༢༠༡༤ ཟླ་ ༨ ཚེས་ ༢༦ རེས་གཟའ་མིག་དམར།
༄༅། །འདི་གར་རྡོར་གླིང་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། 
ཕྱི་ལོ་ ༢༠༡༤ ཟླ་ ༨ ཚེས་ ༢༣ ནས་ ༢༥ བར་བོད་མིའི་སྒྲིག་འཛུགས་ཀྱི་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་རྡོར་གླིང་ས་གནས་འགོ་འཛིན་ཁྱབ་ཁོངས་ཁ་འཐོར་ས་གནས་ཁག་དང་། བསུ་ན་མདའ་བཀྲ་ཤིས་གླིང་བོད་མིའི་གཞིས་ཆགས་བཅས་སུ་བོད་མིའི་སྒྲིག་འཛུགས་ཀྱི་ངོས་ནས་བོད་རྒྱའི་དཀའ་རྙོག་སེལ་ཐབས་གཉིས་སྨན་དབུ་མའི་ལམ་གྱི་སྲིད་བྱུས་སྐོར་དང་། སྤྱི་ནོར༸གོང་ས༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་མཛད་ཆེན་ཁག་ངོ་སྤྲོད་གནང་ཡོད།
དེ་ཡང་ཕྱི་ཚེས་ ༢༣ ཉིན་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀ་སྦུག་ནས་རྡོར་གླིང་དུ་ཕེབས་འབྱོར་སྐབས་རྡོར་གླིང་ས་གནས་འགོ་འཛིན་བསྟན་འཛིན་ཚེ་དཔག་ལགས་དང་། རྩིས་དྲུང་བསྟན་འཛིན་ནོར་ལྡན་ལགས། ས་གནས་རང་བདེན་ཚོགས་གཙོ་སོགས་ས་གནས་ཀྱི་ཚོགས་སྐྱིད་དགུའི་སྐུ་ཚབ་རྣམས་ནས་མཇལ་དར་དང་བཅས་ཕེབས་བསུའི་སྣེ་ལེན་ཞུས།
ཉིན་རྒྱབ་ཆུ་ཚོད་ ༡།༠༠ ཐོག་རྡོར་གླིང་དང་ཟུར་སྐྱིད་སྡུག་ཚོགས་པའི་ཚོགས་མི་རྣམས་ལ་གསུང་བཤད་དང་། ཕྱི་ཚེས་ ༢༥ ཉིན་པོག་རི་པུང་སམ་བྷོ་ཌ་སློབ་གྲྭའི་འཛིན་གྲྭ་དང་། ཉལ་ཁང་། གསོལ་ཐབ་ཁང་། ཟློས་གར་ཁང་། སྨན་ཁང་སོགས་སྡེ་ཚན་ཁག་ལ་གཟིགས་སྐོར་དང་། སློབ་གྲྭའི་ཚོགས་ཁང་ནང་དགེ་ལས་སློབ་ཕྲུག་དང་། མ་ཎི་སྦ་བྱང་དང་པོག་རི་པུང་ཁུལ་གྱི་མི་མང་བཅས་ལ་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ཞི་བདེ་དང་ཆོས་ལུགས་མཐུན་སྒྲིལ་གོང་སྤེལ། བོད་བརྒྱུད་ནང་བསྟན་འཛིན་སྐྱོང་སྤེལ་གསུམ་གྱི་རླབས་ཆེན་མཛད་བཟང་ལ་གཟེངས་སུ་ཐོན་པའི་གྲུབ་འབྲས་ཐོན་ཡོད་པ་རྣམས་ངོ་སྤྲོད་དང་། དབུ་མའི་ལམ་གྱི་ངོ་བོ་དང་རྒྱབ་ལྗོངས། དབུ་མའི་ལམ་གྱི་སྲིད་བྱུས་བྱུང་རིམ། བོད་རྒྱ་འབྲེལ་མོལ་སོགས་ཀྱི་སྐོར་འགྲེལ་བཤད་ཞིབ་ཕྲ་གནང་འདུག
