༢༠༡༤ ཟླ་ ༨ ཚེས་ ༨ རེས་གཟའ་པ་སངས།
༄༅། །ཉེ་ཆར་ཕྱི་རྒྱལ་བ་ཉམས་ཞིབ་པ་ཞིག་གིས་བོད་མདོ་སྨད་ཀྱི་ས་ཁུལ་ཁག་གཅིག་ནང་བསྐྱོད་དེ་བོད་ནང་རྒྱ་ནག་གཞུང་གིས་འཛུགས་སྐྲུན་སོགས་ཀྱི་སྲིད་བྱུས་གང་ཞིག་སྤེལ་ཡང་བོད་མི་རྣམས་རྒྱ་ནག་གཞུང་གི་དབང་སྒྱུར་འོག་བསྡད་འདོད་མེད་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་དུ་ཆིབས་སྒྱུར་བསྐྱང་རྒྱུ་ངང་སྒུག་བྱེད་བཞིན་ཡོད་སྐོར་དངོས་མཐོང་གི་རྩོམ་ཡིག་གཅིག་འགོད་སྤེལ་གནང་འདུག
དེ་ཡང་ཕྱི་ལོ་ ༢༠༡༤ ཟླ་ ༨ ཚེས་ ༦ ཉིན་རྩོམ་ཡིག་དེ་བརྒྱུད་ལམ་ཁག་གཅིག་ནང་འགོད་སྤེལ་གནང་བའི་ནང་འཁོད་དོན། ང་རང་དེ་སྔ་དང་ཉེ་དུས་བཅས་བོད་མདོ་སྨད་བསངས་ཆུ་རྫོང་ཁུལ་དང་། གཙོད་གྲོང་ཁྱེར། དེ་བཞིན་མཚོ་སྔོན་ཞིང་ཆེན་གྱི་མགོ་ལོག་སོགས་ས་ཁུལ་ཁག་གཅིག་ནང་སྐྱོད་སྐབས། ཁུལ་དེ་དག་ནང་རྒྱ་ནག་གཞུང་གིས་འཛུགས་སྐྲུན་གྱི་ལས་གཞིའི་རྐྱེན་པས། ཁོར་ཡུག་ལ་འབག་བཙོག་བཏང་དང་གཏོང་མུས་ཡིན་པར་བརྟེན། བོད་མི་ཚོར་དཀའ་ངལ་ཧ་ཅང་ཤུགས་ཆེན་འཕྲད་བཞིན་འདུག ལྷག་པར་གཙོད་གྲོང་ཁྱེར་ཁུལ་དུ་མེ་འཁོར་ལྕགས་ལམ་གྱི་ལས་གཞིའི་དབང་གིས་ཁུལ་དེའི་ཁོར་ཡུག་ལ་ཚད་ལས་བརྒལ་བའི་གཏོར་སྐྱོན་བྱུང་འདུག ཕྱོགས་མཚུངས་མགོ་ལོག་ཁུལ་དུ་ཡང་རྒྱ་ནག་གཞུང་གི་གཏེར་ཁ་སྔོག་འདོན་གྱི་ལས་གཞི་རྐྱེན་པས་ཁོར་ཡུག་ལ་གནོད་སྐྱོན་བྱུང་སྟེ། ས་གནས་མང་ཚོགས་ལ་དཀའ་ངལ་འཕྲད་མུས་རེད།
སྤྱིར་བཏང་ལས་གཞི་དེ་རིགས་ཀྱིས་ད་ལྟ་དང་མ་འོངས་པར་བོད་མིར་ཕན་ཐོགས་ཡོང་རྒྱུ་ཤིན་ཏུ་ནས་དཀའ་ལས་ཁག་པོ་ཆགས་འདུག བསངས་ཆུ་རྫོང་ཁུལ་དུ་འདས་པའི་ལོ་ཁ་ཤས་ནང་རྒྱ་ནག་གཞུང་གི་ཁང་པ་གསར་རྒྱག་གི་ལས་གཞི་ཤུགས་ཆེ་སྤེལ་བ་དང་ཆབས་ཅིག་ས་གནས་དེར་རྒྱ་མི་རིགས་ཕོན་ཆེན་གནས་སྤོས་བྱས་ཏེ། བོད་པའི་ས་ཁུལ་ནང་བོད་མི་རྣམས་གྲངས་ཉུང་གི་གནས་སུ་སླེབས་ཀྱི་ཡོད་པ་མ་ཟད། ཁང་པ་དང་ཚོང་ཁང་གི་སྒོ་བྱང་རྣམས་གཙོ་ཆེ་རྒྱ་ཡིག་བཀོད་དེ་ཟུར་དུ་བོད་ཡིག་ཆུང་ངུ་ཞིག་ལས་བཀོད་མིི་ཆོག་པ་བཟོས་འདུག ལྷག་པར་ཚོང་ཁང་མང་ཆེ་བ་རྒྱ་མི་རིགས་ཀྱིས་བདག་པོ་བརྒྱབ་སྟེ། ཁོ་པ་ཚོས་བོད་རིགས་ཀྱི་ཆས་སྤྲས་ནས་ཡུལ་སྐོར་སྤྲོ་འཆམ་པར་ཧམ་ཚོང་བརྒྱབ་ནས་བོད་མིའི་ཆེ་མཐོང་ལ་གནོད་སྐྱོན་བཟོ་བཞིན་འདུག མདོར་ན། གཞིས་ལུས་བོད་མི་རྣམས་རྒྱ་ནག་གཞུང་གི་དབང་སྒྱུར་འོག་བསྡད་འདོད་མེད་པའི་རྣམ་པ་ཧ་ཅང་གསལ་པོ་མངོན་བཞིན་འདུག ཅེས་སོགས་དངོས་མཐོང་རྣམས་འགྲེལ་བརྗོད་གནང་འདུག
