲིད་ཐོག་རྒྱུས་མངའ་ཡོད་པའི་གལ་ཆེན་མི་སྣ་མང་པོ་ཞིག་ཡོད་པར་བརྟེན། ང་ཚོས་གྲོང་ཁྱེར་སི་ཌེ་ནི་དང་རྒྱ་ནག དེ་བཞིན་བོད་ནང་གི་ཁོར་ཡུག་སྲུང་སྐྱོབ་སོགས་ཀྱི་སྐོར་ལ་བགྲོ་གླེང་ཞིག་གོ་སྒྲིག་ཞུ་བཞིན་ཡོད། ཕྱོགས་མཚུངས་སྤྱི་འཐུས་ཚོགས་གཙོ་མཆོག་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་ཁག་གཅིག་དང་མཇལ་འཕྲད་གནང་རྒྱུའི་ལས་རིམ་སོགས་ཡོད། ཅེས་འགྲེལ་བརྗོད་གནང་འདུག
